തടി കുറയ്ക്കാന്‍ ആറുനേരം ഭക്ഷണം!

പ്രാതല്‍, ഉച്ചഭക്ഷണം, അത്താഴം ഇതായിരിക്കും പ്രധാനമായും പലരുടേയും ഭക്ഷണശീലം. നാലുമണിക്ക് ചായയോ അല്‍പമെന്തെങ്കിലും കൊറിച്ചാലോ ആയി.

എന്നാല്‍ മൂന്നുനേരം മാത്രമുള്ള ഇത്തരം ഭക്ഷണശീലം തടി കുട്ടുമെന്നറിയാമോ, പകരം ദിവസം ആറു തവണ ഭക്ഷണം കഴിച്ചു നോക്കൂ, തടി കുറയുന്നത് നിങ്ങള്‍ക്കു തന്നെ അനുഭവിച്ചറിയാം.

കൂടുതല്‍ തവണ ഭക്ഷണം കഴിയ്ക്കുമ്പോള്‍ തടി കൂടുകയല്ലേ വേണ്ടതെന്ന സംശയം ന്യായം. എന്നാല്‍ മൂന്നു നേരം കഴിയ്ക്കുന്ന ഭക്ഷണത്തിന്റെ അളവു കുറച്ച് ഇത് ആറു തവണയാക്കാനാണ് പറയുന്നത്.

അമിതവണ്ണമുള്ള 95 ശതമാനം പേരും ദിവസവും മൂന്നു തവണ ആഹാരം കഴിയ്ക്കുന്നവരാണെന്ന് തെളിഞ്ഞിട്ടുണ്ട്. മാത്രമല്ല, ഇത് ആരോഗ്യത്തിന് ദോഷം ചെയ്യുകയും ചെയ്യും. ശരീരത്തിന് പോഷകം ലഭിക്കുന്നതില്‍ ഏറെ സമയത്തിന്റെ അന്തരമുണ്ടാകും. ഇത് ശരീരത്തിന്റെ അപചയപ്രക്രിയയെ വിപരീതമായി ബാധിക്കുകയും ചെയ്യും. ശരീരത്തിലെ കൊഴുപ്പു കത്തിച്ചു കളയുന്നതിന് അപചയപ്രക്രിയ ഏറെ പ്രധാനവുമാണ്.

ഭക്ഷണത്തിന്റെ ഇടവേള കൂടുന്തോറും വിശപ്പും കൂടും, ഭക്ഷണത്തിന്റെ അളവും കൂടും. ഇതും തടി വര്‍ദ്ധിക്കാനുള്ള ഒരു കാരണമാണ്.

രാവിലെ ബ്രേക് ഫാസ്റ്റ് നല്ലപോലെ കഴിയ്ക്കുക. പിന്നീട് പലപ്പോഴായി അഞ്ചുനേരം ഭക്ഷണം കഴിയ്ക്കുകയെന്നതാണ് ആരോഗ്യത്തിന് ഏറെ ഗുണകരം. ഇത് ഹോര്‍മോണ്‍ തോത് നില നിര്‍ത്താനും രക്തത്തിലെ ഗ്ലൂക്കോസിന്റെ അളവ് ശരിയായ തോതില്‍ നില നിര്‍ത്താനും സഹായകമാണ്.

ദിവസം ആറുനേരം ഭക്ഷണം കഴിയ്ക്കുന്നതിന്റെ പ്രയോജനം ചുരുക്കിപ്പറയാം.

ഇങ്ങനെ കഴിയ്ക്കുമ്പോള്‍ ഭക്ഷണത്തിന്റെ അളവു കുറയും. കൊഴുപ്പും തടിയും കുറയും.

പ്രമേഹം, ഹൃദയസംബന്ധമായ പ്രശ്‌നങ്ങള്‍, ഹൈപ്പര്‍ടെന്‍ഷന്‍ തുടങ്ങിയ അസുഖങ്ങള്‍ നിയന്ത്രിക്കാന്‍ പല തവണയായി ഭക്ഷണം കഴിയ്ക്കുന്നത് സഹായിക്കും.

ഇങ്ങനെ ഭക്ഷണം കഴിയ്ക്കുമ്പോള്‍ അമിനോ ആസിഡുകളടക്കമുള്ള എല്ലാ പോഷകങ്ങളും ശരീരത്തിന് ഇടവേളയില്ലാതെ ലഭിക്കും. ഇത് മസിലുകളുടെ കരുത്തിനും നല്ലതാണ്.

ഇങ്ങനെ ഭക്ഷണം കഴിച്ചതു കൊണ്ടായില്ല, കഴിയ്്ക്കുന്നത് ആരോഗ്യകരമായ ഭക്ഷണമാകാനും ശ്രദ്ധിക്കുക തന്നെ വേണം. അല്ലാതെ വറുത്തതും പൊരിച്ചതുമെല്ലാം കഴിയ്ക്കുന്നത് വിപരീതഫലമേ ഉണ്ടാക്കുകയുള്ളൂ.

പാല്‍, മുട്ട, പച്ചക്കറി സാലഡുകള്‍, പഴവര്‍ഗങ്ങള്‍ എന്നിവയെല്ലാം ഇടയ്ക്കിടെയുള്ള ഭക്ഷണക്രമത്തില്‍ ഉള്‍പ്പെടുത്താം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.