നല്ല ഉറക്കത്തിന് ചില വഴികള്‍

രാത്രിസമയത്ത് സ്്‌നാക്‌സ് കഴിയ്ക്കുന്ന ശീലം പലര്‍ക്കുമുണ്ട്. ഇത് ഉറക്കത്തെ ദോഷകരമായി ബാധിക്കുന്ന ഒന്നാണ്. ഇത് ദഹനപ്രശ്‌നങ്ങളും വയറിന് അസ്വസ്ഥതകളും വരുത്തും. ഗ്യാസ് തുടങ്ങിയ അസുഖങ്ങള്‍ക്കും ഈ ശീലം വഴി വയ്ക്കും. രാത്രി നേരത്ത് സ്‌നാക്‌സ് കഴിയ്ക്കുന്ന ശീലം ഉപേക്ഷിക്കുക.

കിടക്കുന്നതിന് മുന്‍പ് അല്‍പം നടക്കുന്നത് നല്ലതാണ്. എന്നാല്‍ കഠിനമായ വ്യായാമമുറകള്‍ ഉപേക്ഷിക്കുക തന്നെ വേണം. ഇത് ശരീരത്തിലെ ചൂട് ഉയര്‍ത്തുകയും അപചയപ്രക്രിയകള്‍ ശക്തിപ്പെടുത്തുകയും ചെയ്യും. നല്ല ഉറക്കത്തിന് ഇത് ദോഷം വരുത്തും.

രാത്രി വൈകിയും ടിവി കാണുന്നത് മിക്കവാറും പേരുടെ ശീലമാണ്. ഇത് ഉറക്കത്തെ ബാധിക്കും. പ്രത്യേകിച്ച് മനസിനെ അലോസരപ്പെടുത്തുന്ന പരിപാടികള്‍ കണ്ടാല്‍ ഇത് അസ്വസ്ഥതയായി കിടക്കും. ടിവി ബെഡ്‌റൂമില്‍ വയ്ക്കരുത്. ഉറങ്ങും മുന്‍പ് പാട്ടു കേള്‍ക്കുകയോ വായിക്കുകയോ ചെയ്യാം.

രാത്രി വൈകിയും കമ്പ്യൂട്ടറിനു മുന്നിലിരുന്ന് ഓഫീസ് ജോലികള്‍ ചെയ്യുന്നതവരുണ്ട്. ഓഫീസിലെ ജോലി അവിടെ തീര്‍ക്കുന്നതാണ് എപ്പോഴും നല്ലത്. അല്ലെങ്കില്‍ ഇത്തരം ജോലികളെക്കുറിച്ചുള്ള ചിന്ത നല്ല ഉറക്കത്തിന് തടസമായിത്തീരും.

കിടക്കാന്‍ സമയത്ത് വളരെക്കൂടുതല്‍ സംസാരിക്കുന്നതും നല്ലതല്ല. ഇതും നല്ല ഉറക്കത്തെ തടസപ്പെടുത്തുന്ന ഒന്നു തന്നെയാണ്. പ്രത്യേകിച്ച് വഴക്കും വാഗ്വാദവും പോലുള്ള സംസാരങ്ങള്‍. മനസിന് സമാധാനം കൊടുക്കുന്ന കാര്യങ്ങള്‍ മാത്രം ഉറങ്ങുന്നതിന് മുന്‍പ് ചെയ്യുക.

സ്‌ട്രെസ്, ടെന്‍ഷന്‍ എന്നിവ ഉറക്കത്തെ തടസപ്പെടുത്തുന്ന കാര്യങ്ങളാണ്. ശാന്തമായ മനസോടെ ഉറങ്ങാന്‍ പോവുക. കിടക്കും മുന്‍പ് മെഡിറ്റേഷന്‍ ചെയ്യുന്നതും പ്രാര്‍ത്ഥിക്കുന്നതുമെല്ലാം ഗുണം ചെയ്യും. ടെന്‍ഷനുണ്ടാക്കുന്ന കാര്യങ്ങളെക്കുറിച്ച് ചിന്തിക്കരുത്.