തുറന്ന അടുക്കളയുടെ പോരായ്മകള്‍

1. സുരക്ഷ

ആഹാരം പാകം ചെയ്യുകയും, ഭക്ഷണസാധനങ്ങള്‍ സൂക്ഷിക്കുകയും ചെയ്യുന്ന സ്ഥലമാണ് അടുക്കള. വീട്ടില്‍ കുട്ടികളില്ലെങ്കില്‍ ഇക്കാര്യത്തില്‍ നിങ്ങള്‍ക്ക് അല്പം ഉദാസീനതയാവാം.എന്നാല്‍ കുട്ടികളുണ്ടെങ്കില്‍ ചില മുന്‍കരുതലുകളെടുക്കേണ്ടതുണ്ട്. കുട്ടികള്‍ അലമാരയില്‍ വലിഞ്ഞ് കയറാനും, പാത്രങ്ങളും മറ്റും മറിച്ചിടാനും സാധ്യതയുണ്ട്. ഇത് അടച്ചുറപ്പില്ലാത്തതിനാല്‍ സംഭവിക്കുന്നതാണ്. തുറന്ന അടുക്കളയുടെ ഒരു പ്രധാന ദോഷമായി ഇതിനെ കാണാം.

2. സ്ഥലപരിമിതി

തുറന്ന ആടുക്കളകള്‍ക്ക് ആവശ്യത്തിന് സ്ഥലസൗകര്യം ഉണ്ടാകാന്‍ സാധ്യത കുറവാണ്. ക്യാബിനെറ്റുകള്‍ ഏറെ അറകളും, വാതിലുകളുമുള്ളവയാണ്. എന്നാല്‍ തുറന്ന അടുക്കളയില്‍ അലമാരകള്‍ ഇത്തരത്തിലുള്ളവയാകില്ല. തുറന്ന അലമാരകള്‍ ഏളുപ്പത്തില്‍ സ്ഥാപിക്കാമെങ്കിലും അവയുടെ സ്ഥലപരിമിതി ഒരു പ്രശ്നമാണ്. അടുക്കളയിലെ സാധനങ്ങള്‍ സൂക്ഷിക്കാന്‍ ഇവിടെ സ്ഥലം മതിയാകുകയുമില്ല.

3. ശുചിത്വം

അടുക്കളയില്‍ പതിവായി ഉപയോഗിക്കാത്ത സാധനങ്ങളില്‍ പൊടിയും അഴുക്കും അടിഞ്ഞ് കൂടുന്നതിനെപ്പറ്റി നിങ്ങള്‍ ചിന്തിച്ചിട്ടുണ്ടോ? തുറന്ന അടുക്കളയില്‍ അലമാരക്ക് പൊടിയെ തടഞ്ഞ് നിര്‍ത്താന്‍ യാതൊരുവിധ മറകളുമില്ല. അതിനാല്‍ തന്നെ രോഗാണുക്കളും ഇവിടേക്ക് എളുപ്പത്തില്‍ കടന്ന് വരും. തുറന്ന അടുക്കളയുടെ ഒരു പ്രധാന പോരായ്മയായി ഇതിനെ കാണാം.

4. അടുക്കും ചിട്ടയും

തിരക്കേറിയ ഇന്നത്തെ ജീവിതത്തില്‍, ഉപയോഗിക്കുന്ന സാധനങ്ങള്‍ കൃത്യമായി അടുക്കും ചിട്ടയുമായി വെയ്ക്കുക എന്നത് പ്രയാസമുള്ള കാര്യമാണ്. ഇത് തുറന്ന അടുക്കളയില്‍ ഒരു പ്രധാന പ്രശ്നമായി വരും. കാബിനുകളില്‍ ക്യത്യമായി അടുക്കളസാധനങ്ങള്‍ അടുക്കിയും ക്രമീകരിച്ചും വെയ്ക്കാനാവും. എന്നാല്‍ തുറന്ന അടുക്കളയില്‍ ഇവ വാരിവലിച്ചിട്ടിരിക്കുന്ന പ്രതീതിയാണ് ഉളവാക്കുക.

5.വൃത്തി

തുറന്ന അന്തരീക്ഷത്തില്‍ പാത്രങ്ങളില്‍ അമിതമായി പൊടി പുരളാനിടയാകും. ഇത് നിങ്ങള്‍ക്ക് അസ്വസ്ഥതയുണ്ടാക്കിയേക്കാം. അതോടൊപ്പം പാത്രങ്ങളെല്ലാം സ്ഥിരമായി കഴുകി വൃത്തിയാക്കേണ്ടി വരുന്നത് ഏറെ സമയവും നഷ്ടമാക്കും.

6. ശ്രദ്ധ

അലമാരകള്‍ തുറന്നതായതിനാല്‍ വീട്ടില്‍ കുട്ടികളുണ്ടെങ്കില്‍ അവര്‍ അവിടെ നിന്ന് പാത്രങ്ങളും, കത്തിയുമൊക്കെയെടുത്ത് കളിക്കാനും അപകടമുണ്ടാകാനും ഇടയാകും. അതിനാല്‍ തന്നെ ഏറെ ശ്രദ്ധ ഇക്കാര്യത്തില്‍ ചെലുത്തേണ്ടി വരും.