ഉറങ്ങാനും വ്യായാമം

ഉറങ്ങുന്നതിന് അല്‍പം മുന്‍പ് വ്യായാമം ചെയ്തു നോക്കൂ. നല്ല ഉറക്കം ലഭിക്കും. ഇത് ക്ഷീണം കൊണ്ടല്ല, മറിച്ച് വ്യായാമം കൊണ്ടുണ്ടാകുന്ന ശാരീരികപ്രവര്‍ത്തനങ്ങള്‍ കാരണമാണ്.

നല്ല ഉറക്കത്തിന് നല്ല മൂഡും പ്രധാനമാണ്. വ്യായാമം തലച്ചോറിലെ ഹോര്‍മോണുകളുടെ ഉല്‍പാദനം വര്‍ദ്ധിപ്പിക്കും. നല്ല ഉറക്കം കിട്ടാന്‍ സഹായിക്കുകയും ചെയ്യും.

വ്യായാമം ശരീരത്തിന്റെ ഊഷ്മാവ് ഉയര്‍ത്തും. അല്‍പസമയം കഴിയുമ്പോള്‍ ഇത് താഴും. ഊഷ്മാവ് കുറയുമ്പോള്‍ സ്വാഭാവികമായും ഉറക്കം വരും. കിടക്കുന്നതിന് മുന്‍പ് വ്യായാമം ചെയ്യുന്നത് നല്ല ഉറക്കത്തിന് സഹായിക്കുമെന്നു പറയുന്നതിന്റെ കാരണം ഇതാണ്.

ഉറക്കത്തിന് കൂടുതല്‍ സഹായിക്കുക കാര്‍ഡിയോ വാസ്‌കുലാര്‍ വ്യായാമങ്ങളാണ്. മസില്‍ സ്‌ട്രെച്ചിംഗ് വ്യായാമങ്ങളും നല്ലതുതന്നെ. യോഗ ചെയ്യുന്നതു മനസ് ശാന്തമാകാന്‍ സഹായിക്കും.

ഓടുക, ചാടുക, നീന്തുക, ഡാന്‍സിംഗ്, സ്‌കിപ്പിംഗ് തുടങ്ങിയ വ്യായാമങ്ങളും ഉറക്കത്തെ സഹായിക്കുന്നവയാണ്. ഇവ രക്തത്തിലെ ഓക്‌സിജന്റെ അളവ് കൂട്ടും. ഉറങ്ങുന്നതിന് മുന്‍പ് 20 മിനിറ്റെങ്കിലും ഇത്തരം വ്യായാമങ്ങള്‍ ചെയ്യുന്നതാണ് നല്ലത്.

യോഗ ചെയ്യുമ്പോള്‍ ശ്വസനക്രിയകള്‍ ചെയ്യുന്നത് ഒഴിവാക്കരുത്. ശരീരത്തിനും മനസിനും ഇവ ഒരുപോലെ ഗുണം ചെയ്യും.

നടക്കുന്നതും നല്ല ഉറക്കത്തെ സഹായിക്കും. ഭക്ഷണം കഴിഞ്ഞ് അരമണിക്കൂറെങ്കിലും നടക്കുന്ന ശീലമുണ്ടാക്കിയെടുക്കുക.

വ്യായാമം കഴിഞ്ഞ ഉടനെ ഉറങ്ങാന്‍ കിടക്കരുത്. 15 മിനിറ്റെങ്കിലും കഴിഞ്ഞ ശേഷം ഉറങ്ങുന്നതായിരിക്കും നല്ലത്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.