കരളില്ലെങ്കില്‍ ആരോഗ്യം സ്വാഹ.. കരള്‍ തകര്‍ക്കുന്ന ദോഷകരമായ ശീലങ്ങള്‍

ശരീരത്തിന് അഞ്ഞൂറിലധികം പ്രധാന പ്രവര്‍ത്തനങ്ങള്‍ ചെയ്യുന്ന അവയവമാണ് കരള്‍. പ്രോട്ടീന്‍ സമന്വയം മുതല്‍ കൊഴുപ്പ് മെറ്റബോളിസിംഗ് വരെ, കരള്‍ വിവിധ ജൈവ രാസപ്രവര്‍ത്തനങ്ങളുടെ കേന്ദ്രമാണ്. ശരീരത്തിന്റെ വിഷാംശം ഇല്ലാതാക്കുന്ന പ്രക്രിയ കരളില്‍ ആരംഭിക്കുന്നു. ഇവിടെയാണ് വിറ്റാമിനുകളും ധാതുക്കളും സംഭരിക്കപ്പെടുന്നത്. ശരീരത്തിന്റെ ദൈനംദിന പ്രവര്‍ത്തനത്തിന് കരള്‍ പ്രധാനമായതിനാല്‍, നാം ഏര്‍പ്പെടുന്ന പല പ്രവര്‍ത്തനങ്ങളും അതിനെ ബാധിക്കും. നാം കഴിക്കുന്ന ഭക്ഷണം, കുടിക്കുന്ന വെള്ളം, പിന്തുടരുന്ന ശീലങ്ങള്‍ എന്നിവയെല്ലാം നമ്മുടെ കരളിന്റെ ആരോഗ്യത്തെയും സ്വാധീനിക്കുന്നു. കരളിന്റെ പ്രവര്‍ത്തനത്തെ തകരാറിലാക്കുന്ന ചില മോശം ശീലങ്ങള്‍ എന്തൊക്കെയെന്ന് നമുക്ക് നോക്കാം.

കുറച്ചുമാത്രം വെള്ളം കുടിക്കുന്നത്

ശരീരത്തിലെ വിഷാംശം ഇല്ലാതാക്കാന്‍ വെള്ളം നിങ്ങളെ സഹായിക്കുന്നു. നമ്മുടെ ശരീരം 75 ശതമാനവും ജലമാണെന്നതിനാല്‍ ജലത്തിന്റെ അഭാവം നിര്‍ജ്ജലീകരണത്തിന് കാരണമാകുന്നു. കരളിന് കാര്യക്ഷമമായി പ്രവര്‍ത്തിക്കാന്‍ ധാരാളം വെള്ളം ആവശ്യമാണ്. ആവശ്യമായ അളവില്‍ വെള്ളം ശരീരത്തിന് കിട്ടിയില്ലെങ്കില്‍ അത് കരള്‍ പ്രശ്‌നങ്ങളിലേക്ക് നയിക്കും. ദിവസവും ആവശ്യത്തിന് വെള്ളം കുടിക്കുന്നത് കരളിനെ അതിന്റെ പ്രവര്‍ത്തനം മുന്നോട്ടു കൊണ്ടുപോകാന്‍ കരുത്തേകുന്നു.

മദ്യത്തിന്റെ ഉപഭോഗം

മദ്യത്തിന്റെ ഉപഭോഗം ശരീരത്തില്‍ ദോഷകരമായ ഫലങ്ങള്‍ കാണിക്കും. ഓരോ ശരീരത്തിനും മദ്യത്തോടുള്ള പ്രതികരണം വ്യത്യസ്തമാണ്. അമിതമായ മദ്യ ഉപഭോഗം കരള്‍ രോഗങ്ങളിലേക്ക് നയിക്കും. അതിനാല്‍ നിങ്ങള്‍ മദ്യം കുടിക്കുന്നത് നിര്‍ത്തുകയോ പരിമിതപ്പെടുത്തുകയോ ചെയ്യുക.

സിഗരറ്റ് വലി

ശ്വാസകോശ അര്‍ബുദം മാത്രമല്ല, കരള്‍ കാന്‍സറും പുകവലിയുമായി ബന്ധപ്പെട്ടിരിക്കുന്നു. നിങ്ങള്‍ വലിക്കുന്നതും ശ്വസിക്കുന്നതുമായ പുക കരളിനെ ബാധിക്കുന്നു. സിഗരറ്റ് പുക ഉണ്ടാക്കുന്ന ഓക്സിഡേറ്റീവ് സമ്മര്‍ദ്ദം വളരെ വലുതാണ്. ഇത് ശരീരത്തിലെ ദോഷകരമായ രാസവസ്തുക്കള്‍ പുറത്തുവിടുകയും ആത്യന്തികമായി കരള്‍ കാന്‍സറിലേക്ക് നയിക്കുകയും ചെയ്യുന്നു.

അമിതമായ ശരീരഭാരം

അമിതഭാരമുള്ളവര്‍ക്ക് ധാരാളം അഡിപ്പോസ് ടിഷ്യു അല്ലെങ്കില്‍ കൊഴുപ്പ് കോശങ്ങള്‍ ഉണ്ടെന്നാണ് കണക്കാക്കുന്നത്. ഇവ കരള്‍ ടിഷ്യുവിനെ ദോഷകരമായി ബാധിക്കുന്ന ടോക്‌സിക് പ്രോട്ടീനുകള്‍ പുറത്തുവിടുന്നു. മദ്യപാനം പോലെതന്നെ അമിതവണ്ണവും കരളിനെ തകരാറിലാക്കുകയും കരള്‍ കാന്‍സറിലേക്ക് നയിക്കുകയും ചെയ്യും.

പഞ്ചസാര അധികമായി ഉപയോഗിച്ചാല്‍

പഞ്ചസാരയുടെ അമിതമായ ഉപയോഗം ശരീരത്തിന് ദോഷകരമാണ്. അമിതമായ പഞ്ചസാര കരളില്‍ കൊഴുപ്പ് അടിഞ്ഞു കൂടാന്‍ കാരണമാകുന്നു. ശരീരത്തിലെ എല്ലാ കോശങ്ങള്‍ക്കും ഗ്ലൂക്കോസ് തന്മാത്രകളെ പരിപാലിക്കാന്‍ കഴിയുമെങ്കിലും, കരള്‍ കോശങ്ങള്‍ക്ക് മാത്രമേ ഫ്രക്ടോസ് കൈകാര്യം ചെയ്യാന്‍ കഴിയൂ. ഫ്രക്ടോസ് പതിവായി കഴിക്കുന്നത് കരളിള്‍ തകരാറിന് കാരണമാകും. മധുരപലഹാരങ്ങളും പ്രോസസ് ചെയ്ത ഭക്ഷണവും ഒഴിവാക്കുക.

അത്താഴം അധികം കഴിക്കുന്നത്

കരള്‍ അതിന്റെ ഭൂരിഭാഗം ജോലികളും ചെയ്യുന്നത് രാത്രിയിലാണ്. ഉറക്കസമയത്തിന് തൊട്ടുമുമ്പ് കനത്ത ഭക്ഷണം കഴിക്കുന്നത് കരളില്‍ അധിക സമ്മര്‍ദ്ദം ചെലുത്തുന്നു. ഇത് കാലക്രമേണ കരളിനെ തകരാറിലാകുന്നു. നിങ്ങളുടെ കരളിനെ സംരക്ഷിക്കാന്‍, കരള്‍ ശുദ്ധീകരിക്കുന്ന ഗുണങ്ങളുള്ള ക്യാരറ്റും ബീറ്റ്റൂട്ടും വൈകുന്നേരം കഴിക്കാം.

കൊഴുപ്പ് അടങ്ങിയ ഭക്ഷണം

പാക്ക് ചെയ്തതും പ്രോസസ് ചെയ്തതുമായ മിക്കവാറും എല്ലാ ഭക്ഷണങ്ങളിലും ട്രാന്‍സ് ഫാറ്റ് ഉണ്ട്. ഇവ ശരീരത്തിലെ ചീത്ത കൊളസ്ട്രോളിന്റെ അളവ് ഉയര്‍ത്തുന്നതിനും ഹൃദയസംബന്ധമായ പ്രശ്നങ്ങളിലേക്ക് നയിക്കുന്നതിനും കാരണമാകുന്നു. ട്രാന്‍സ് ഫാറ്റുകളുടെ മറ്റൊരു ദോഷകരമായ ഫലം അവ നല്ല കൊളസ്‌ട്രോളിന്റെ അളവ് കുറയ്ക്കുന്നു എന്നതാണ്. ട്രാന്‍സ് ഫാറ്റ് ഭക്ഷണങ്ങള്‍ അധികമായി കഴിക്കുന്നത് നിങ്ങളുടെ കരളിന് ദോഷം ചെയ്യും.

സുരക്ഷിതമല്ലാത്ത ലൈംഗികബന്ധം

സുരക്ഷിതമല്ലാത്ത ലൈംഗിക ബന്ധത്തില്‍ ഏര്‍പ്പെടുന്നവര്‍ക്ക്, സുരക്ഷിതമായ ലൈംഗികതയില്‍ ഏര്‍പ്പെടുന്നവരേക്കാള്‍ കരള്‍ തകരാറിലാകാനുള്ള സാധ്യത കൂടുതലാണ്. നിങ്ങളുടെ കരളിനെ സംരക്ഷിക്കാന്‍ സുരക്ഷിതമായ ലൈംഗീക ബന്ധം സ്വീകരിക്കുക.

മരുന്നുകളുടെ ഉപയോഗം

ചില മരുന്നുകളുടെ ഉപയോഗം കരളിന്റെ ആരോഗ്യത്തെ ദോഷകരമായി ബാധിക്കുന്നു. മരുന്നുകള്‍ ഉയര്‍ന്ന അളവില്‍ കഴിക്കുകയോ അല്ലെങ്കില്‍ വളരെയധികം മരുന്നുകള്‍ പരസ്പരം മിക്‌സ് ചെയ്ത് കഴിക്കുകയോ ചെയ്താല്‍ അത് കരളിന് ദോഷം ചെയ്യും.

സമ്മര്‍ദ്ദകരമായ ജീവിതശൈലി

നീണ്ടുനില്‍ക്കുന്ന സമ്മര്‍ദ്ദം കരളിനെ തകരാറിലാക്കും. മാനസിക പിരിമുറുക്കവും കരള്‍ പ്രശ്‌നങ്ങള്‍ മൂലമുള്ള മരണവും തമ്മില്‍ ബന്ധമുണ്ടെന്ന് പഠനങ്ങള്‍ കണ്ടെത്തിയിട്ടുണ്ട്.

ഉദാസീനമായ ജീവിതശൈലി

വ്യായാമം നിങ്ങളുടെ ആരോഗ്യം മെച്ചപ്പെടുത്തുന്നു. ഇത് കരളിനെ പ്രത്യേകമായി സഹായിക്കുന്നു. ശരീരം വിയര്‍ത്ത് കലോറി എരിയുകയും, ഇത് ശരീരത്തെ വിഷാംശം ഇല്ലാതാക്കാന്‍ സഹായിക്കുകയും ചെയ്യുന്നു. ആഴ്ചയില്‍ മൂന്നോ നാലോ തവണയെങ്കിലും വ്യായാമം ചെയ്യുക, അര മണിക്കൂര്‍ നടത്തം പോലും നിങ്ങളുടെ ശരീരം നല്ല നിലയില്‍ നിലനിര്‍ത്താന്‍ സഹായിക്കും.

മെഡിക്കല്‍ ചെക്കപ്പ് ഒഴിവാക്കുന്നത്

മിക്ക ആളുകളും അവരുടെ കൊളസ്‌ട്രോള്‍, രക്തസമ്മര്‍ദ്ദം, ഹൃദയം എന്നിവയ്ക്കായി പതിവായി പരിശോധനകള്‍ നടത്തുമ്പോള്‍, പലരും കരള്‍ പരിശോധന ഒഴിവാക്കുന്നു. മദ്യം കഴിക്കാത്തവര്‍ പോലും അവരുടെ കരള്‍ പതിവായി പരിശോധിക്കേണ്ടതുണ്ട്. കാരണം പല കരള്‍ രോഗങ്ങളും മദ്യവുമായി ബന്ധപ്പെട്ടതല്ല. രോഗം വളരെ വൈകും വരെ കേടുപാടുകളുടെ ലക്ഷണങ്ങള്‍ കാണിക്കുകയുമില്ല. അതിനാല്‍ പതിവായി കരള്‍ പരിശോധനകള്‍ ചെയ്യുന്നതും ശീലമാക്കുക.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.