ചായ കുടിച്ച് തടി കുറയ്ക്കാം

സ്റ്റാര്‍ അനൈസ് ടീ

ദഹനം വര്‍ദ്ധിപ്പിക്കുന്നു - സ്റ്റാര്‍ അനൈസ് എന്ന ചൈനാ സ്വദേശിയായ ഉയരം കുറഞ്ഞ നിത്യഹരിത വൃക്ഷത്തിന്‍റെ പഴം ദഹന പ്രശ്നങ്ങള്‍ പരിഹരിക്കാന്‍ സഹായിക്കുന്നതാണ്. വയറ്റിലെ അസ്വസ്ഥത, അതിസാരം, ഛര്‍ദ്ദി എന്നിവ ഇത് വഴി പരിഹരിക്കാനാവും. ഒരു കപ്പ് ചൂട് വെള്ളത്തില്‍ ഒരു പഴം പത്ത് മിനുട്ട് ഇട്ട് വെയ്ക്കുക. ഇത് ഊറ്റിയെടുത്ത് ആവശ്യമെങ്കില്‍ പഞ്ചസാര ചേര്‍ക്കുക. വയറ്റില്‍ അസ്വസ്ഥത തോന്നുമ്പോള്‍ ഇത് സാവധാനം കുടിക്കാം.

പെപ്പര്‍മിന്‍റ് ടീ

ഭക്ഷണം നിയന്ത്രിക്കുന്നു - പെപ്പര്‍മിന്‍റ് ടീ നിങ്ങള്‍ക്ക് ഇഷ്ടമാണെങ്കില്‍ ഗ്രീന്‍ ടീയുമായി മാറി ഉപയോഗിക്കുന്നത് ദഹനത്തെ വേഗത്തിലാക്കുകയും കലോറി കുറയ്ക്കാന്‍ സഹായിക്കുകയും ചെയ്യും. പുതിനയിലകള്‍ കടുപ്പം കുറഞ്ഞ, ഉന്മേഷം നല്കുന്ന ചായ തയ്യാറാക്കാന്‍ ഉപയോഗിക്കാം. ഇത് ചൂടോടെയോ തണുപ്പിച്ചോ കഴിക്കാം. ചായ തയ്യാറാക്കാന്‍ ഒരു ടേബിള്‍ സ്പൂണ്‍ ഫ്രഷ് അല്ലെങ്കില്‍ ഉണക്കിയ പുതിനയില തിളക്കുന്ന വെള്ളത്തില്‍ ചേര്‍ക്കുക. നാലോ അഞ്ചോ മിനുട്ട് തിളപ്പിച്ച് ഇലകള്‍ നീക്കം ചെയ്ത് ആവശ്യമെങ്കില്‍ അല്പം തേന്‍ ചേര്‍ത്ത് ഉപയോഗിക്കാം.

ഗ്രീന്‍ ടീ

മെറ്റബോളിസം മെച്ചപ്പെടുത്തുന്നു - ഗവേഷണങ്ങള്‍ പ്രകാരം ഗ്രീന്‍ ടീയിലടങ്ങിയ ഇജിസിജി എന്ന രാസഘടകം ശരീരത്തിന്‍റെ മെറ്റബോളിസം വര്‍ദ്ധിപ്പിക്കും. ഇത് ശരീരഭാരം കുറയ്ക്കാന്‍ സഹായിക്കും. ദിവസം 70 കലോറി വരെ കുറയ്ക്കാന്‍ ഗ്രീന്‍ ടീ സഹായിക്കും. ആന്‍റി ഓക്സിഡന്‍റുകളുടെ അളവ് വര്‍ദ്ധിപ്പിക്കാനും ഇത് സഹായിക്കും. ഗ്രീന്‍ ടീയിലെ കാറ്റെച്ചിന്‍ എന്ന ഘടകം മെറ്റബോളിസം വര്‍ദ്ധിപ്പിക്കുകയും കൊഴുപ്പ് എരിച്ച് കളയാന്‍ സഹായിക്കുകയും ചെയ്യും(ദിവസം 70 കലോറി വരെ). ചായ 85 ഡിഗ്രി സെല്‍ഷ്യസില്‍ രണ്ടോ മൂന്നോ മിനുട്ട് തിളപ്പിക്കണം.

റോസ് ടീ

മലബന്ധം തടയുന്നു - പണ്ട് കാലം മുതല്‍ ഉപയോഗിക്കപ്പെടുന്ന ചായയാണിത്. ഫ്രഷ് റോസ് പൂവുകളും, മൊട്ടുകളും ഉപയോഗിച്ച് തയ്യാറാക്കുന്ന ഇത് ശരീരത്തിന് ഏറെ ആരോഗ്യകരമാണ്. വിഷാംശങ്ങളെ നീക്കം ചെയ്യുന്നതിനും, ചര്‍മ്മത്തിന് സൗന്ദര്യം നല്കുന്നതിനുമൊപ്പം റോസ് ടീയില്‍ വിറ്റാമിന്‍ എ, ബി3, സി, ഡി, ഇ എന്നിവ അടങ്ങിയതും, അണുബാധയെ ചെറുക്കുന്നതുമാണ്. മലബന്ധം തടയാനും ശരീരഭാരം കുറയ്ക്കാനും ഇത് സഹായകരമാണ്.

ഊലോങ്ങ് ടീ

അമിതവണ്ണം തടയുന്നു - ചെറിയ തോതില്‍ പുളിപ്പിച്ച ഊലോങ്ങ് ടീ ഗ്രീന്‍ ടീയേക്കാള്‍ ഗുണകരമാണ്. കൊഴുപ്പ് കുറയ്ക്കാന്‍ കഴിവുള്ള ഇത് കൊളസ്ട്രോള്‍ കുറയ്ക്കുകയും, ശരീരത്തില്‍ കൊഴുപ്പ് അടിഞ്ഞ് കൂടുന്നത് തടയുകയും ചെയ്യും. ഈ ചായ ദിവസം രണ്ട് കപ്പ് വീതം കുടിക്കുന്നത് ശുപാര്‍ശ ചെയ്യപ്പെടുന്നു. 30 സെക്കന്‍ഡ് മുതല്‍ അരമണിക്കൂര്‍ വരെ തിളപ്പിച്ച് ഇത് തയ്യാറാക്കാം.