അതിഥിമുറി അലങ്കരിക്കാം

സാധാരണയായി മറ്റു മുറികളേക്കാള്‍ ചെറുതായിരിക്കും അതിഥിമുറി. അതുകൊണ്ട് സ്ഥലം പാഴാക്കാത്ത വിധത്തിലുളള ഫര്‍ണിച്ചറുകള്‍ തെരഞ്ഞെടുക്കാന്‍ ശ്രദ്ധിക്കണം. വലിയ കട്ടിലുകള്‍ക്കു പകരം സോഫാസെറ്റോ മടക്കിവയ്ക്കാവുന്ന വിധത്തിലുള്ള കട്ടിലുകളോ ഇവിടെ ഉപയോഗിക്കാം. സോഫാം കം ബെഡ് ഇവിടെ യോജിക്കുന്ന ഒരു സങ്കല്‍പമാണ്.

എപ്പോഴും ഉപയോഗിക്കാത്ത മുറിയായതു കൊണ്ട് അലങ്കാരവസ്തുക്കള്‍ അധികം ഇവിടെ വയ്‌ക്കേണ്ടതില്ല. വെളള നിറം പെട്ടെന്ന് അഴുക്കാവുമെന്നത് കൊണ്ട് അതിഥിമുറിയില്‍ വെളളനിറം കഴിവതും കുറവ് ഉപയോഗിക്കുക. ചുവരുകള്‍ക്കും വെള്ളനിറം കൊടുക്കാതിരിക്കുക.

അതിഥിമുറിയിലേക്കുള്ള ലൈറ്റുകള്‍ തെരഞ്ഞെടുക്കുമ്പോഴും ശ്രദ്ധിക്കണം. ലൈറ്റുകള്‍ ഉപയോഗിക്കാതെ ബെഡ്്‌ലാംപുകളോ ഷേഡുള്ള തരം ലൈറ്റുകളോ തെരഞ്ഞെടുക്കണം. ചുവരിന്റെ നിറത്തിനു ചേരുന്ന ലൈറ്റുകള്‍ തെരഞ്ഞെടുക്കണം.

ഭംഗിയുള്ള ലളിതമായ പൂപ്പാത്രങ്ങളോ പൂക്കളോ അതിഥി മുറിയില്‍ വയ്ക്കാം. ചുവരുകളില്‍ പെയിന്റിംഗുകളും തൂക്കാം.

കുളിമുറി അതിഥിമുറിയോടു ചേര്‍ത്തുണ്ടാക്കാന്‍ ശ്രമിക്കണം. ബക്കറ്റ്, സോപ്പ്, ഷാംപൂ, ടവല്‍ തുടങ്ങിയവയും കുളിമുറിയില്‍ സൂക്ഷിക്കണം.

മുറി അലങ്കരിക്കുമ്പോള്‍ അലങ്കാരത്തേക്കാളെറെ സൗകര്യത്തിനാണ് മുന്‍ഗണന നല്‍കേണ്ടത്. പണം ചെലവാക്കിയിട്ടും അതിഥികള്‍ക്ക് ആവശ്യമുള്ള സൗകര്യങ്ങളില്ലെങ്കില്‍ അതിഥിമുറിക്കു തന്നെ പ്രസക്തിയില്ലാതാകും. മുറി എപ്പോഴും വൃത്തിയായിരിക്കുകയും വേണം.