വിസ്ഡം ടൂത്ത് വേദനിപ്പിയ്ക്കാതിരിയ്ക്കാന്‍....

Published: Thursday, September 1, 2016, 15:33 [IST]

വിസ്ഡം ടൂത്ത് മിക്കവാറും പേര്‍ക്കു വേദനയുണ്ടാക്കുന്ന ഒന്നാണ്. ഇത് വരുമ്പോള്‍ തന്നെ പലരും നീക്കം ചെയ്യുന്നതിനു കാരണവും ഇതു തന്നെ.

പെയിന്‍ കില്ലറുകളാണ് പലരും ഇതിനുള്ള പ്രതിവിധിയായി കാണുന്നത്. എന്നാല്‍ ഇത് ആരോഗ്യകരമായ മാര്‍ഗമല്ലെന്നു പറയേണ്ടതില്ലല്ലോ, കാരണം പെയിന്‍ കില്ലറുകള്‍ പാര്‍ശ്വഫലങ്ങള്‍ ഏറെയുണ്ടാക്കും.

വിസ്ഡം പല്ലിന്റെ വേദനയൊഴിവാക്കാന്‍ വീട്ടുവൈദ്യങ്ങളുണ്ട്. ഇവ പ രീക്ഷിച്ചു നോക്കൂ,

ഗ്രാമ്പൂ ഓയില്‍

ഗ്രാമ്പൂ ഓയില്‍ ഇതിനു പറ്റിയ നല്ലൊരു വഴിയാണ്. ഗ്രാമ്പൂ ഓയിലില്‍ പഞ്ഞി മുക്കി വേദനയുള്ളിടത്തു വയ്ക്കാം. ഗ്രാമ്പൂ കടിച്ചു പിടിയ്ക്കുന്നതും ഗുണം ചെയ്യും.

ഉപ്പ്, കുരുമുളകുപൊടി

ഉപ്പ്, കുരുമുളകുപൊടി, അല്‍പം വെള്ളം എന്നിവ ചേര്‍ത്തു പേസ്റ്റാക്കുക. ഇത് വേദനയുള്ളിടത്തു വയ്ക്കാം. ഉപ്പുവെള്ളം കവിള്‍ക്കൊള്ളുന്നതും നല്ലതാണ്.

വെളുത്തുള്ളി

വെളുത്തുള്ളി, ബ്ലാക്ക് സാള്‍ട്ട് എന്നിവ ചതച്ച് വേദനയുള്ളിടത്തു വയ്ക്കുന്നതു നല്ലതാണ്. വെളുത്തുള്ളി മാത്രം ചതച്ചു വച്ചാലും നല്ലതാണ്.

പച്ചസവാള

വേദനയുള്ളിടത്ത് വച്ചു പച്ചസവാള കടിച്ചു തിന്നുക. ഇതും പല്ലുവേദന കുറയാന്‍ സഹായിക്കും.

പേരയില

പേരയിലയിലെ ക്വര്‍സെറ്റിന്‍ നല്ലൊരു വേദനസംഹാരിയാണ്. പേരയില വെള്ളത്തിലിട്ടു തിളപ്പിച്ച് ഈ വെള്ളം കവിള്‍ക്കൊള്ളാം. പേരയില വായിലിട്ടു ചവച്ചരയ്ക്കുന്നതും നല്ലതാണ്.