അടുക്കളക്ക് ചുവപ്പുനിറം ഭംഗി

Decor

oi-Saritha

By Veena

Published: Tuesday, October 4, 2011, 14:07 [IST]

ചുവപ്പ് സ്‌നേഹത്തിന്റെയും ദേഷ്യത്തിന്റെയും നിറമാണ്. വാസ്തുപ്രകാരം കിടപ്പുമുറികളില്‍ ചുവപ്പു പെയ്ന്റ് അടിക്കരുത്. നിങ്ങളുടെ ഉള്ളിലെ ദേഷ്യം ഇതു പുറത്തുകൊണ്ടുവരുമെന്നുള്ളതു കൊണ്ടാണിത്. വിശപ്പിന്റെയും നിറമാണ് ചുവപ്പ്. പ്രമുഖ ഭക്ഷ്യസ്ഥാപനങ്ങളായ മാക് ഡോണാര്‍ഡ്‌സ്, കെഎഫ്‌സി, പിസ ഹട്ട് തുടങ്ങിയയുടെ ലോഗോയില്‍ത്തന്നെ ചുവപ്പുനിറമുണ്ട്.

വിശപ്പിന്റെ നിറമായതു കൊണ്ട് അടുക്കളക്ക് ചുവപ്പുനിറം ഏറ്റവും ഉചിതമാണ്. എന്നാല്‍ എടുത്തുകാണിക്കുന്ന നിറമായതുകൊണ്ട് പലരും അടുക്കളക്ക് ഈ നിറം കൊടുക്കാറില്ല. പെയിന്റടിക്കാതെ തന്നെ അടുക്കളക്ക് ചുവപ്പു നല്‍കാന്‍ പറ്റിയ മാര്‍ഗങ്ങളുണ്ട്.

അടുക്കളയില്‍ ടൈലാണ് ഇടുന്നതെങ്കില്‍ ചുവപ്പുനിറമുളള ടൈലുകളിടാം. തറയില്‍ മാത്രമല്ലാ, അടുക്കളയിലെ സ്ലാബുകള്‍ക്കു മുകളിലും കറുപ്പിനു പകരം ചുവന്ന നിറമുളള കല്ലുകളിടാം. സ്ലാബുകള്‍ക്കു മുകളിലായി ചുവരില്‍ ഒട്ടിക്കുന്ന ടൈലുകള്‍ക്ക് ചുവന്ന നിറം തെരഞ്ഞെടുക്കാം. ചുവപ്പിന്റെ തീക്ഷ്ണത കുറക്കാന്‍ ആവശ്യമെങ്കില്‍ വെളുത്ത ടൈലുകള്‍ ഇടകലര്‍ത്തിക്കൊടുക്കാം. അടുക്കളയിലെ അലമാരകള്‍ക്ക് ചുവപ്പു നിറം നല്‍കാം.

വേണമെങ്കില്‍ ചുവരില്‍ ചുവന്ന നിറമുള്ള വാള്‍പേപ്പറൊട്ടിക്കാം. ആവശ്യാനുസരണം മാറ്റാമെന്നതും വില കുറവാണെന്നതു വാള്‍പേപ്പറിന്റെ ഗുണങ്ങളാണ്.

അടുക്കളയിലെ പാത്രങ്ങള്‍ക്കു വേണമെങ്കില്‍ ചുവപ്പുനിറം നല്‍കാം. പ്രത്യേകിച്ചും മൈക്രോവേവ് അവനില്‍ ഉപയോഗിക്കുന്ന പാത്രങ്ങള്‍. അടുക്കളയിലെ വെള്ളമെടുക്കാനുപയോഗിക്കുന്ന ജഗ്ഗും ഗ്ലാസുകളും ചുവപ്പുനിറമുളളവയാണെങ്കില്‍ ഭംഗിയുമുണ്ടാകും.

ഊണ്‍മേശയിലിടുന്ന തുണി ചുവന്ന നിറത്തിലെടുക്കാം. ടേബിള്‍മാറ്റുകളും ചുവന്ന നിറത്തിലുള്ളത് തെരഞ്ഞെടുക്കാം.

ചുവപ്പു നിറം അടുക്കളയിലുപയോഗിക്കുന്നതുകൊണ്ട് മറ്റൊരു പ്രയോജനം കൂടിയുണ്ട്. പാറ്റകളെ അകററാന്‍ ചുവപ്പുനിറം സഹായിക്കും.