കടുത്ത വേനലിൽ വർക്കൗട്ട് ചെയ്യുന്നവരാണോ? ഈ തെറ്റുകൾ വരുത്തിയാൽ പണി പാളും!

ഡൽഹിയിലും ഉത്തരേന്ത്യൻ നഗരങ്ങളിലും ഉഷ്ണതരംഗം കടുക്കുന്ന സാഹചര്യത്തിൽ വ്യായാമമുറകളിൽ മാറ്റം വരുത്തുകയാണ് കായികപ്രേമികൾ. ഉച്ചസമയത്തെ കടുത്ത വെയിൽ ഒഴിവാക്കാൻ വർക്കൗട്ട് സമയത്തിലാണ് പ്രധാനമായും മാറ്റം വരുത്തുന്നത്. സൂര്യാഘാതം ഏൽക്കാതിരിക്കാനും ശാരീരികക്ഷമത നിലനിർത്താനും അതിരാവിലെയോ വൈകുന്നേരമോ വ്യായാമം ചെയ്യുന്നതാണ് ഉചിതമെന്ന് വിദഗ്ധർ നിർദ്ദേശിക്കുന്നു.

വ്യായാമ സമയം മാറ്റിയതുകൊണ്ട് മാത്രം കാര്യമായില്ല, ശരീരത്തിലെ ജലാംശം നിലനിർത്തുന്നതിലും (Hydration) പ്രത്യേക ശ്രദ്ധ വേണം. അമിതമായി വിയർക്കുന്ന വേനൽക്കാലത്ത് വെറും വെള്ളം മാത്രം കുടിക്കുന്നത് ശരീരത്തിന് ആവശ്യമായ മിനറലുകൾ നൽകാൻ പര്യാപ്തമാകില്ല. അതിനാൽ മിനറലുകളുടെ അളവ് നിലനിർത്താൻ കൃത്യമായ ഇടവേളകളിൽ ഇലക്ട്രോലൈറ്റ് അടങ്ങിയ പാനീയങ്ങൾ കുടിക്കാൻ ശ്രമിക്കുക.

ഓട്ടവും വെള്ളംകുടിയും; ഈ കാര്യങ്ങൾ ശ്രദ്ധിക്കാം

ജിമ്മിൽ പോകുന്നതിന് രണ്ട് മണിക്കൂർ മുമ്പ് 500ml വെള്ളമെങ്കിലും കുടിച്ചിരിക്കണം. ചൂട് കൂടുമ്പോൾ ക്രിയാറ്റിൻ (Creatine), കഫീൻ അടങ്ങിയ പ്രീ-വർക്കൗട്ട് ഡ്രിങ്കുകൾ എന്നിവയുടെ ഉപയോഗം നിയന്ത്രിക്കേണ്ടതുണ്ട്. ഇവ നിർജ്ജലീകരണത്തിനും ഹൃദയത്തിന് അമിത സമ്മർദ്ദത്തിനും കാരണമായേക്കാം. ഉഷ്ണതരംഗം അവസാനിക്കുന്നത് വരെ ഇത്തരം സപ്ലിമെന്റുകളുടെ അളവ് കുറയ്ക്കുന്നതാണ് സുരക്ഷിതം.

സപ്ലിമെന്റുകൾ ഉപയോഗിക്കുമ്പോൾ ജാഗ്രത വേണം

ശരീരത്തിലെ മെറ്റബോളിക് ചൂട് നിയന്ത്രിക്കുന്നതിൽ ഭക്ഷണക്രമത്തിന് വലിയ പങ്കുണ്ട്. ചൂട് കൂടുതലുള്ള ആഴ്ചകളിൽ ദഹിക്കാൻ പ്രയാസമുള്ള കനത്ത ഭക്ഷണങ്ങൾ ഒഴിവാക്കി മീൻ, സസ്യഭക്ഷണം തുടങ്ങിയ ലഘുവായ പ്രോട്ടീൻ ഉറവിടങ്ങൾ തിരഞ്ഞെടുക്കാം. കനത്ത ഭക്ഷണം കഴിക്കുന്നത് വ്യായാമത്തിനിടെ തളർച്ചയുണ്ടാക്കാൻ കാരണമാകും. ശരിയായ ഭക്ഷണവും കൃത്യമായ സമയക്രമവും പാലിക്കുന്നത് ഫിറ്റ്നസ് ലക്ഷ്യങ്ങൾ എളുപ്പമാക്കും.

കാലാവസ്ഥയ്ക്ക് അനുസരിച്ച് വ്യായാമത്തിൽ മാറ്റം വരുത്തുന്നത് ആരോഗ്യപരമായ അടിയന്തര സാഹചര്യങ്ങൾ ഒഴിവാക്കാൻ സഹായിക്കും. വർക്കൗട്ടിനിടെ ഹൃദയമിടിപ്പ് ശ്രദ്ധിക്കുകയും തലകറക്കമോ ഓക്കാനമോ തോന്നിയാൽ ഉടൻ വ്യായാമം നിർത്തുകയും ചെയ്യുക. മാറുന്ന കാലാവസ്ഥയ്ക്ക് അനുസരിച്ചുള്ള ഇത്തരം ചെറിയ മാറ്റങ്ങൾ നിങ്ങളുടെ ആരോഗ്യം സംരക്ഷിക്കാനും പേശികളുടെ കരുത്ത് നിലനിർത്താനും സഹായിക്കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.