കമ്പ്യൂട്ടര്‍ വൃത്തിയാക്കുമ്പോള്‍ ശ്രദ്ധിക്കുക

Improvement

oi-Staff

By Super

Published: Wednesday, January 18, 2012, 14:20 [IST]

കമ്പ്യൂട്ടറില്ലാത്ത വീടുകള്‍ ഇന്ന് വളരെക്കുറവാണ്. ഇവയില്‍ പൊടി കയറിയാല്‍ കമ്പ്യൂട്ടര്‍ തന്നെ കേടായെന്ന് വരും. അതുകൊണ്ട് ഇവ വൃത്തിയാക്കേണ്ടതും പ്രധാനം. എന്നാല്‍ ശ്രദ്ധയില്ലാതെ വൃത്തിയാക്കിയാല്‍ ഇവയിലെ സ്‌ക്രീനില്‍ പോറല്‍ വീഴാനും എളുപ്പമാണ്.

ഇലക്ടോണിക് വസ്തുവായതു കൊണ്ട് കമ്പ്യൂട്ടര്‍ വൃത്തിയാക്കുമ്പോള്‍ നമ്മുടെ സുരക്ഷയും പ്രധാനമാണ്. ഇലക്ട്രിക് വയറുകളും പ്ലഗും വിച്ഛേദിച്ച ശേഷമെ വൃത്തിയാക്കാന്‍ തുടങ്ങാവൂ. പ്രത്യേകിച്ച് എന്തെങ്കിലും ലായനികള്‍ കൊണ്ട് വൃത്തിയാക്കുമ്പോള്‍. റബര്‍ ചെരിപ്പ് ധരിക്കുന്നത് നല്ലതാണ്. ഇത് ഷോക്ക് തടയാന്‍ സഹായിക്കും.

സിപിയു വൃത്തിയാക്കാന്‍ ആദ്യം വയറുകള്‍ ഊരിയിടണം. ഒരു ഡസ്റ്റര്‍ കൊണ്ട് പൊടി തട്ടിയ ശേഷം വൃത്തിയാക്കാന്‍ ആരംഭിക്കുക. എണ്ണമയമുള്ള അഴുക്കുകള്‍ ടിഷ്യൂ പേപ്പര്‍ ഉപയോഗിച്ച് വൃത്തിയാക്കാം. സിപിയുവിന്റെ സ്‌ക്രൂവും ബോള്‍ട്ടുകളും സൂക്ഷിച്ച് അഴിച്ചു മാറ്റിയ ശേഷം ഉള്ളിലെ പൊടിയും തട്ടിക്കളയാം. ഉള്‍ഭാഗത്ത് വെള്ളമോ ലായനികളോ വൃത്തിയാക്കാന്‍ ഉപയോഗിക്കരുത്.

കീബോര്‍ഡിന്റെ വയറുകള്‍ വേര്‍പെടുത്തിയതിന് ശേഷം മാത്രം വൃത്തിയാക്കുക. കീബോര്‍ഡിനിടയില്‍ പൊടി പറ്റിപ്പിടിക്കാന്‍ സാധ്യത കൂടുതലാണ്. വണ്ണം കുറഞ്ഞ പെയിന്റ് ബ്രഷ് ഉപയോഗിച്ച് ഈ പൊടി തട്ടിക്കളയണം. ലായനികള്‍ കൊണ്ട് കീബോര്‍ഡ് വൃത്തിയാക്കാതിരിക്കുന്നതാണ് നല്ലത്.

മൗസ് വൃത്തിയാണെന്ന് തോന്നുമെങ്കിലും ഇതിന്റെ സോക്കറ്റിനുള്ളില്‍ അഴുക്കും പൊടിയും പറ്റിപ്പിടിക്കാനുള്ള സാധ്യത കൂടുതലാണ്. മൗസിന്റെ അടിഭാഗം അഴിച്ചുമാറ്റി ഉള്ളിലെ പൊടി തുടയ്ക്കാം. ഇത് വൃത്തിയാക്കണമെങ്കില്‍ ഇയര്‍ ബഡ്‌സ് ഉപയോഗിക്കാം.

കമ്പ്യൂട്ടര്‍ മോണിറ്റര്‍ വൃത്തിയാക്കാന്‍ വേണമെങ്കില്‍ നനഞ്ഞ തുണി ഉപയോഗിക്കാം. മൃദുവായ തുണി മാത്രമെ ഇതിനുപയോഗിക്കാവൂ. അല്ലെങ്കില്‍ മോണിറ്ററില്‍ വരകള്‍ വീഴും. തുടയ്ക്കാന്‍ ഉപയോഗിക്കുന്ന തുണി വൃത്തിയായിരിക്കേണ്ടത് അത്യാവശ്യമാണ്. അല്ലെങ്കില്‍ അതിലെ അഴുക്ക് മോണിറ്ററിലാകും. പ്രത്യേകിച്ച് നനഞ്ഞ തുണിയാണെങ്കില്‍.

പ്ലഗിലേയും വയറിലേയും പൊടികളും തട്ടിക്കളയണം. ഇതിന് ഡസ്റ്ററോ ഉണങ്ങിയ തുണിയോ ഉപയോഗിക്കാം.

മോണിറ്റര്‍ വയ്ക്കുന്ന ടേബിളിലെ പൊടിയും നീക്കം ചെയ്യേണ്ടത് ആവശ്യമാണ്. ഇതിന് ശേഷം വയറുകളും പ്ലഗുകളുമെല്ലാം യഥാസ്ഥാനത്ത് പിടിപ്പിക്കാം.