കൗമാരം പക്വതയും പക്വതക്കുറവും

ശരീരത്തില്‍ മാത്രമല്ലാ, മനസിലും പെരുമാറ്റത്തിലും മാറ്റങ്ങള്‍ വരുന്ന സമയം കൂടിയാണിത്. ആര്‍ത്താവാരംഭത്തോടെ താന്‍ ചെറിയ കുട്ടിയല്ല എന്നൊരു ചിന്ത മിക്കവാറും പെണ്‍കുട്ടികള്‍ക്കുണ്ടാകും. ഇതനുസരിച്ച് ഇവര്‍ കൂടുതല്‍ പക്വതയോടെ പെരുമാറുകയും ചെയ്യും.

സ്വയം ഉള്ളിലേക്കൊതുങ്ങുന്നതിനോടൊപ്പം എന്തിനെയും ഏതിനേയും വിമര്‍ശിക്കാനും ഈ പ്രായത്തില്‍ തോന്നലുണ്ടാകും. മറ്റുള്ളവരെ അനുകരിക്കാനും കൗമാരപ്രായക്കാര്‍ക്ക് താല്‍പര്യമേറും.

ഇത്തരം ഘട്ടങ്ങളില്‍ കുടുംബാംഗങ്ങള്‍ക്ക്, പ്രത്യേകിച്ച് അമ്മയ്ക്ക് പലതും ചെയ്യാനുണ്ട്. കുട്ടി മുതിര്‍ന്നു പോയി ഇനി നിയന്ത്രണങ്ങളാകാം എന്ന കര്‍ശനനിലാപാടെടുക്കരുത്. ഇത് വിപരീതഫലമേ ഉണ്ടാക്കൂ. നിയന്ത്രിക്കാന്‍ നോക്കുന്നതിനേക്കാള്‍ കാര്യങ്ങള്‍ പറഞ്ഞ് മനസിലാക്കിക്കൊടുക്കുക എന്ന സൗഹൃദരീതിയായിരിക്കും നല്ലത്.

കൗമാരത്തില്‍ ശരിതെറ്റുകളുടെ അതിര്‍വരമ്പും വളരെ നേര്‍ത്തതായിരിക്കും. കൂട്ടുകെട്ടുകളാണ് ഈ സമയത്ത് കൂടുതല്‍ സ്വാധീനം ചെലുത്തുക. ഇത്തരം കാര്യങ്ങളില്‍ മാതാപിതാക്കളും ശ്രദ്ധിക്കുക തന്നെ വേണം.

കുട്ടി തെറ്റായ വഴിക്കു നീങ്ങുന്നുവെന്നു തോന്നിയാല്‍ കാത്തിരിക്കാതെ ഉടനെ പ്രതികരിക്കണം. അടിയും ശകാരവുമൊന്നുമല്ല, നല്ല രീതിയില്‍ കാര്യങ്ങള്‍ പറയുന്നതാണ് ഇവിടെയും ഗുണം ചെയ്യുക.

എന്തുണ്ടെങ്കിലും അമ്മയോട് വന്നു പറയാനുള്ള ഒരു സ്വാതന്ത്ര്യം കുട്ടികള്‍ക്കുണ്ടാകണം. ഇതിനു പറ്റിയ കുടുംബാന്തരീക്ഷം ഉണ്ടാക്കിക്കൊടുക്കുകയെന്നത് അച്ഛനമ്മമാരുടെ കടമയാണ്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.