ദീപാവലിക്ക് വാസ്തുവും പ്രധാനം

വീട് വൃത്തിയാക്കുന്നത് തന്നെ പ്രധാനം. അലങ്കോലപ്പെട്ടു കിടക്കുന്ന വീട്ടില്‍ ഐശ്വര്യം വരില്ലെന്ന് പഴമക്കാര്‍ മുതല്‍ പറഞ്ഞു വരുന്ന കാര്യം. ദീപത്തിന്റെ പ്രകാശവും പൊസറ്റീവ് എനര്‍ജിയും വീട്ടില്‍ നിറയണമെങ്കില്‍ വീട് വൃത്തിയായിരിക്കുക തന്നെ വേണം.

പൂജാമുറി ഭംഗിയായി അലങ്കരിക്കുക. വിഗ്രഹങ്ങളും ഫോട്ടോകളുമെല്ലാം യാഥാസ്ഥാനത്തു വയ്ക്കുക. വടക്കുകിഴക്കു ഭാഗത്തായി വിഗ്രഹങ്ങള്‍ വയ്ക്കുന്നതാണ് നല്ലത്. കലശം പൂജാമുറിയില്‍ വയ്ക്കുന്ന പതിവ് പലര്‍ക്കുമുണ്ട്. ഇത് കിഴക്കു ഭാഗത്തായി വയ്ക്കുന്നതായിരിക്കും നല്ലത്.

ദീപാവലിയ്ക്ക് പുതിയ സാധനങ്ങള്‍ വാങ്ങുന്ന പതിവ് പലയിടത്തുമുണ്ട്. ഇതിന്റെ ആവശ്യമില്ല. ഉള്ള സാധനങ്ങള്‍ വൃത്തിയാക്കുക. ഇത് അങ്ങോട്ടുമിങ്ങോട്ടും മാറ്റിയിടുന്നതും വളരെ നല്ലതു തന്നെ.

വീടിന്റെ വടക്കുസ്ഥാനമാണ് കുബേരസ്ഥാനമായി പറയുന്നത്. ലക്ഷ്മിദേവിയും വിഗ്രഹമോ ഫോട്ടോയോ ഇവിടെ വയ്ക്കുന്നത് നന്നായിരിക്കും. ശാസ്ത്രമനുസരിച്ച് ലക്ഷ്മിയുടെ വലതുഭാഗത്ത് ഗണേശവിഗ്രഹവും ഇടതുവശത്ത് സരസ്വതീദേവിയുടെ രൂപവും വയ്ക്കാം.

വീടിന്റെ മുന്‍വാതിലിന് വാസ്തുപ്രകാരം വളരെ പ്രാധാന്യമുണ്ട്. വാതില്‍ പൂര്‍ണമായി തുറന്നിടുക. വാതിലിനു പുറത്ത് രംഗോളിയിടുക, തോരണങ്ങള്‍ തൂക്കുക എന്നിവയും നല്ലതു തന്നെ.

ചിരാതുകള്‍ക്കൊപ്പം മധുരത്തിന്റെ ഉത്സവമാണ് ദീപാവലിയെന്നു പറയും. മധുരപലഹാരങ്ങള്‍ അല്‍പമെങ്കിലും സൂക്ഷിക്കുക. അമിതമായി കഴിയ്ക്കരുതെന്നു മാത്രം.

സാമ്പ്രാണി പുകയ്ക്കുന്നതു നന്നായിരിക്കും. വീട്ടിലുള്ള നെഗറ്റീവ് ഊര്‍ജം പുറത്തുവിടാന്‍ ഇത് സഹായിക്കും. ഇതുപോലെ വീട്ടില്‍ എല്ലായിടത്തും ഉപ്പുവെള്ളം തളിയ്ക്കുന്നതും നല്ലതു തന്നെ. ഇതും നെഗറ്റീവ് എനര്‍ജി കളയാന്‍ സഹായിക്കും.