കിഡ്‌നി പ്രശ്‌നങ്ങള്‍ തിരിച്ചറിയൂ

Wellness

oi-Saritha

By Veena

Published: Thursday, April 26, 2012, 15:40 [IST]

കിഡ്‌നി പ്രശ്‌നങ്ങള്‍ ഏതു പ്രായക്കാരെയും ആക്രമിക്കാവുന്നവയാണ്. തുടക്കത്തില്‍ ഇത് കണ്ടെത്താന്‍ സാധിച്ചെന്നു വരില്ല. കാരണം ചെറിയ തോതില്‍ പ്രോട്ടീന്‍ മൂത്രത്തിലേക്കു കലരുന്നതു മാത്രമായിരിക്കും ഇതിന്റെ ലക്ഷണം. ശക്തിയായ പനി, ഗര്‍ഭം, അണുബാധ തുടങ്ങിയ അവസരങ്ങളിലും മൈക്രോആല്‍ബുമിനേറിയ എന്നറിയപ്പെടുന്ന ഈ പ്രോട്ടീന്‍ മൂത്രത്തില്‍ കലരാറുണ്ട്.

ബിപി കൂടുതലാവുക, കൊളസ്‌ട്രോള്‍, ട്രൈഗ്ലിസറൈഡ് തോത് വര്‍ദ്ധിക്കുക തുടങ്ങിയ അവസ്ഥകള്‍ കിഡ്‌നി പ്രശ്‌നങ്ങള്‍ക്ക് കാരണമായേക്കാം. പ്രമേഹം കൂടിയാലും കിഡ്‌നി വേണ്ട രീതിയില്‍ പ്രവര്‍ത്തിക്കാതാകും.

കാലുകളിലും പിന്നീട് ദേഹത്താകെയും നീര് വരിക, വിശപ്പു കെടുക, ഭാരക്കുറവ്, ക്ഷീണം, ഛര്‍ദി, മനംപിരട്ടല്‍, ഉറക്കക്കുറവ് തുടങ്ങിയ പ്രശ്‌നങ്ങള്‍ കിഡ്‌നി തകരാറിനെയായിരിക്കും കാണിക്കുന്നത്.

കിഡ്‌നി പ്രശ്‌നങ്ങളുള്ളവര്‍ക്ക് ഇടയ്ക്കിടെ മൂത്രമൊഴിക്കാനുള്ള തോന്നലുണ്ടാകും. എന്നാല്‍ കുറഞ്ഞ അളവില്‍ കടുത്ത നിറത്തിലായിരിക്കും മൂത്രം പോവുക. ചിലപ്പോള്‍ മൂത്രത്തില്‍ രക്തത്തിന്റെ അംശം കണ്ടെന്നു വരാം.

വായില്‍ രുചി വ്യത്യാസം അനുഭവപ്പെടുന്നതായി കിഡ്‌നി പ്രശ്‌നങ്ങളുള്ളവര്‍ പറയാറുണ്ട്. ഏതെങ്കിലും ലോഹത്തിന്റേതു പോലുള്ള രുചി ചിലപ്പോള്ൃ വായില്‍ അനുഭവപ്പെടും. കിഡ്‌നി ശരിക്കും പ്രവര്‍ത്തിക്കാത്തതിനാല്‍ രക്തത്തില്‍ മാലിന്യങ്ങള്‍ അടിയുന്നതായിരിക്കും ഇതിന്റെ കാരണം.

ദേഹമാകെ ചൊറിച്ചിലനുഭവപ്പെടുന്നതായും കിഡ്‌നി തകരാറുള്ളവര്‍ പറയാറുണ്ട്. രക്തത്തിലെ മാലിന്യങ്ങള്‍ തന്നെയാണ് ഇതിനും കാരണം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.