പാറ്റ ശല്യം എളുപ്പത്തില്‍ ഒഴിവാക്കാം

Published: Wednesday, February 15, 2012, 12:01 [IST]

വീട്ടമ്മയുടെ ശത്രു ലിസ്റ്റിലെ ഒരു മുഖ്യനായിരിക്കും പാറ്റ. അടുക്കളയില്‍ അരങ്ങു വാഴുന്ന ഈ വിദ്വാന് മോഷ്ടാക്കളുടെ ശീലങ്ങളാണ്. രാത്രി പുറത്തെത്തി ആവശ്യമുള്ളതെല്ലാം അകത്താക്കി പതുങ്ങിയിരിക്കും. അടുക്കള വൃത്തിഹീനമാക്കുന്നത് മാത്രമല്ലാ, അസുഖങ്ങള്‍ വരുത്താനും പാറ്റക്കു കഴിയും. ഒന്നുണ്ടെങ്കില്‍ പത്തായി പെറ്റുപെരുകാനുള്ള ഇവയുടെ കഴിവു തന്നെയാണ് ഏറ്റവും വലിയ ശല്യം.

പാറ്റ ശല്യം ഒഴിവാക്കാനായി ഹിറ്റ് അടക്കമുള്ള പല കീടനാശിനികളും ലഭ്യമാണ്. ഇവ കൂടാതെ പാറ്റയെ ഒഴിവാക്കാന്‍ ചില മാര്‍ഗങ്ങള്‍ കൂടിയുണ്ട്.

മസാല വിഭാഗത്തില്‍ പെടുന്ന വയനയില (ബെ ലീഫ്) പാറ്റയെ തുരത്താന്‍ നല്ലതാണ്. ഇത് ഒരു പാത്രത്തില്‍ ഇട്ട് അടുക്കളയില്‍ വയ്ക്കാം. പാറ്റ ശല്യമുള്ള സ്ഥലങ്ങളിലും അടുക്കളയിലെ ഷെല്‍ഫിലും ഇവ കഷ്ണങ്ങളായി മുറിച്ചിടുന്നതും നല്ലതാണ്. ഇവയുടെ മണം പാറ്റയ്ക്കിഷ്ടമല്ല.

പനിക്കൂര്‍ക്കയുടെ ഇലയും ഇതേ രീതിയില്‍ ഉപയോഗിക്കാം. പാറ്റകളെ തടയാന്‍ ഇതും നല്ലൊരു മാര്‍ഗമാണ്.

ബേക്കിംഗ് സോഡയും പഞ്ചസാരയും കൂട്ടിക്കലര്‍ത്തി അടുക്കളയില്‍ ഇടുക. പഞ്ചസാര തിന്നാന്‍ പാറ്റ പുറത്തു വരും. ബേക്കിംഗ് സോഡയുടെ ഗ്യാസ് ഇവയെ സാവധാനത്തിലാണെങ്കിലും കൊല്ലും.

ബോറോക്‌സ് മിശ്രിതവും പാറ്റയെ കൊല്ലാന്‍ നല്ലതാണ്. ബോറോക്‌സ് പാറ്റകളുള്ളിടത്ത് ഇടുക. പാറ്റയുടെ ശരീരത്തിലെ പുറംപാളിക്ക് ക്ഷതമുണ്ടാക്കാന്‍ ബോറോക്‌സിനാകും. ഇത് ഇവയുടെ ശരീരത്തില്‍ നിന്നുള്ള ജലനഷ്ടത്തിനും അതുവഴി അവയെ കൊല്ലാനും നല്ലതാണ്.