നടുവ് നിവര്‍ത്താന്‍ പറ്റാത്ത തരത്തിലുള്ള വേദന; നിസ്സാരമായി കണ്ടാല്‍ വരുന്നത് ഈ മാരക പ്രശ്‌നങ്ങള്‍

ഇന്നത്തെ കാലത്ത് മിക്ക ആളുകളെയും നടുവേദന എന്ന പ്രശ്നം അലട്ടുന്നുണ്ട്. ഓഫീസ് ജോലികള്‍ ചെയ്യുന്നവര്‍ വളരെ നേരം തെറ്റായ രീതിയില്‍ ഇരിക്കുന്നത് കാരണം നടുവേദന വരാം. അധ്വാനമുള്ള ജോലികള്‍ ചെയ്യുന്നവര്‍ക്ക് നടുവിനുണ്ടാകുന്ന സമ്മര്‍ദ്ദം മൂലം നടുവേദന വരാം. ചിലപ്പോള്‍ ഈ വേദന വളരെ അസഹനീയമാവുകയും നിങ്ങളുടെ ജോലിയെ ബാധിക്കുകയും ചെയ്യും. ഏറ്റവും സാധാരണമായ ശാരീരിക അസ്വസ്ഥതകളില്‍ ഒന്നാണ് നടുവേദന.

ഇന്ത്യയിലെ 60 ശതമാനം ആളുകളും അവരുടെ ജീവിതത്തിലെ ഏതെങ്കിലും ഘട്ടത്തില്‍ നടുവേദന അനുഭവിക്കുന്നുവെന്ന് പഠനങ്ങള്‍ പറയുന്നു. എന്നാല്‍, നടുവേദന ചിലപ്പോള്‍ ഏതെങ്കിലും വിട്ടുമാറാത്ത അവസ്ഥ കാരണവും വരാം. പല ഗുരുതരമായ പ്രശ്നങ്ങളുടെയും ലക്ഷണമായേക്കാമെന്നതിനാല്‍ നടുവേദന ഒരിക്കലും അവഗണിക്കാതിരിക്കുക. നിങ്ങളുടെ വിട്ടുമാറാത്ത നടുവേദന ചിലപ്പോള്‍ ഇനിപ്പറയുന്ന ആരോഗ്യ പ്രശ്‌നങ്ങളുടെ ലക്ഷണമായേക്കാം.

ഹെര്‍ണിയേറ്റഡ് ഡിസ്‌ക്
നടുവേദന ചിലപ്പോള്‍ നിങ്ങള്‍ക്ക് സ്ലിപ്പ് ഡിസ്‌ക് പ്രശ്നമുണ്ടാക്കും. സ്ലിപ്പ് ഡിസ്‌ക് ഹെര്‍ണിയേറ്റഡ് ഡിസ്‌ക് എന്നും ഇത് അറിയപ്പെടുന്നു. നട്ടെല്ലിന്റെ എല്ലുകളെ താങ്ങിനിര്‍ത്താനും അവയെ അയവുള്ളതാക്കാനും പരിക്കില്‍ നിന്നും ആഘാതത്തില്‍ നിന്നും സംരക്ഷിക്കാനും ചെറിയ പാഡഡ് ഡിസ്‌കുകള്‍ ശരീരത്തിലുണ്ട്. ഏതെങ്കിലും കാരണത്താല്‍ ഇത് ദുര്‍ബലമാകാന്‍ തുടങ്ങും. ഈ സാഹചര്യത്തില്‍, അവയെ സ്ലിപ്പ് ഡിസ്‌കുകള്‍ എന്ന് വിളിക്കുന്നു.

കിഡ്നി സ്റ്റോണ്‍
നടുവേദന ചിലപ്പോള്‍ വൃക്കയിലെ കല്ലുകള്‍ മൂലമാകാം. കിഡ്നിയില്‍ രൂപപ്പെടുന്ന കഠിനമായ നിക്ഷേപമാണ് കിഡ്നി സ്റ്റോണ്‍. ഇത് അസഹനീയമായ വേദനയ്ക്ക് കാരണമാകും. ഇത് പുറത്തിന്റെ താഴ്ഭാഗത്തേക്ക് വ്യാപിക്കും. ഇടയ്ക്കിടെയോ സ്ഥിരമായോ വേദന വരും. കൂടാതെ മൂത്രത്തില്‍ രക്തം, ഇടയ്ക്കിടെ മൂത്രമൊഴിക്കല്‍, ഓക്കാനം തുടങ്ങിയ മറ്റ് ലക്ഷണങ്ങളും ഉണ്ടാകാം. ഈ ലക്ഷണങ്ങളോടൊപ്പം നിങ്ങള്‍ക്ക് കഠിനമായ നടുവേദന അനുഭവപ്പെടുകയാണെങ്കില്‍ ഉടന്‍ വൈദ്യസഹായം തേടണം.

ഓസ്റ്റിയോപൊറോസിസ്
ഓസ്റ്റിയോപൊറോസിസ് എന്ന അവസ്ഥയില്‍ എല്ലുകള്‍ ദുര്‍ബലമാകുകയും ഒടിവുകള്‍ക്ക് സാധ്യത കൂടുതലുമാണ്. ഏത് പ്രായത്തിലും ഇത് സംഭവിക്കാം. ഓസ്റ്റിയോപൊറോസിസ് വഷളാകുമ്പോള്‍ കശേരുക്കളുടെ ഒടിവുകള്‍ കാരണം കഠിനമായ നടുവേദന വരാം.

സ്പൈനല്‍ സ്റ്റെനോസിസ്
നട്ടെല്ലിനെ ബാധിക്കുന്ന ഗുരുതരമായ രോഗമാണ് സ്പൈനല്‍ സ്റ്റെനോസിസ്. ഈ രോഗത്തില്‍ സുഷുമ്നാ കനാല്‍ ചുരുങ്ങുന്നു. തല്‍ഫലമായി, കനാലുകള്‍ക്കുള്ളിലെ ഞരമ്പുകളില്‍ സമ്മര്‍ദ്ദമുണ്ടാകുന്നു. അത് വേദനയ്ക്ക് കാരണമാകുന്നു. ഈ പ്രശ്നത്താല്‍ ബുദ്ധിമുട്ടുന്ന ആളുകള്‍ക്ക് കാല്‍നടയായി അധികദൂരം സഞ്ചരിക്കാന്‍ ബുദ്ധിമുട്ടാകുന്നു. വയറ്റില്‍ കഠിനമായ വേദനയുണ്ടാകും.

സന്ധിവാതം
റൂമറ്റോയ്ഡ് ആര്‍ത്രൈറ്റിസ് അല്ലെങ്കില്‍ അങ്കൈലോസിംഗ് സ്‌പോണ്ടിലൈറ്റിസ് പോലുള്ള കോശജ്വലന അവസ്ഥകള്‍ താഴത്തെ പുറം ഉള്‍പ്പെടെയുള്ള സന്ധികളില്‍ വിട്ടുമാറാത്ത വീക്കത്തിനും കാഠിന്യത്തിനും കാരണമാകും. ഇതുമൂലം പലപ്പോഴും നടുവേദന അനുഭവപ്പെടും. യു.ടി.ഐ പോലുള്ള ചില ആന്തരിക അണുബാധകളും നടുവേദനയ്ക്ക് കാരണമാകും.

നടുവേദനയ്ക്ക് ചില പ്രതിവിധികള്‍
നടത്തം
നിങ്ങള്‍ നടക്കുകയോ മിതമായ വ്യായാമം ചെയ്യുകയോ ചെയ്താല്‍ നടുവേദന കുറയ്ക്കാന്‍ സാധിക്കും. നടുവേദനയുള്ളവര്‍ ദിവസവും 30 മിനിറ്റെങ്കിലും നടക്കണം. ഒരാള്‍ നിഷ്‌ക്രിയനാണെങ്കില്‍ അവന്റെ നട്ടെല്ലും പുറകിലുമുള്ള പേശികളും ദുര്‍ബലമാകും. ഇത് വീണ്ടും വേദനയ്ക്ക് കാരണമാകുന്നു.

സ്‌ട്രെച്ചിംഗ് വ്യായാമങ്ങള്‍
അടിവയറ്റിലെ പ്രധാന പേശികള്‍ നിങ്ങളുടെ പിന്‍ഭാഗത്തെ പിന്തുണയ്ക്കാന്‍ സഹായിക്കുന്നു. ശക്തിയും വഴക്കവും നിങ്ങളുടെ വേദന ഒഴിവാക്കാനും തടയാനും സഹായിക്കും. അതുകൊണ്ട് സ്‌ട്രെച്ചിംഗ്, ബാക്ക് സ്‌ട്രെങ്തിംഗ് വ്യായാമങ്ങള്‍ ചെയ്യാന്‍ മറക്കരുത്. ഇതിനായി യോഗ, പൈലേറ്റ്‌സ്, തായ് ചി എന്നിവ ചെയ്യുക. ഇടുപ്പിനും ചുറ്റുമുള്ള പേശികളെ ശക്തിപ്പെടുത്താനും ഈ വ്യായാമങ്ങള്‍ നിങ്ങളെ സഹായിക്കും.

ശരിയായ ഇരുത്തം
ശരിയായ പോസ്ചര്‍ നിങ്ങളുടെ നടുവിന്റെ മര്‍ദ്ദം കുറയ്ക്കാന്‍ സഹായിക്കുന്നു. നിങ്ങളുടെ തോളില്‍ ചരിക്കുകയോ താടി മുന്നോട്ട് ചരിക്കുകയോ ചെയ്യരുത്. ഇത് ചെയ്യുന്നതിലൂടെ നടുവിന് കൂടുതല്‍ ലോഡ് വരുന്നു. നിങ്ങള്‍ ഒരു കമ്പ്യൂട്ടറിനു മുന്നില്‍ ഇരുന്ന് ജോലി ചെയ്യുകയാണെങ്കില്‍ നിങ്ങളുടെ കൈകള്‍ ടേബിളില്‍ പരത്തി വയ്ക്കുക.

ശരീരഭാരം ക്രമമാക്കുക
ഒരാള്‍ക്ക് അമിതഭാരമുണ്ടെങ്കില്‍ അയാള്‍ക്ക് നടുവേദനയുണ്ടാകാനുള്ള സാധ്യത കൂടുതലാണ്. നടുവേദന ഒഴിവാക്കാന്‍ ശരീരഭാരം കുറയ്ക്കുക. അങ്ങനെ നിങ്ങളുടെ നടുവിന്റെ സമ്മര്‍ദ്ദം കുറയ്ക്കാന്‍ കഴിയും.

പുകവലി ഉപേക്ഷിക്കുക
നിങ്ങള്‍ പുകവലിക്കുന്നവരാണെങ്കില്‍ നട്ടെല്ല് സംബന്ധമായ പ്രശ്‌നങ്ങള്‍ ഉണ്ടാകാനുള്ള സാധ്യത പുകവലിക്കാത്തവരേക്കാള്‍ 4 മടങ്ങ് കൂടുതലാണെന്ന് ഗവേഷണങ്ങള്‍ കാണിക്കുന്നു. സിഗരറ്റിലെയും മറ്റ് പുകയില ഉല്‍പന്നങ്ങളിലെയും നിക്കോട്ടിന്‍ നിങ്ങളുടെ നട്ടെല്ലിലെ എല്ലുകളെ ദുര്‍ബലപ്പെടുത്തും.

ഐസ് പായ്ക്ക്
നടുവേദനയ്ക്ക് ആശ്വാസം ലഭിക്കാന്‍ ഐസ് വയ്ക്കുന്നത് വളരെ നല്ല മാര്‍ഗമാണ്. പുറം വീക്കമോ വേദനയോ കൊണ്ട് അസ്വസ്ഥരാണെങ്കില്‍, ഐസ് സാധാരണയായി നിങ്ങള്‍ക്ക് ഏറ്റവും ആശ്വാസം നല്‍കുന്നു. പേശികളെ ശാന്തമാക്കാന്‍ ശ്രമിക്കുകയാണെങ്കില്‍ ഒരു ഐസ് പാക്ക് മികച്ചതാണ്. 20 മിനിറ്റ് ഐസിംഗ് നിങ്ങളുടെ നടുവേദനയ്ക്ക് ആശ്വാസം നല്‍കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.