ച്യൂയിംഗ് ഗം ഒട്ടിപ്പിടിച്ചാല്‍ പരിഹാരം

Improvement

oi-Saritha

By Veena

Published: Friday, May 25, 2012, 12:23 [IST]

ആവശ്യത്തിനും അനാവസ്യത്തിനും ച്യൂയിംഗ് ഗം ചവയ്ക്കുന്ന ശീലം പുതുതലമുറയില്‍ കൂടി വരികയാണ്. പഴമക്കാര്‍ മുറുക്കാന്‍ ചവയ്ക്കുന്നതു പോലെ.

ച്യൂയിംഗ് ഗം ചവയ്ക്കുന്നതല്ലാ പ്രശ്‌നം, ഇത് അലക്ഷ്യമായി അവിടിവിടെ തുപ്പിയിടുമ്പോഴാണ്. ഇത് നിസാരമെന്നു തോന്നാം. എന്നാല്‍ എവിടെയെങ്കിലും ഇവ പറ്റിപ്പിടിച്ചാല്‍ നീക്കം ചെയ്യാന്‍ ഏറെ പണിപ്പെടേണ്ടി വരും.

ചില കുസൃതിക്കുട്ടികള്‍ ചിലപ്പോള്‍ മറ്റുള്ളവരുടെ മുടിയില്‍ തന്നെ ഇത് ഒട്ടിച്ചു വയ്ക്കും. ചിലപ്പോള്‍ ഇത് കളയാന്‍ മുടി തന്നെ മുറിച്ചു കളേയണ്ടിയും വരും.

ച്യൂയിംഗ് ഗം നീക്കാനുള്ള ചില എളുപ്പമാര്‍ഗങ്ങളിതാ,

വസ്ത്രത്തിലോ കാര്‍പെറ്റുകളിലോ ച്യൂയിംഗ് ഗം പറ്റിപ്പിടിച്ചാല്‍ ഒരു കഷ്ണം ഐസ് ഇതിനു മുകളില്‍ ഉരയ്ക്കുക. ച്യൂയിംഗ് ഗം കട്ടിയായാല്‍ ഇത് അടര്‍ത്തിയെടുക്കാം.

ഐസ് വീണ് കാര്‍പെറ്റ് നനയാതിരിക്കാന്‍ അധികം കട്ടിയില്ലാത്ത ഒരു പ്ലാസ്റ്റിക് കവറിലാക്കി കാര്‍പെറ്റിന് മുകളില്‍ അല്‍പനേരം വച്ചാല്‍ മതിയാകും.

മുടിയില്‍ ച്യൂയിംഗ് ഗം ഒട്ടിപ്പിടിച്ചാല്‍ വെളിച്ചെണ്ണ പുരട്ടി അല്‍പസമയം വയ്ക്കുക. പിന്നീട് ഇത് അടര്‍ത്തിയെടുക്കാം. പതിയെ ചീകിയാലും മതി. മുടി പൊട്ടിപ്പോകാതെ ശ്രദ്ധിക്കുക. മുടിയില്‍ പീനട്ട് ബട്ടര്‍ പുരട്ടി കഴുകുന്നത് ഗുണം ചെയ്യും. മുടിത്തുമ്പിലാണെങ്കില്‍ ഐസ് വയ്ക്കുകയും ചെയ്യാം.

വസ്ത്രങ്ങളില്‍ ച്യൂയിംഗ് ഗം ആയാല്‍ ഇതില്‍ വെളിച്ചെണ്ണ പുരട്ടിയ ശേഷം അടര്‍ത്തിയെടുക്കാം. പിന്നീട് സോപ്പുപയോഗിച്ച് കഴുകാം.