ഫിഷ് ടാങ്ക് കഴുകാന്‍ ചൂടുവെള്ളം

വെറുതെ വെള്ളം മാത്രം മാറ്റിയതു കൊണ്ട് ഫിഷ് ടാങ്ക് വൃത്തിയാകണമെന്നില്ല. വെള്ളം മാറ്റുമ്പോള്‍ ഇതിലെ നല്ല ബാക്ടീരിയകള്‍ പുറത്തുപോകുകയാണ് ചെയ്യുന്നത്. ചിലപ്പോള്‍ വീണ്ടും നിറയ്ക്കുന്ന വെള്ളം ക്ലോറിനടങ്ങിയതുമായിരിക്കാം. ഉള്ള വെള്ളം തന്നെ വൃത്തിയാക്കുന്നതാണ് ഏറ്റവും നല്ല വഴി.

ആദ്യം മീനുകളെ ഫിഷ് ടാങ്കില്‍ നിന്ന് ഒരു ബക്കറ്റിലെ വെള്ളത്തിലേക്കു മാറ്റാം.

ഫിഷ് ടാങ്കിന്റെ വശങ്ങളില്‍ പറ്റിയിരിക്കുന്ന പായല്‍ ആല്‍ഗെ പാഡ് ഉപയോഗിച്ച് വൃത്തിയാക്കാം. ഇതിനുള്ളിലെ വെള്ളാരംകല്ലുകളും മറ്റ് അലങ്കാര വസ്തുക്കളും പുറത്തെടുത്ത്് വൃത്തിയായി കഴുകി വഴുക്കല്‍ മാറ്റണം. ഫിഷ് ടാങ്കിലെ ഭക്ഷണ അവശിഷ്ടങ്ങളും വിസര്‍ജ്യ വസ്തുക്കളും മാറ്റണം.

ഫിഷ് ടാങ്കിലേക്ക് വെള്ളമെത്തുന്ന പൈപ്പുകളും മറ്റും വൃത്തിയാക്കേണ്ടത് അത്യാവശ്യമാണ്. ടാങ്കിനുളളിലെ എല്ലാ സാധനങ്ങളും പുറത്തെടുത്ത് മാറ്റാന്‍ സാധിക്കുന്നതാണെങ്കില്‍ ചൂടുവെള്ളമൊഴിച്ച് ടാങ്ക് കഴുകുന്നത് നല്ലതാണ്.

വീര്യം കുറഞ്ഞ അണുനാശിനി ഉപയോഗിച്ച് വേണമെങ്കില്‍ ഫിഷ് ടാങ്ക് വൃത്തിയാക്കാം. ഇത് ചീത്ത ബാക്ടീരിയകള്‍ വളരുന്നത് തടയും. അണുനാശിനി നല്ലപോലെ കഴുകിക്കളയുകയും വേണം.

പായല്‍ ഫിഷ് ടാങ്കിന്റെ അരികില്‍ പറ്റിപ്പിടിച്ചാല്‍ എളുപ്പം പോകില്ല. റേസറോ മറ്റോ ഉപയോഗിച്ച് ഇവ ഉരച്ചുകഴുകേണ്ടി വരും.

വൃത്തിയാക്കിയ ശേഷം ഫിഷ് ടാങ്കിലേക്ക് വെള്ളമൊഴിച്ച് മത്സ്യങ്ങളെ തിരിച്ചിടാം.