ഉറക്കം സുഖമാക്കാനും ഭക്ഷണമുണ്ട്

ചില ഭക്ഷണങ്ങള്‍ ദഹനപ്രശ്‌നങ്ങള്‍ കാരണം ഉറക്കം കളയും. എന്നാല്‍ ചില ഭക്ഷണങ്ങളാകട്ടെ, ഉറക്കത്തിന് സഹായിക്കുകയും ചെയ്യും. ഇത്തരം ഭക്ഷണങ്ങളെ കുറിച്ച് അറിയൂ.

ബദാം ഉറക്കത്തിന് സഹായിക്കുന്ന സൂപ്പര്‍ ഭക്ഷണമാണെന്ന് പറയാം. ഇതിലെ മഗ്നീഷ്യം മസിലുകള്‍ക്ക് അയവ് നല്‍കുകയും നല്ല ഉറക്കം നല്‍കുകയും ചെയ്യും. കൂടാതെ ഇവയിലെ പ്രോട്ടീന്‍ രക്തത്തിലെ പഞ്ചസാരയുടെ അളവു ക്രമീകരിക്കും. അതുകൊണ്ട് ദിവസവും കിടക്കുന്നതിന് മുന്‍പ് ബദാം കഴിച്ചാല്‍ നല്ല ഉറക്കം കിട്ടും.

പാലിലും പാലുല്‍പന്നങ്ങളിലും അടങ്ങിയിട്ടുള്ള ട്രിപ്‌റ്റോഫാന്‍ ഉറക്കത്തിന് സഹായിക്കും. കിടക്കും മുന്‍പ് ഒരു ഗ്ലാസ് പാല്‍ കുടിയ്ക്കുന്നത് നല്ലതാണെന്ന് പറയുന്നതിന്റെ അടിസ്ഥാനം ഇതാണ്. ഇവയിലെ കാല്‍സ്യം സ്‌ട്രെസ് കുറയ്ക്കാനും നല്ലതാണ്.

പുഴുങ്ങിയ മുട്ടയും ഉറക്കത്തെ സുഖമാക്കും. ഇതിലെ പ്രോട്ടീന്‍ ശാരീരികപ്രവര്‍ത്തനങ്ങളെ ത്വരിതപ്പെടുത്തും. അതുകൊണ്ട് സുഖമായി ഉറങ്ങാനും സാധിക്കും. കൊളസ്‌ട്രോള്‍ ഉള്ളവരാണെങ്കില്‍ മുട്ട മഞ്ഞ ഒഴിവാക്കാം.

ധാന്യങ്ങള്‍ ഉറക്കത്തെ സഹായിക്കും. പ്രത്യേകിച്ചും തൈരിന്റെ കൂടെ കൂട്ടിയാല്‍. രാത്രി ചോറില്‍ തൈരൊഴിച്ചു കഴിച്ചാല്‍ ആകെയൊരു മന്ദിപ്പും ക്ഷീണവും തോന്നുന്നതിന്റെ കാരണം ഇതാണ്.

തേനിലും ഉറക്കത്തെ സഹായിക്കുന്ന ഘടകങ്ങളുണ്ട്. കിടക്കുന്നതിന് മുന്‍പ് ഒരു സ്പൂണ്‍ തേന്‍ കുടിക്കുന്നത് നല്ലതാണ്. ഇന്‍സോംമ്‌നിയക്കുള്ള പരിഹാരം കൂടിയാണിത്.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.