മരത്തിന്റെ ഡ്രസിംഗ് ടേബിള്‍ കൂടുതല്‍ നല്ലത്

ഒരു ഡ്രസിംഗ് ടേബിള്‍ തെരഞ്ഞെടുക്കുമ്പോള്‍ ആദ്യം എവിടെയിടുന്നു എന്നത് പ്രധാനമാണ്. മിക്കവാറും ബെഡ്‌റൂമുകളിലായിരിക്കും ഇതിന്റെ സ്ഥാനം. ഡ്രസിംഗ് ടേബിള്‍ വയ്ക്കാന്‍ ഉദ്ദേശമുണ്ടെങ്കില്‍ മുറി പണിയുമ്പോള്‍ തന്നെ ഇതിന് വേണ്ടി സ്ഥലം ഒഴിച്ചിടുന്നത് നന്നായിരിക്കും. ജനലിനോട് ചേര്‍ന്ന് മേശയിട്ടാല്‍ നല്ല വെളിച്ചം ലഭിക്കും.

ചിലപ്പോള്‍ ഡ്രസിംഗ് ടേബിള്‍ ചുവരിനോട് ചേര്‍ന്ന് പണിയുകയായിരിക്കും ചെയ്യുന്നത്. മറ്റു ചിലര്‍ ഇത് പുറത്തു നിന്നും വാങ്ങിക്കാറുമുണ്ട്. എങ്ങനെയായാലും കസേരയുള്ളത് നോക്കി വാങ്ങുന്നതായിരിക്കും നല്ലത്. പണിയുകയാണെങ്കില്‍ ഇതിന് ചേര്‍ന്ന കസേര വാങ്ങുകയോ പണിയിപ്പിക്കുകയോ ചെയ്യാം. ഉയരം പ്രധാനമാണ്. ഒരുങ്ങാനിരിക്കുമ്പോള്‍ ബുദ്ധിമുട്ടുണ്ടാക്കാത്ത വിധത്തിലുള്ള കസേര നോക്കി വാങ്ങണം. ടേബിളിലന്റെ അടിയിലേക്ക് നിരക്കി നീക്കിയിടാവുന്ന സ്റ്റൂളുകളും നല്ലതാണ്. സ്ഥലം പോകില്ലെന്നുള്ളതാണ് ഇതിന്റെ ഗുണം.

നല്ല പ്രകാശം ലഭിക്കുന്ന സ്ഥലത്ത് ടേബിളിട്ടാല്‍ നല്ലത്. കണ്ണാടിയുടെ വശങ്ങളില്‍ ചെറിയ ലൈറ്റുകള്‍ പിടിപ്പിച്ചതാണെങ്കില്‍ കൂടുതല്‍ നല്ലത്. അല്ലെങ്കില്‍ മുഖം വ്യക്തമായി കാണാവുന്ന വിധത്തിലുള്ള ലൈറ്റ് ചുവരില്‍ പിടിപ്പിക്കണം.

ഗ്ലാസ്, മാര്‍ബിള്‍ തുടങ്ങിയ പലവിധ ഡ്രസിംഗ് ടേബിളുകളും ലഭ്യമാണ്. എന്നാല്‍ ഇതേക്കാളെല്ലാം നല്ലത് മരത്തിന്റെ മേശ തന്നെയാണ്. ഇത് സൂക്ഷിക്കാന്‍ എളുപ്പമാണ്. വിലയും മറ്റുള്ളവയേക്കാള്‍ കുറവാണ്.

ഡ്രസിംഗ് ടേബിളിന്റെ കണ്ണാടി നീളത്തിലുള്ളതാകുന്നതാണ് നല്ലത്. ഇത് പ്രതിബിംബം ശരിയ്ക്കും കാണാന്‍ സഹായിക്കും.