നല്ല ചായ തയ്യാറാക്കാന്‍ പൊടിക്കൈകള്‍

Improvement

oi-Saritha

By Veena

Updated: Monday, August 6, 2012, 15:18 [IST]

ചായയും കാപ്പിയും ആരോഗ്യത്തിന് കേടെന്ന് ആരൊക്കെ പറഞ്ഞാലും രാവിലെ എഴുന്നേറ്റാല്‍ ഒരു കപ്പ് ചായ മിക്കവര്‍ക്കും പതിവാണ്. ഉറക്കം തൂങ്ങല്‍ ഒഴിവാക്കാനും ഉന്മേഷം ലഭിക്കാനുമെല്ലാം ചായ തന്നെയാണ് പലര്‍ക്കുമുള്ള ഔഷധം.

ചായയെന്ന പേരില്‍ അതേ നിറമുള്ള പാനീയം കുടിച്ചാല്‍ മതിയാകുമോ, പോരല്ലോ. നല്ല ചായ തയ്യാറാക്കാന്‍ ചില എളുപ്പവഴികളുണ്ട്.

ചായക്കെടുക്കുന്ന വെള്ളവും തേയിലപ്പൊടിയുടെ അളവും ആനുപാതത്തിലായിരിക്കണം. 200 മില്ലിഗ്രാം വെള്ളത്തിന് 5.2 ഗ്രാം ചായപ്പൊടി എന്നതാണ് ശരിയായ കണക്ക്. ഇത് പാകം. കടുപ്പം കുറയുന്നതും കൂടുന്നതും അനുസരിച്ച് അളവിലും വ്യത്യാസം വരാം.

നല്ലപോലെ വെള്ളം വെട്ടിതിളച്ച ശേഷം മാത്രം തേയിലപ്പൊടിയിടുക. ഉടനെ തീ കെടുത്ത അടച്ചു വച്ച് രണ്ടു മിനിറ്റ് കഴിഞ്ഞ് ഊറ്റിയെടുക്കാം. തേയിലയിട്ട ശേഷം വെള്ളം വീണ്ടും തിളപ്പിച്ചാല്‍ ഇലയുടെ ചവര്‍പ്പുള്ള ചായയാണ് ലഭിക്കുക.

പാലൊഴിച്ച് ഒരുമിച്ചു ചായ തിളപ്പിക്കരുത്. കട്ടന്‍ ചായ ഊറ്റിയെടുത്ത ശേഷം അതിലേക്ക് പാല്‍ ചേര്‍ക്കണം. പാല്‍പ്പാട വീഴാതിരിക്കാനും ശ്രദ്ധിക്കുക. ഇത് ചായയ്ക്ക് വെണ്ണരുചി നല്‍കും.

പാല്‍ തിളപ്പിച്ച ഉടന്‍ ചായയില്‍ ചേര്‍ക്കുകയും വേണം. അല്ലെങ്കില്‍ സ്വാദില്‍ വ്യത്യാസമുണ്ടാകും. ഇതിന് ശേഷമെ മധുരം ചേര്‍ക്കാവൂ.

പാല്‍ച്ചായയാണ് പലരും കുടിയ്ക്കുകയെങ്കിലും നല്ല ചായയുടെ രുചി കട്ടന്‍ ചായക്കാണ് ലഭിക്കുക.