ഗ്യാസ് സ്റ്റൗ എളുപ്പത്തില്‍ വൃത്തിയാക്കാം

Published: Friday, March 2, 2012, 16:03 [IST]

പാചകത്തിന് ഏറ്റവും ചേര്‍ന്ന സഹായിയാണ് ഗ്യാസ് സ്റ്റൗ. എന്നാല്‍ ഭക്ഷണസാധനങ്ങള്‍ തിളച്ചു വീണും കരി പിടിച്ചും ഇത് വൃത്തികേടാകാനുള്ള സാധ്യതയും കൂടുതലാണ്. സാധനങ്ങള്‍ തിളച്ചുവീണാല്‍ ഗ്യാസ് ബര്‍ണര്‍ ശരിക്ക് കത്തുകയുമില്ല. ഇത് ഇന്ധന നഷ്ടം മാത്രമല്ലാ, ചിലപ്പോള്‍ അപകടസാധ്യതയുമുണ്ടാക്കും.

ഗ്യാസ് സ്റ്റൗ വൃത്തിയാക്കുന്നതിന് മുന്‍പ് ഗ്യാസ് സിലിണ്ടറിന്റെ വാല്‍വ് ഓഫാക്കണം. സ്റ്റൗവിന്റെ സ്വിച്ചുകളും ഓഫായെന്ന് ഉറപ്പു വരുത്തണം. ബര്‍ണറുകള്‍ തണുത്ത ശേഷം വേണം സ്റ്റൗ വൃത്തിയാക്കാന്‍.

ബര്‍ണറിന്റെ കവറിംഗ് പുറത്തെടുത്ത് ചൂടുവെള്ളത്തില്‍ സോപ്പുപൊടിയും ബേക്കിംഗ് സോഡയും കലര്‍ത്തി അതിലിടുക. അല്‍പം അമോണിയയും വേണമെങ്കില്‍ ചേര്‍ക്കാം.

ബര്‍ണറുകളുടെ സപ്പോര്‍ട്ടിംഗ് പാനലും ചിലപ്പോള്‍ എടുത്തു മാറ്റാന്‍ സാധിക്കും. ഇവയും ഈ വെള്ളത്തിലിട്ടു വയ്ക്കാം. അരമണിക്കുറിന് ഇത് സ്‌ക്രബര്‍ കൊണ്ട് ഉരച്ച് വൃത്തിയാക്കാം.

സ്റ്റൗവിന്റെ മുകളിലുള്ള പാടുകളും മറ്റും ചൂടുവെള്ളവും സോപ്പുപൊടിയും നാരങ്ങാനീരും കലര്‍ന്ന മിശ്രിതത്തില്‍ തുണി മുക്കി തുടച്ചു കളയാം.

സ്റ്റൗ മുഴുവന്‍ വൃത്തിയാക്കിക്കഴിഞ്ഞാല്‍ ബര്‍ണറുക സോപ്പുവെള്ളത്തില്‍ നിന്ന് പുറത്തെടുത്ത് തുടച്ചു നനവു മാറ്റാം. സപ്പോര്‍ട്ടിംഗ് പ്ലേറ്റ് വച്ച ശേഷം ബര്‍ണറുകള്‍ തിരികെ വയ്ക്കാം.

ആഴ്ചയില്‍ ഒരിക്കലെങ്കിലും ഗ്യാസ് സ്റ്റൗവും ബര്‍ണറുകളും വൃത്തിയാക്കുന്നത് സ്റ്റൗ നല്ലപോലെ കത്താന്‍ സഹായിക്കും.