കഷ്ടപ്പാടില്ലാതെ തടി കുറയ്ക്കാം, രാവിലെ ഈ ചെറിയ കാര്യങ്ങള്‍ ശീലിക്കൂ

ശരീരഭാരം കുറയ്ക്കാന്‍ ആഗ്രഹിക്കുന്ന നിരവധി ആളുകള്‍ ലോകമെമ്പാടും ഉണ്ട്. ഇതിനായി അവര്‍ ഉപവാസവും ഭക്ഷണക്രമവും കഠിനമായ വ്യായാമവും ചെയ്യുന്നു. എന്നാല്‍ ഇതൊന്നും ഇല്ലാതെ തന്നെ, അവരുടെ ജീവിതശൈലി മെച്ചപ്പെടുത്തിയാല്‍ അവര്‍ക്ക് ഈ പ്രശ്‌നം ഒഴിവാക്കാനാകും. ഇത് അറിയുമ്പോള്‍ നിങ്ങള്‍ ആശ്ചര്യപ്പെട്ടേക്കാം. അമിതവണ്ണത്തിന്റെ ഒരു പ്രധാന കാരണം മെറ്റബോളിസം മന്ദഗതിയിലാകുന്നതാണ്. നിങ്ങള്‍ മോശം ജീവിതശൈലിയും ഭക്ഷണക്രമവും സ്വീകരിച്ച് ജീവിക്കുമ്പോള്‍, അത് നിങ്ങളുടെ ഭക്ഷണത്തിന്റെ ദഹനത്തിന്റെ വേഗത കുറയ്ക്കുന്നു.

അതുകാരണം ശരീരത്തില്‍ മാലിന്യങ്ങള്‍ വര്‍ദ്ധിക്കാന്‍ തുടങ്ങുന്നു. ഇത് വേഗത്തില്‍ ശരീരഭാരം വര്‍ദ്ധിപ്പിക്കുകയും ചെയ്യുന്നു. അത്തരമൊരു സാഹചര്യത്തില്‍, നിങ്ങളുടെ ചില നല്ല പ്രഭാതശീലങ്ങളിലൂടെ നിങ്ങളുടെ ശരീരഭാരം നിയന്ത്രണത്തിലാക്കാനാകും. അതിനുള്ള വഴികള്‍ എന്തൊക്കെയാണെന്ന് നമുക്ക് നോക്കാം.

തടി കുറക്കാന്‍ പ്രഭാതശീലങ്ങള്‍ എങ്ങനെ സഹായിക്കുന്നു

ന്യൂകാസിലിലെ നോര്‍ത്തുംബ്രിയ യൂണിവേഴ്സിറ്റിയില്‍ നിന്നുള്ള ഗവേഷണമനുസരിച്ച്, രാവിലെ വെറുംവയറ്റില്‍ വ്യായാമം ചെയ്യുന്നതിലൂടെ ശരീരത്തിലെ കൊഴുപ്പ് 20 ശതമാനം വരെ കത്തിക്കാന്‍ സാധിക്കും. കാരണം, ഊര്‍ജം ഉല്‍പ്പാദിപ്പിക്കുന്നതിനും വ്യായാമ വേളയില്‍ നിങ്ങളെ മുന്നോട്ട് കൊണ്ടുപോകുന്നതിനുമായി ഒഴിഞ്ഞ വയറ്റില്‍, ശരീരം ശരീരത്തിലെ കൊഴുപ്പ് കത്തിക്കാന്‍ തുടങ്ങും. ഇത് വേഗത്തില്‍ തടി കുറയ്ക്കാന്‍ സഹായിക്കുന്നു. വ്യായാമം മാത്രമല്ല, നിങ്ങള്‍ എന്താണ് കഴിക്കുന്നത്, നിങ്ങള്‍ ഉണരുമ്പോള്‍ രാവിലെ നിങ്ങള്‍ എന്താണ് ചെയ്യുന്നത് - ഇതെല്ലാം ശരീരഭാരം കുറയ്ക്കാന്‍ പ്രധാനമാണ്.

നേരത്തെ ഉണരുക

നേരത്തെ എഴുന്നേല്‍ക്കുന്നത് നിങ്ങളുടെ ഉറക്കത്തില്‍ വിട്ടുവീഴ്ച ചെയ്യണമെന്നല്ല. ശരീരഭാരം കുറയ്ക്കാന്‍ നിങ്ങള്‍ ആഗ്രഹിക്കുന്നുവെങ്കില്‍ എല്ലായ്പ്പോഴും മതിയായ ഉറക്കം നേടുക. അതോടൊപ്പം, നേരത്തെ ഉറങ്ങാനും നേരത്തെ എഴുന്നേല്‍ക്കാനും ശ്രദ്ധിക്കുക. ഒരു നല്ല രാത്രി ഉറക്കത്തിന് ശേഷം ഉറക്കമുണര്‍ന്ന് നിങ്ങളുടെ ദിവസം ഊര്‍ജ്ജസ്വലമാക്കാന്‍ ആരോഗ്യകരമായ പ്രഭാത ദിനചര്യ പിന്തുടരുക. ആരോഗ്യകരമായ ഒരു തുടക്കം നിങ്ങളെ ദിവസം മുഴുവന്‍ മുന്നോട്ട് നയിക്കും.

ചൂടുവെള്ളം കുടിക്കുക

രാത്രിയില്‍ നിങ്ങളുടെ മെറ്റബോളിസം മന്ദഗതിയിലാണെങ്കില്‍, നിങ്ങള്‍ രാവിലെ എഴുന്നേല്‍ക്കുമ്പോള്‍ അത് ശരിയായ രീതിയില്‍ ആരംഭിക്കേണ്ടത് വളരെ പ്രധാനമാണ്. രാവിലെ ഒന്നോ രണ്ടോ ഗ്ലാസ് ചെറുചൂടുള്ള വെള്ളം കുടിക്കുന്നതിലൂടെ ഇത് നന്നായി സാധ്യമാകും. ഈ വെള്ളത്തില്‍ നാരങ്ങാനീരും തേനും ചേര്‍ക്കാന്‍ ആയുര്‍വേദം പറയുന്നു. രാവിലെ ആദ്യം രണ്ട് ഗ്ലാസ് വെള്ളം കുടിക്കുന്നത് മലശോധന മെച്ചപ്പെടുത്താനും ശരീരത്തെ ഫ്രഷ് ആയി നിര്‍ത്താനും സഹായിക്കും.

വ്യായാമം

രാവിലെ കുറഞ്ഞത് 20 മിനിറ്റെങ്കിലും സ്ട്രെച്ച് ചെയ്യുകയോ, നടക്കുകയോ കുറച്ച് യോഗ അല്ലെങ്കില്‍ നേരിയ തോതിലുള്ള വ്യായാമങ്ങള്‍ ചെയ്യുകയോ ചെയ്യുക. നിങ്ങള്‍ ഒരു തുടക്കക്കാരനല്ലെങ്കില്‍, ജിമ്മില്‍ പോയി വര്‍ക്ക് ഔട്ട് ചെയ്യുക. രാവിലെ വ്യായാമം ചെയ്യുന്നത് നിങ്ങളുടെ മെറ്റബോളിസത്തെ വര്‍ധിപ്പിക്കുകയും ഉയര്‍ന്ന അളവില്‍ എന്‍ഡോര്‍ഫിന്‍ ഉപയോഗിച്ച് നിങ്ങള്‍ക്ക് ദിവസം മുഴുവന്‍ ഊര്‍ജ്ജം നല്‍കുകയും ചെയ്യും.

ധ്യാനം

നിങ്ങളുടെ ദിവസം ആരംഭിക്കാന്‍, ധ്യാനം പരിശീലിക്കുന്നതിനേക്കാള്‍ മികച്ച മാര്‍ഗമില്ല. രാവിലെ 10-15 മിനിറ്റ് ധ്യാനിക്കുന്നത് നിങ്ങളുടെ മനസ്സിനെ ശാന്തമാക്കുകയും ദിവസത്തിനായി നിങ്ങളെ തയ്യാറാക്കുകയും ചെയ്യുന്നു. ഒരു തരത്തില്‍ ധ്യാനം നിങ്ങളുടെ ആന്തരിക ഊര്‍ജ്ജത്തെ കൂടുതല്‍ ഉല്‍പ്പാദനക്ഷമതയിലേക്കും നല്ല ഫലങ്ങളിലേക്കും നയിക്കാന്‍ സഹായിക്കുന്നു. ധ്യാനം സമ്മര്‍ദ്ദവും ഉത്കണ്ഠയും ലഘൂകരിക്കുന്നു, പാരാസിംപതിക് നാഡീവ്യവസ്ഥയെ ഉത്തേജിപ്പിക്കുന്നു, ഹൃദയമിടിപ്പ് നിയന്ത്രിക്കുന്നു, രക്തയോട്ടം മെച്ചപ്പെടുത്തുന്നു.

സൂര്യപ്രകാശം

വിറ്റാമിന്‍ ഡി നിങ്ങളുടെ വൈജ്ഞാനിക പ്രവര്‍ത്തനത്തെ സഹായിക്കുകയും മാനസികാവസ്ഥയെ നിയന്ത്രിക്കുകയും അവയവങ്ങളുടെ പ്രവര്‍ത്തനം മെച്ചപ്പെടുത്തുകയും ചെയ്യുന്നു. വിറ്റാമിന്‍ ഡിയുടെ ഏറ്റവും നല്ല ഉറവിടം സൂര്യപ്രകാശമാണ്. അതിനാല്‍ വൈറ്റമിന്‍ ഡിയുടെ കുറവ് നികത്താനും ദിവസം മുഴുവനും നിങ്ങളുടെ ശരീരഭാരം കുറയ്ക്കാന്‍ സഹായിക്കാനുമായി പ്രഭാത കിരണങ്ങള്‍ ശരീരത്തില്‍ തട്ടിക്കുക. രാവിലെ കുറച്ച് വെയില്‍ കൊള്ളുന്നത് ശീലമാക്കുക.

തണുത്ത വെള്ളത്തിലെ കുളി

ഒന്നിലധികം പഠനങ്ങള്‍ കാണിക്കുന്നത്, തണുത്ത വെള്ളത്തിലെ കുളി ശരീരത്തിലെ ബ്രൗണ്‍ അഡിപ്പോസ് അല്ലെങ്കില്‍ കൊഴുപ്പ് കലകളെ സജീവമാക്കുകയും വെളുത്ത അഡിപ്പോസ് ടിഷ്യൂകളെ കത്തിക്കാന്‍ സഹായിക്കുകയും ചെയ്യുന്നുവെന്നാണ്. അതിരാവിലെ തണുത്ത വെള്ളത്തില്‍ ഒരു കുളി കുളിക്കുന്നത് ശരീരത്തിലെ കൊഴുപ്പ് കത്തിക്കാന്‍ സഹായിക്കും, കൂടാതെ ദിവസത്തേക്കുള്ള നിങ്ങളുടെ മെറ്റബോളിസം മെച്ചപ്പെടുത്തുകയും ചെയ്യും.

ശരിയായ പ്രഭാതഭക്ഷണം

പ്രാതലിന് ധാരാളം പ്രോട്ടീനും നാരുകള്‍ അടങ്ങിയ ഭക്ഷണങ്ങളും മുട്ട, പഴങ്ങള്‍, നട്സ്, വിത്തുകള്‍ എന്നിവയും കഴിക്കുക. ഓട്‌സ്, മള്‍ട്ടിഗ്രെയിന്‍ ബ്രെഡ് മുതലായവ പോലുള്ള ആരോഗ്യകരമായ കാര്‍ബോഹൈഡ്രേറ്റുകളും വര്‍ധിപ്പിക്കുക.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.