വെള്ളം പാഴാക്കാതിരിക്കാന്‍ വഴിയുണ്ട്

Published: Saturday, March 24, 2012, 16:02 [IST]

വേനല്‍ക്കാലമായതോടെ വെള്ളക്ഷാമവും രൂക്ഷമാകുന്നു. പാഴാക്കിക്കളയുന്ന ഓരോ തുളളി വെള്ളത്തിനും കണക്കുപറയേണ്ടി വരുന്ന കാലം വിദൂരമല്ല.

നമ്മുടെ വീട്ടില്‍ തന്നെ അശ്രദ്ധ കാരണം നാം ധാരാളം വെള്ളം പാഴാക്കിക്കളയുന്നുണ്ട്. ചില ചെറിയ കാര്യങ്ങള്‍ ശ്രദ്ധിച്ചാല്‍ തന്നെ പാഴാക്കിക്കളയുന്ന വെള്ളത്തിന്റെ നല്ലൊരു ശതമാനം കാത്തു വയ്ക്കുവാന്‍ സാധിക്കും.

വീട്ടില്‍ നാം ശ്രദ്ധിച്ചാലും നിസാരമായി വിട്ടുകളയുന്ന പൈപ്പ് ലീക്ക് ഉണ്ടാകാം. ഇത്തരം ലീക്കുകള്‍ സമയാസമയത്ത് റിപ്പയര്‍ ചെയ്താല്‍ നല്ലൊരു ഭാഗം ജലം വെറുതേ കളയേണ്ടി വരില്ല.

പല്ലു തേയ്ക്കുമ്പോള്‍, ഷേവ് ചെയ്യുമ്പോള്‍, കുളിയ്ക്കുമ്പോള്‍, പാത്രം കഴുകുമ്പോള്‍, മുഴുവന്‍ തീരും വരെ ടാപ്പ് തുറന്നിടുന്ന ശീലം പലര്‍ക്കുമുണ്ട്. ആവശ്യത്തിന് തുറന്ന് പിന്നീട് പൈപ്പ് അടയ്ക്കുക.

ഒരു തുണി കഴുകാന്‍ ഒരു ബക്കറ്റ് വെള്ളം വീതം ഉപയോഗിക്കുന്നവരുണ്ട്. ഒന്നില്‍ കൂടുതല്‍ തുണികള്‍ കഴുകുമ്പോള്‍ വെള്ളവും ലാഭിക്കാം.

വാഷിംഗ് മെഷീന്‍, ഡിഷ് വാഷര്‍ എന്നിവ മുഴുവന്‍ ലോഡാകുമ്പോള്‍ മാത്രം പ്രവര്‍ത്തിപ്പിക്കുക. വെള്ളം മാത്രമല്ലാ, കറന്റ് ബില്ലും ലാഭിക്കാം.

ചെടികള്‍ക്ക് രാവിലെയും വൈകുന്നേരവും വെള്ളമൊഴിക്കുന്നത് അത്ര അത്യാവശ്യം സന്ദര്‍ഭങ്ങളില്‍ മാത്രം മതിയെന്നു വയ്ക്കുക. പകരം വൈകീട്ട് വെയില്‍ പോയ ശേഷം വെള്ളമൊഴിക്കുക. അല്ലെങ്കില്‍ വെള്ളം പെട്ടെന്ന് നഷ്ടപ്പെട്ടുപോകും.

ചെടികള്‍ക്ക് വെള്ളമൊഴിക്കാന്‍ നല്ല വെള്ളം ഉപയോഗിക്കണമെന്നില്ല. പച്ചക്കറികള്‍ കഴുകിയ വെള്ളം, വാട്ടര്‍ ഫില്‍ട്ടറില്‍ നിന്ന് പോകുന്ന ചീത്ത വെള്ളം, സോപ്പുപൊടി കലരാത്ത, പാത്രം കഴുകിയ വെള്ളം എന്നിവ ചെടികള്‍ക്കൊഴിക്കാം.

വാഹനങ്ങള്‍ കഴുകാന്‍ പൈപ്പ് തുറന്നിടുന്നതിന് പകരം ഒരു ബക്കറ്റില്‍ വെള്ളമെടുത്ത് ഉപയോഗിക്കാം.