ആരോഗ്യം നിലനിര്‍ത്താനുള്ള യോഗാസനങ്ങള്‍

By Sruthi K M

Updated: Tuesday, June 16, 2015, 17:16 [IST]

കൃത്യമായ ശ്വാസോച്ഛ്വാസ ക്രമീകരണത്തിലൂടെ പരിശീലിക്കുന്ന വ്യായാമമുറയാണ് യോഗ. ശരീരപ്രകൃതിക്ക് അനുസരിച്ചുള്ള യോഗാസനങ്ങള്‍ പരിശീലിക്കുന്നതിലൂടെ ഓരോ കോശങ്ങളിലും കൃത്യമായി പ്രാണവായു പ്രവേശിച്ച് അവ ആരോഗ്യപൂര്‍ണമാകുന്നു. അന്താരാഷ്ട്ര യോഗാ ദിനത്തിന്റെ ഭാഗമായി യോഗാസനങ്ങളുടെ പ്രാധാന്യത്തെക്കുറിച്ചും അവ ജീവിതത്തില്‍ കൊണ്ടുവരേണ്ടതിന്റെ ആവശ്യകതയെക്കുറിച്ചും ചര്‍ച്ചചെയ്യേണ്ടിയിരിക്കുന്നു.

ഹൃദയാരോഗ്യത്തിന് ചില യോഗാസനങ്ങള്‍..

ശരീരഭാഗങ്ങളില്‍ അനാവശ്യമായി അടിഞ്ഞുകൂടുന്ന കൊഴുപ്പ് ഇല്ലാതാക്കി ശരീരഘടനക്കനുസരിച്ച് മാംസപേശികള്‍ രൂപപ്പെടുത്താന്‍ യോഗയിലൂടെ സാധിക്കും. മാത്രമല്ല മറ്റനേകം ഗുണങ്ങളും യോഗയ്ക്കുണ്ട്. നാഡീവ്യൂഹങ്ങള്‍ ശരിയായി സംരക്ഷിക്കപ്പെടുന്നതുവഴി ശരീരത്തിലെ രക്തസഞ്ചാരം ക്രമീകരിക്കപ്പെടുന്നു.

ഇതുമൂലം ഉന്മേഷമുള്ളതും രോഗപ്രതിരോധശേഷിയുള്ളതുമായ ശരീരം സ്വന്തമാക്കാം. ഓരോ അവയവങ്ങളുടെയും ആരോഗ്യത്തിന് വ്യത്യസ്ത യോഗാപോസുകളുണ്ട്. നിത്യജീവിതത്തില്‍ ലഘുവായി ശീലിക്കാവുന്ന ചില യോഗാസനങ്ങള്‍ അറിഞ്ഞിരിക്കൂ...

ട്രീ പോസ്(വൃക്ഷാസന)

തലച്ചോറിന്റെ ആരോഗ്യത്തിന് ചെയ്യാവുന്ന ഒരു യോഗാസനമാണിത്. ഊര്‍ജ്ജം നല്‍കുന്ന ഒരു യോഗാ പോസാണ് വൃക്ഷാസന. ഒരു കാല്‍ മടക്കി മുകളിലേക്ക് കൈകള്‍ കൂപ്പി നില്‍ക്കുക.

മയൂരാസന

പ്രമേഹരോഗികള്‍ക്ക് ഏറെ ഗുണം ചെയ്യുന്ന യോഗയാണ് മയൂരാസന. ശരീരത്തിലെ രക്തസഞ്ചാരം മെച്ചപ്പെടുത്താന്‍ സഹായിക്കും.

പ്രതിരോധശേഷിക്ക്

പ്രതിരോധശേഷി വര്‍ദ്ധിപ്പിക്കുന്ന ഒരു യോഗ മുദ്രയാണ് പ്രാണ മുദ്ര. കാഴ്ച ശക്തി വര്‍ദ്ധിപ്പിക്കാനും, ശരീരത്തിന് ഊര്‍ജ്ജം നല്‍കാനും ഇവ സഹായിക്കും.

സൂര്യനമസ്‌കാരം

യോഗയുടെ ഒരു പ്രധാന ഭാഗമാണ് സൂര്യനമസ്‌കാരം. സൂര്യനെ അഭിമുഖീകരിച്ചു നിന്നു ചെയ്യുന്ന യോഗാരീതിയാണിത്. ആരോഗ്യത്തിനും തടി കുറയാനുമെല്ലാം ഉത്തമം.

വജ്രാസനം

മുടി കൊഴിച്ചില്‍ തടയാന്‍ വജ്രാസനം സഹായിക്കും. ശരീരത്തെയും മനസ്സിനെയും റിലാക്‌സ് ചെയ്യുന്നു. ലളിതമായി ചെയ്യാവുന്ന ശ്വസന വ്യായാമമാണ്.

പവന്‍മുക്താസന

കൈകാലുകളുടെ സന്ധികള്‍, അരക്കെട്ട്, കഴുത്ത് എന്നീ ഭാഗങ്ങള്‍ക്ക് അയവും ആയാസവും കിട്ടുന്നു. ഉദഭാഗത്തിന് സമ്മര്‍ദ്ദവും ലഭിക്കും. ഗ്യാസ് പ്രശ്‌നങ്ങള്‍ ഉള്ളവര്‍ക്ക് ചെയ്യാന്‍ പറ്റിയ ആസനമാണിത്.