തുണിയിലെ കറ കളയാന്‍ ചെറുനാരങ്ങ

വസ്ത്രത്തില്‍ കറയായാല്‍ പിന്നീട് കഴുകാമെന്ന് കരുതി വച്ചേക്കരുത്. ഒരു തുണിയോ ടിഷ്യൂ പേപ്പറോ നനച്ച് ആ ഭാഗം ഉടനടി തുടയ്ക്കണം. കറ ഉണങ്ങിപ്പിടിച്ചാല്‍ പിന്നെ പോകാന്‍ ബുദ്ധിമുട്ടാകൂം.

കറ പറ്റിയ ഭാഗത്ത് വെള്ളത്തില്‍ സോപ്പുപൊടി കലക്കിയോ, ലിക്വിഡ് ഒഴിച്ചോ അഞ്ചു മിനിറ്റ് വക്കുക. പിന്നീട് കഴുകിയാല്‍ ഇത് എളുപ്പം പോകും.

ചൂടുവെള്ളത്തില്‍ ബേക്കിംഗ് സോഡയിട്ട് അതില്‍ തുണി മുക്കി അരമണിക്കാര്‍ കഴിഞ്ഞ് കഴുകാം. കറ പോകും. ഇതിന് ശേഷവും കറ പോയിട്ടില്ലെങ്കില്‍ ചൂടുവെള്ളത്തില്‍ സോപ്പുപൊടിയിട്ട് തുണി മുക്കിവച്ച് കഴുകിയെടുക്കാം. എന്നാല്‍ എല്ലാതരം തുണികളും ചൂടുവെള്ളത്തില്‍ കഴുകുവാന്‍ പറ്റില്ലെന്ന് ഓര്‍ത്തിരിക്കണം.

കഴുകിയിട്ടും കറയുടെ പാട് പോയിട്ടില്ലെങ്കില്‍ അല്‍പം സോഡാക്കാരം ഈ ഭാഗത്തിട്ട് ഉരസുന്നത് നല്ലതാണ്.

ചെറുനാരങ്ങ കറ കളയുവാന്‍ പറ്റിയ ഒന്നാണ്. തുണി കഴുകിയ ശേഷം ആ ഭാഗത്ത് ഒരു കഷ്ണം ചെറുനാരങ്ങ കൊണ്ട് ഉരക്കുക. വേണമെങ്കില്‍ നാരങ്ങയുടെ കൂടെ അല്‍പം ഉപ്പും കറ പറ്റിയ ഭാഗത്തിടാം. കറ പോയിക്കിട്ടും.

ചിലപ്പോള്‍ ഒരു തവണ ചെറുനാരങ്ങ ഉപയോഗിച്ചാല്‍ കറ പോകണമെന്നില്ല. വീണ്ടും വീണ്ടും ഇതാവര്‍ത്തിച്ചാല്‍ തീര്‍ച്ചയായും പ്രയോജനമുണ്ടാകും.