പുറത്തെ ഭക്ഷണം ഡയറ്റ് തെറ്റിക്കരുത്

എത്രയൊക്കെ മേന്മ അവകാശപ്പെട്ടാലും പുറത്തു നിന്നുള്ള ഭക്ഷണം ആരോഗ്യത്തിന് ദോഷം തന്നെയാണ്. അതുകൊണ്ട് പുറത്തുപോയി ഭക്ഷണം കഴിയ്ക്കുമ്പോഴും ആരോഗ്യകരമായ ശീലങ്ങള്‍ പാലിക്കുന്നത് നന്നായിരിക്കും.

എന്തൊക്കെ ഭക്ഷണം ഉണ്ടെങ്കിലും തങ്ങളുടെ ആവശ്യത്തിനുള്ള ഭക്ഷണം തെരഞ്ഞെടുക്കുകയാണ് പ്രധാനമായും വേണ്ടത്. വറുത്തതിനും പൊരിച്ചതിനും പുറകില്‍ പോകാതെ പോഷകഗുണമുള്ള ഭക്ഷണങ്ങള്‍ തെരഞ്ഞെടുക്കണം. മെനുവില്‍ ഇല്ലെങ്കിലും മിക്കവാറും ഹോട്ടലുകളില്‍ ഉപഭോക്താക്കളുടെ താല്‍പര്യപ്രകാരം ഭക്ഷണം തയ്യാറാക്കി കൊടുക്കാറുണ്ട്. ബുഫേകളിലും മറ്റും സ്വന്തം താല്‍പര്യപ്രകാരം ഭക്ഷണം തെരഞ്ഞെടുക്കാനും സൗകര്യമുണ്ട്. കാശു മുതലാക്കണമെന്ന് കരുതി വലിച്ചുവാരി കഴിയ്ക്കാതെ അവനവന്റെ ആരോഗ്യത്തിന് ചേരുന്ന ഭക്ഷണങ്ങള്‍ തെരഞ്ഞെടുക്കുക.

അനാരോഗ്യകരമായ ഭക്ഷണങ്ങളെ ആരോഗ്യകരമായ ഭക്ഷണങ്ങള്‍ കൊണ്ട് മാറ്റാം. കോളകള്‍ക്ക് പകരം ഫ്രഷ് ജ്യൂസ് ആവാം. ഐസ്‌ക്രീന് പകരം ഫ്രൂട്ട് സാലഡാക്കാം. പച്ചക്കറികള്‍ കൂടുതല്‍ ഉപയോഗിക്കാം. നോണ്‍ വെജ് വേണമെങ്കില്‍ കൊഴുപ്പും എണ്ണയും കുറഞ്ഞ ഇറച്ചി വിഭവങ്ങള്‍ തെരഞ്ഞെടുക്കാം. ചിക്കന്‍ ഫ്രൈക്കു പകരം ബേക്ക്, ഗ്രീല്‍ ചെയ്ത ചിക്കനായാലും പോരേ.

വല്ലാത്ത വിശപ്പോടെയാണ് ഹോട്ടലിലെത്തുന്നതെങ്കില്‍ ഭക്ഷണനിയന്ത്രണമെല്ലാം കാറ്റില്‍ പറക്കും. ഇത്തരം സന്ദര്‍ഭങ്ങളില്‍ ആദ്യം സൂപ്പു കഴിയ്ക്കുക. വിശപ്പു കുറയും, ആരോഗ്യത്തിന് നല്ലതുമാണ്.

കഴിയുമെങ്കില്‍ നിങ്ങള്‍ കഴിയ്ക്കുന്ന ഭക്ഷണത്തിന്റെ ചേരുവകള്‍ ഏതെല്ലാമെന്ന് അറിഞ്ഞിരിക്കുന്നത് നല്ലതാണ്. ആവശ്യമില്ലാത്തവ ഒഴിവാക്കി ഭക്ഷണം തയ്യാറാക്കാന്‍ ഹോട്ടലുകാരോട് ആവശ്യപ്പെടാം.

ഇഷ്ടമുള്ള ഭക്ഷണം കഴിയ്ക്കാം. പക്ഷേ അളവിന്റ കാര്യത്തില്‍ പ്രത്യേകം ശ്രദ്ധിക്കണം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.