ഒന്നിനൊന്ന് ഫ്രീ വേണോ?

നിത്യോപയാഗ സാധനങ്ങളുടെ വില ദിനംപ്രതി വര്‍ദ്ധിച്ചു വരികയാണ്. പ്രത്യേകിച്ച് ഭക്ഷണസാധങ്ങളുടെ.

അല്‍പം ദീര്‍ഘവീക്ഷണമുള്ള വീട്ടമ്മയാണ് നിങ്ങളെങ്കില്‍ അടുക്കളച്ചെലവ് ഒരു പരിധി വരെ കുറയ്ക്കാം.

ഇതിന് ആദ്യമായി വേണ്ടത് പലപ്പോഴായി ഭക്ഷണസാധനങ്ങള്‍ വാങ്ങാതെ ഒരു മാസത്തേക്ക് ആവശ്യമുള്ളവ ഒരുമിച്ചു വാങ്ങുകയെന്നതാണ്. പച്ചക്കറികളും പഴങ്ങളും പെട്ടെന്ന് കേടാകാന്‍ സാധ്യതയുള്ളതു കൊണ്ട് ഈ ലിസ്റ്റില്‍ നിന്ന് ഒഴിവാക്കാം. വാങ്ങേണ്ട സാധനങ്ങളുടെ ലിസ്റ്റുണ്ടാക്കി എല്ലാം വാങ്ങാന്‍ ശ്രമിക്കുക.

ധാന്യങ്ങള്‍, പയര്‍ വര്‍ഗങ്ങള്‍, എണ്ണ മുതലായവ അല്‍പം കൂടുതല്‍ വാങ്ങി സംഭരിക്കാം. ഇവ കുറച്ചുനാള്‍ കേടു വരാതിരിക്കും. പ്രത്യേകിച്ച് ഇവ വിലകുറവിന് ലഭിക്കുന്നുണ്ടെങ്കില്‍.

കടയില്‍പോയി ആവശ്യമുള്ളവ മാത്രം വാങ്ങുക. ഉപയോഗിക്കുമന്ന് ഉറപ്പുള്ളവ മാത്രം വാങ്ങുന്നത് പണം ലാഭിക്കാന്‍ സഹായിക്കും. ലിസ്റ്റിലുള്ള സാധനങ്ങളല്ലാതെ മറ്റുള്ളവ വാങ്ങാതിരിക്കാന്‍ ശ്രദ്ധിക്കണം.

ഒന്നിനൊന്ന് ഫ്രീ എന്നു കാണുമ്പോള്‍ വേണ്ടെങ്കിലും സാധനങ്ങള്‍ വാങ്ങുന്നവരുണ്ട്. ഇത് കടക്കാര്‍ക്ക് ലാഭമുണ്ടാക്കാനാണെന്ന് തിരിച്ചറിയുക. ആവശ്യമുള്ളതാണെങ്കില്‍ വാങ്ങുന്നത് കൊണ്ടു തെറ്റില്ല. എന്നാല്‍ സൗജന്യമായി ലഭിക്കുന്നുവെന്ന കാരണം കൊണ്ട് സാധനങ്ങള്‍ വാങ്ങിക്കൂട്ടാതിരിക്കുക.

വില കുറവെന്നു കരുതി തീരെ ഗുണമേന്മയില്ലാത്ത സാധനങ്ങള്‍ വാങ്ങിതിരിക്കുകയാണ് നല്ലത്. ഉദാഹരത്തിന് വെന്തു കിട്ടാന്‍ ഏറെ നേരം പിടിയ്ക്കുന്ന അരി വിലകുറവിന് കിട്ടിയെന്നിരിക്കും. എന്നാല്‍ ഇത് വേവിക്കാന്‍ ഗ്യാസ് കൂടുതല്‍ സമയം ചെലവാക്കേണ്ടതായും വരും. ഇത്തരം അവസ്ഥകള്‍ മുന്‍കൂട്ടി കണ്ടുമാത്രം സാധനങ്ങള്‍ വാങ്ങുക.

പച്ചക്കറി, പഴവര്‍ഗങ്ങള്‍ എന്നിവ ഫ്രഷായവ മാത്രം നോക്കി വാങ്ങാന്‍ ശ്രമിക്കണം. ഇത് നല്ലരീതിയില്‍ സൂക്ഷിക്കുകയും വേണം. വില കുറവിന് നിലവാരമില്ലാത്ത സാധനങ്ങള്‍ വാങ്ങിയാല്‍ പണം പോയെന്നേ പറയാനാവൂ.

കൃത്യമായ അടുക്കള ബജറ്റുണ്ടാക്കുന്നത് നല്ലതാണ്. ഇതിനുള്ളില്‍ ഒതുങ്ങി നിന്ന് ചെലവാക്കാന്‍ ശ്രമിക്കണം.