കുഞ്ഞുങ്ങളുടെ മുറി ഭംഗിയായി അലങ്കരിക്കാം

Decor

oi-Saritha

By Veena

Published: Wednesday, October 19, 2011, 14:30 [IST]

കുഞ്ഞുങ്ങളുടെ മുറി ഭംഗിയായി അലങ്കരിക്കുകയെന്നത് ഏതൊരു മാതാപിതാക്കളുടേയും സ്വപ്‌നമാണ്. എന്നാല്‍ ഇതിനു വേണ്ടി വരുന്ന സാമ്പത്തികമോര്‍ത്ത് മിക്കവാറും പേര്‍ ഇതില്‍ നിന്ന് പിന്‍തിരിയുകയാണ് പതിവ്. ചെലവു കുറഞ്ഞ രീതിയില്‍ കുഞ്ഞുങ്ങളുടെ മുറി അലങ്കരിക്കുന്നത് എങ്ങനെയെന്നു നോക്കാം

കുഞ്ഞുങ്ങളുടെ മുറിക്ക് നല്ല നിറങ്ങളുള്ള പെയിന്റുകള്‍ തെരഞ്ഞെടുക്കണം. ഒന്നിലേറെ നിറങ്ങള്‍ തെരഞ്ഞെടുക്കുന്നതും നല്ലതാണ്. കാര്‍ട്ടൂണ്‍ ചിത്രങ്ങളും കാര്‍ട്ടൂണ്‍ കഥാപാത്രങ്ങളുടെ ചിത്രങ്ങളുള്ള സാധനങ്ങളും ഈ മുറിയിലേക്ക് വാങ്ങുക. കുഞ്ഞിനുള്ള കളിപ്പാട്ടങ്ങളും ഈ മുറിയില്‍ സൂക്ഷിക്കാന്‍ മറക്കരുത്.

മുറിയുടെ ചുവരുകളില്‍ കുഞ്ഞുങ്ങള്‍ക്കിഷ്ടമുള്ള ചിത്രങ്ങള്‍ വരച്ചുചേര്‍ക്കുന്നതും നല്ലതാണ്. ഇത് നിങ്ങള്‍ക്കു തന്നെ ചെയ്യാവുന്നതേയുള്ളൂ. ഇത്തരം ചിത്രങ്ങള്‍ കുഞ്ഞിന്റെ ശ്രദ്ധ ആകര്‍ഷിക്കുകയും ചെയ്യും. മുറിയുടെ സീലിംഗില്‍ സൂര്യന്‍, ചന്ദ്രന്‍, നക്ഷത്രങ്ങള്‍ എന്നീ ചിത്രങ്ങളും വരയ്ക്കാം. ചുവരില്‍ ഒട്ടിക്കാന്‍ സാധിക്കുന്ന തിളക്കമുള്ള ചിത്രങ്ങള്‍ ഇപ്പോള്‍ വിപണിയില്‍ ലഭ്യമാണ്. ഇവയ്ക്ക് ന്യായമായ വിലയേയുളളൂ.

കുഞ്ഞിന്റെ കൈപ്പത്തിയുടെ അടയാളം ചുവരില്‍ പതിപ്പിക്കുന്നതും കൈപ്പത്തിയുടെ പടം വരയ്ക്കുന്നതും വ്യത്യസ്തമായ അലങ്കാരരീതിയാണ്.

തെര്‍മോകോള്‍ വാങ്ങി സൂര്യന്‍, നക്ഷത്രങ്ങള്‍, പക്ഷികള്‍ തുടങ്ങിയവയുടെ രൂപം വെട്ടിയെടുത്ത് ഇവയില്‍ നിറം പിടിപ്പിച്ച് മുറിയില്‍ തൂക്കിയിടാം. കുഞ്ഞുങ്ങള്‍ക്കിത് നോക്കിക്കിടക്കുന്നത് ഇഷ്ടമായിരിക്കും.

കുഞ്ഞിന്റെ തൊട്ടിലിനു മുകളിലും കളിപ്പാട്ടങ്ങള്‍ തൂക്കിയിടാം. തൊട്ടിലിന് മുന്‍പിലായി ഒരു ചെറിയ കസേരയില്‍ പാവകളെയോ കളിപ്പാട്ടങ്ങളേയോ കുഞ്ഞിന് കാണാവുന്ന വിധത്തില്‍ വയ്ക്കുക.

വര്‍ണക്കടലാസുകള്‍ വാങ്ങി കുഞ്ഞിന്റെ മുറിയിലെ സാധനങ്ങള്‍ പൊതിയുന്നത് നന്നായിരിക്കും. കുഞ്ഞിന്റെ വലിയൊരു ഫോട്ടോ ഫ്രെയിം ചെയ്ത് ചുവരില്‍ തൂക്കാം.