സോഫാകവറുകള്‍ വൃത്തിയാക്കാം

Improvement

oi-Saritha

By Veena

Published: Monday, October 10, 2011, 16:07 [IST]

വീട്ടില്‍ എപ്പോഴും ഉപയോഗിക്കുന്ന ഒരു ഫര്‍ണിച്ചറാണ് സോഫ. അതുകൊണ്ടുതന്നെ ഏറ്റവും കൂടുതല്‍ വൃത്തികേടാകുകയും ചെയ്യും. സോഫയുടെ കവര്‍ ഇടയ്ക്കിടെ കഴുകുകയാണ് ഇതിനുള്ള പരിഹാരം.
സോഫയുടെ കവര്‍ കഴുകുന്നതിന് മുന്‍പുതന്നെ അതിന്റെ ലേബലില്‍ എഴുതിയിരിക്കുന്ന നിര്‍ദേശങ്ങള്‍ ശ്രദ്ധയോടെ വായിക്കണം. ചില കവറുകള്‍ ഡ്രൈക്ലീന്‍ മാത്രം ചെയ്യാന്‍ പറ്റുന്നവയുണ്ടാകും. ചിലവയാകട്ടെ തണുത്ത വെള്ളത്തില്‍ മാത്രമോ ചൂടുവെള്ളത്തില്‍ മാത്രമോ കഴുകാവുന്നതു. നിര്‍ദേശമനുസരിച്ചില്ലെങ്കില്‍ കവര്‍ പെട്ടെന്ന് കേടാകും.

ആദ്യമായി സോഫ കവര്‍ കഴുകുകയാണെങ്കില്‍ കവറിന്റെ ഒരു ചെറിയ കഷണം പരീക്ഷണാടിസ്ഥാനത്തില്‍ സോപ്പുവെള്ളത്തിലിട്ട് കഴുകി ഉണക്കിയെടുക്കണം. നിറം പോകുകയോ മങ്ങുകയോ ചെയ്യുമോയെന്ന് മനസിലാക്കാം.

സോപ്പുവെളളത്തില്‍ 20-30 മിനിറ്റ് മുക്കിവച്ച ശേഷം കവര്‍ കഴുകിയാല്‍ അഴുക്കു മുഴുവന്‍ പോയിക്കിട്ടും. വാഷിംഗ് മെഷീനിലിട്ടാണ് കഴുകുന്നതെങ്കില്‍ മൃദുവായി കഴുകാനുളള രീതിയില്‍ മെഷീന്റെ പ്രവര്‍ത്തനം ക്രമീകരിക്കുക. കൈകൊണ്ടാണ് കഴുകുന്നതെങ്കില്‍ ബ്രഷ് കൊണ്ട് ഉരയ്ക്കുന്നത് ഒഴിവാക്കുക. ഇങ്ങനെ ചെയ്താല്‍ തുണിയില്‍ നൂലു പൊന്തും.

ഉണങ്ങിയ ശേഷം ഇസ്തിരിയിടുവാന്‍ പറ്റുന്ന തുണിയാണെങ്കില്‍ ഇസ്തിരിയിടുക. ഇത് കവര്‍ കൂടുതല്‍ വൃത്തിയായിരിക്കാനും അണുക്കളെ നശിപ്പിക്കാനും സഹായിക്കും.

സോഫാകവര്‍ വൃത്തിയാക്കാനോ സോഫയില്‍ നിന്ന് ഊരിയെടുക്കാനോ ബുദ്ധിമുട്ടുള്ളതാണെങ്കില്‍ തുണിക്കുപയോഗിക്കുന്ന ഷാംപൂ ഉപയോഗിച്ച് വൃത്തിയാക്കാം. കറയോ ചെളിയോ ഉള്ള ഭാഗത്ത് അല്‍പം ഷാംപൂ തളിച്ച ശേഷം കോട്ടന്‍ തുണി ഉപയോഗിച്ച് തുടയ്ക്കാം. കുഷ്യന്‍ കവറുകളും ഈ രീതിയില്‍ വൃത്തിയാക്കാം.

സോഫ വാക്വം ക്ലീനറുപയോഗിച്ച് പൊടി വലിച്ചെടുത്ത് വൃത്തിയാക്കാം. ഊരിയെടുക്കാന്‍ കഴിയാത്ത സോഫാകവറുകളിലെ പൊടിയും ഈ രീതിയില്‍ നീക്കാം.