ഗോവണി കയറി ഫിറ്റ്‌നസിലേയ്ക്ക്

Living

oi-Siji KM

By Lakshmi

Published: Saturday, August 7, 2010, 14:12 [IST]

കൂടിക്കൂടിവരുന്ന ശരീരഭാരം പലരുടെയും ഉറക്കം കെടുത്താറുണ്ട്. എന്നാല്‍ അത് കുറയ്ക്കാന്‍ എന്തെങ്കിലും കാര്യമായി ചെയ്യുകയെന്നത് പലര്‍ക്കും വലിയ മടിയുള്ള കാര്യമാണ്.

ഡയറ്റ് ചെയ്യണം വ്യായാമം ചെയ്യണം എന്നിങ്ങനെ ആലോചിക്കുകയും പറയുകയുമല്ലാതെ ചെയ്ത് അത് ശീലത്തിന്റെ ഭാഗമാക്കി ശരീരത്തിന്റെ ഫിറ്റ്‌നസ് നിലനിര്‍ത്തുന്നവര്‍വളരെ കുറവാണ്.

തടികുറയ്ക്കുന്നതിനെക്കുറിച്ച് 24മണിക്കൂറും ആലോചിക്കാറുള്ളയാളുകള്‍ പോലും ഓഫീസിലേയ്ക്ക് കയറുമ്പോള്‍ ലിഫ്റ്റും, ഗോവണിയും കണ്ടാല്‍ എത്രയും പെട്ടെന്ന് ലിഫ്റ്റില്‍ കയറി സ്റ്റാര്‍ട്ട് ബട്ടന്‍ അമര്‍ത്തുകയാണ് ചെയ്യാറുള്ളത്.

അല്ലാതെ ഒരു ദിവസമെങ്കിലും ഗോവണി കയറിക്കളയാം എന്ന് ചിന്തിക്കാറില്ല. ഫിറ്റ്‌നെസ്സിനായി മറ്റ് ചെലവൊന്നുമില്ലാതെ ചെയ്യാന്‍ കഴിയുന്ന കാര്യമാണ് ഈ ഗോവണി കയറ്റം. ഒരു നാല് നിലവരെ സുഖമായി കയറാവുന്നതല്ലേയുള്ളു.

ആഴ്ചയില്‍ കുറഞ്ഞത് മൂന്നു ദവിസമെങ്കിലും ലിഫ്റ്റിന്റെ സഹായം മൂന്നു നിലവരെയെങ്കിലും ഒഴിവാക്കിനോക്കൂ, പിന്നീട് കൂടുതല്‍ക്കൂടുതല്‍ ദൂരം നിങ്ങള്‍ക്ക് നടന്ന് കയറാന്‍ കഴിയും. കാലുകളിലെ പേശിയ്ക്ക് ആയാസക്കുറവ് തോന്നും.

പിന്നീട് ഈ ശീലം ദിവസം രണ്ടു വട്ടം പടികള്‍ ഇറങ്ങുകയും കയറുകയും ചെയ്യുകയെന്നതിലേയ്ക്ക് എത്തിക്കുക. കാപ്പി കുടിയ്ക്കാനും ചോറുണ്ണാനും മറ്റുമായി പോകുമ്പോള്‍ വെറുതെ കയ്യും വീശിയങ്ങ് നടക്കുക ലാഭംമാത്രമേയുണ്ടാകൂ.

അടുത്തിടെ ഡുബ്ലിന്‍ യൂണിവേഴ്‌സിറ്റി കോളെജില്‍ നടന്ന ഒരു പഠനവും പറയുന്നത് ഗോവണികയറ്റം നല്ല വ്യായാമമാണെന്നാണ്. ഇവിടെ നടത്തിയ പഠനത്തില്‍ എട്ടാഴ്ച(ആഴ്ചയില്‍ 5ദിവസം എന്ന തരത്തില്‍)ഒരു കൂട്ടം സ്ത്രീകളോട് ദിവസം രണ്ടു വട്ടമായി 199 പടികള്‍ കയറാനും ഇറങ്ങാനും പറഞ്ഞു.

മിനിറ്റില്‍ 90 പടികള്‍ കയറുകയെന്നതായിരുന്നു നിര്‍ദ്ദേശം. എട്ടാഴ്ച കഴിഞ്ഞപ്പോള്‍ ഇവരില്‍ 17ശതമാനത്തോളം എയ്‌റോബിക് ഫിറ്റ്‌നസ് ഉണ്ടായതായികണ്ടെത്തി. മാത്രവുമല്ല ഇവരുടെ ശരീരത്തില്‍ എല്‍ഡിഎല്‍ കൊളസ്‌ട്രോള്‍ 8ശതമാനം കുറയുകയും ചെയ്തു.

എന്തായാലും പരീക്ഷച്ചുനോക്കൂ, ഷുഗര്‍ ഫ്രീ ഗോള്‍ഡിന്റെ പരസ്യത്തില്‍ തെന്നിന്ത്യന്‍ സൂപ്പര്‍നായിക ശ്രീയ ശരണ്‍ പറയുന്നത് കേട്ടിട്ടില്ലേ, ഫിറ്റ്‌നസ്സിലേയ്ക്കുള്ള ആദ്യ ചുവടുവെപ്പാണ് നടത്തമെന്ന്, അതേ ഷുഗര്‍ഫ്രീ ഗോള്‍ഡ് നല്ലതോ ചീത്തയോ എന്തുമായിക്കൊള്ളട്ടേ പക്ഷേ ആ വാചകത്തില്‍ കഴമ്പുണ്ട്, പടികയറൂ ഫിറ്റ്‌നസ് സ്വന്തമാക്കാം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.