വന്ധ്യത മുതല്‍ സ്ട്രോക്ക് വരെ; 8 മണിക്കൂര്‍ ഉറങ്ങിയില്ലെങ്കില്‍ യുവതികള്‍ നേരിടുന്ന അപകടം

ഉറക്കം എത്രമാത്രം പ്രധാനമാണെന്ന് നമുക്കെല്ലാവര്‍ക്കും അറിയാം. ശരീരത്തിന്റെ ആരോഗ്യം നിലനിര്‍ത്താന്‍ ദിവസവും 7 മുതല്‍ 8 മണിക്കൂര്‍ വരെ ഉറങ്ങേണ്ടത് വളരെ പ്രധാനമാണ്. മാനസികമായും ശാരീരികമായും ആരോഗ്യം നിലനിര്‍ത്താന്‍ മതിയായ ഉറക്കം ലഭിക്കുന്നത് വളരെ പ്രധാനമാണ്. എന്നാല്‍ ഉറക്കക്കുറവ് മൂലം ഗുരുതരമായ പല രോഗങ്ങളും ഉണ്ടാകാനുള്ള സാധ്യതയുണ്ട്. ഇന്നത്തെ കാലത്ത് ഉറക്കമില്ലായ്മ എന്ന പ്രശ്നം പലരെയും അലട്ടുന്നുണ്ട്. അമിതമായ മൊബൈല്‍ ഫോണ്‍ ഉപയോഗം, സമ്മര്‍ദ്ദം, വിഷാദം, മോശം ജീവിതശൈലി എന്നിവ കാരണം മിക്ക ആളുകളും ഉറക്കക്കുറവിന് ഇരയാകുന്നു.

ഉറക്കമില്ലായ്മ എല്ലാതരത്തിലുള്ള ആളുകളുടെയും ആരോഗ്യത്തെ പ്രതികൂലമായി ബാധിക്കുന്നു. എന്നാല്‍ യുവതികളായ സ്ത്രീകളെ ഉറക്കക്കുറവ് കാര്യമായ രീതിയില്‍ ബാധിക്കുന്നുവെന്ന് പഠനങ്ങള്‍ പറയുന്നു. ഫെര്‍ട്ടിലിറ്റി പ്രശ്‌നങ്ങള്‍ മുതല്‍ സ്‌ട്രോക്ക്, അല്‍ഷിമേഴ്‌സ് രോഗം വരെ ഇതില്‍ പെടുന്നു. ഉറക്കക്കുറവ് മൂലം യുവതികള്‍ക്ക് എന്തൊക്കെ പ്രശ്നങ്ങള്‍ നേരിടേണ്ടി വരുമെന്ന് നമുക്ക് നോക്കാം.

ഉറക്കവും ആരോഗ്യവും തമ്മിലുള്ള ബന്ധം

നിരവധി ആരോഗ്യപ്രശ്‌നങ്ങളുമായി ഉറക്കക്കുറവ് ബന്ധപ്പെട്ടിരിക്കുന്നു. യുവതികള്‍ അതിന്റെ ഏറ്റവും ആശങ്കാജനകമായ ഒരു അനന്തരഫലമാണ് വന്ധ്യത. ക്രമരഹിതമായ ഉറക്ക രീതികള്‍ ഹോര്‍മോണ്‍ ബാലന്‍സ് തടസ്സപ്പെടുത്തുകയും ഗര്‍ഭധാരണത്തില്‍ ബുദ്ധിമുട്ടുകള്‍ ഉണ്ടാക്കുകയും ചെയ്യുമെന്ന് ഗവേഷണങ്ങള്‍ തെളിയിച്ചിട്ടുണ്ട്. മാത്രമല്ല, വേണ്ടത്ര ഉറക്കം ലഭിക്കാത്തത് സ്‌ട്രോക്ക് വരാനുള്ള സാധ്യതയും കൂട്ടുന്നു. രാത്രിയില്‍ ആറ് മണിക്കൂറില്‍ താഴെ മാത്രം ഉറങ്ങുന്ന 45 വയസ്സിന് താഴെയുള്ള സ്ത്രീകളില്‍ സ്‌ട്രോക്ക് വരാനുള്ള സാധ്യത കൂടുതലാണെന്ന് പഠനങ്ങള്‍ കണ്ടെത്തിയിട്ടുണ്ട്. ഹൃദയ സംബന്ധമായ അസുഖങ്ങള്‍ക്കെതിരായ പ്രതിരോധ നടപടിയായും ഉറക്കത്തിന് മുന്‍ഗണന നല്‍കണം.

ഓര്‍മ്മക്കുറവ്, അലസത, അല്‍ഷിമേഴ്‌സ്

മോശം ഉറക്കവും അല്‍ഷിമേഴ്സ് രോഗവും തമ്മിലുള്ള ബന്ധത്തെ സൂചിപ്പിക്കുന്ന തെളിവുകളും ഇന്നത്തെക്കാലത്ത് വര്‍ദ്ധിച്ചുകൊണ്ടിരിക്കുകയാണ്. വിഷവസ്തുക്കളെ നീക്കം ചെയ്യാനുള്ള തലച്ചോറിന്റെ കഴിവില്‍ ഉറക്കം നിര്‍ണായക പങ്ക് വഹിക്കുന്നു, ഈ പ്രക്രിയയിലെ തടസ്സങ്ങള്‍ ന്യൂറോ ഡിജനറേറ്റീവ് അവസ്ഥകളുടെ വികാസത്തിന് കാരണമായേക്കാം. വേണ്ടത്ര ഉറക്കം ലഭിക്കാതെ വരുന്ന യുവതികളുടെ ഭാവി ജീവിതത്തില്‍ വൈജ്ഞാനിക പ്രശ്‌നങ്ങള്‍ക്ക് സാധ്യത വര്‍ധിക്കുന്നു. കുറച്ച് മാത്രം ഉറങ്ങുന്ന യുവതികള്‍ക്ക് ഏകാഗ്രതയും ഓര്‍മ്മക്കുറവും ഉള്‍പ്പെടെയുള്ള വൈജ്ഞാനിക വൈകല്യവും അനുഭവപ്പെടുന്നു. ഇത് നിങ്ങളുടെ അക്കാദമിക്, പ്രൊഫഷണല്‍ രംഗത്തും മൊത്തത്തിലുള്ള ജീവിത നിലവാരത്തിനും അഗാധമായ പ്രത്യാഘാതങ്ങള്‍ ഉണ്ടാക്കും.

ദുര്‍ബലമായ പ്രതിരോധശേഷി

ഉറക്കക്കുറവ് മൂലം രോഗപ്രതിരോധ ശേഷി കുറയാന്‍ തുടങ്ങുന്നു. രോഗപ്രതിരോധ ശേഷി ശക്തിപ്പെടുത്തുന്നതിന് മതിയായ ഉറക്കം ലഭിക്കേണ്ടത് വളരെ പ്രധാനമാണ്.

ശരീരഭാരം കൂടുന്നു

ഉറക്കക്കുറവ് മൂലം ശരീരഭാരവും കൂടാന്‍ തുടങ്ങും. നിങ്ങള്‍ക്ക് വേണ്ടത്ര ഉറക്കം ലഭിച്ചില്ലെങ്കില്‍, നിങ്ങള്‍ക്ക് കൂടുതല്‍ വിശപ്പ് അനുഭവപ്പെടാന്‍ തുടങ്ങും. നല്ല രീതിയില്‍ ഭക്ഷണം കഴിക്കുന്നതോടെ ശരീരഭാരവും വര്‍ദ്ധിക്കും.

പ്രമേഹ പ്രശ്‌നം

ഇന്നത്തെ കാലത്ത് മിക്ക ആളുകളെയും പിടികൂടുന്ന ഒരു ആരോഗ്യ പ്രശ്‌നമാണ് പ്രമേഹം. ഇതിന് ഒരു കാരണം വേണ്ടത്ര ഉറക്കം ലഭിക്കാത്തതാണ്. മതിയായ ഉറക്കം ലഭിക്കാത്തതിനാല്‍ രക്തത്തിലെ പഞ്ചസാരയുടെ അളവ് വര്‍ദ്ധിക്കാന്‍ തുടങ്ങും. രക്തത്തിലെ പഞ്ചസാരയുടെ അളവ് കൂടുന്നതിനാലാണ് പ്രമേഹം എന്ന പ്രശ്‌നം ഉണ്ടാകുന്നത്. പ്രമേഹത്തില്‍ നിന്ന് രക്ഷനേടാനായി നിങ്ങള്‍ ദിനവും നല്ല ഉറക്കം നേടുക.

മാനസിക സമ്മര്‍ദ്ദം

ഉറക്കക്കുറവ് മാനസിക സമ്മര്‍ദ്ദത്തിന് കാരണമാകും. നല്ല ഉറക്കം ലഭിക്കാത്തവരുടെ മാനസികാവസ്ഥ പലപ്പോഴും മാറാന്‍ തുടങ്ങും. മാനസിക പിരിമുറുക്കത്തില്‍ നിന്ന് വിട്ടുനില്‍ക്കാന്‍, ദിവസവും നല്ലതും ആഴത്തിലുള്ളതുമായ ഉറക്കം ലഭിക്കേണ്ടത് വളരെ പ്രധാനമാണ്.

ഏകാഗ്രതയുടെ അഭാവം

ഉറക്കക്കുറവ് കാരണം പകല്‍ സമയത്ത് ഒരു ജോലിയും ചെയ്യാന്‍ തോന്നില്ല. വിട്ടുമാറാത്ത അലസത നിങ്ങളെ പിടികൂടിയേക്കാം. ഉറക്കക്കുറവ് കാരണം ഏകാഗ്രതയും കുറയാന്‍ തുടങ്ങുന്നു. ഇത് നിങ്ങളുടെ ജോലിയിലെ കാര്യക്ഷമതയെയും പ്രതികൂലമായി ബാധിക്കുന്നു.

ഉയര്‍ന്ന രക്തസമ്മര്‍ദ്ദ പ്രശ്‌നം

ആരോഗ്യം നിലനിര്‍ത്താന്‍ ദിവസവും 7 മുതല്‍ 8 മണിക്കൂര്‍ വരെ ഉറങ്ങേണ്ടത് അത്യാവശ്യമാണ്. ഉറക്കക്കുറവ് മൂലം ഉയര്‍ന്ന രക്തസമ്മര്‍ദ്ദം പ്രശ്‌നം പലരും അഭിമുഖീകരിക്കുന്നുണ്ട്. ഉയര്‍ന്ന രക്തസമ്മര്‍ദ്ദമുള്ള രോഗികള്‍ക്ക് രാത്രി നല്ല ഉറക്കം വേണം. ദിവസവും മതിയായ ഉറക്കം ലഭിക്കാതെ വന്നാല്‍ നിങ്ങളുടെ രക്തസമ്മര്‍ദ്ദ നില അപകടത്തിലാകുമെന്ന കാര്യം മറക്കാതിരിക്കുക.

ഹൃദയ സംബന്ധമായ പ്രശ്‌നങ്ങള്‍

ഉറക്കക്കുറവ് മൂലം നിങ്ങള്‍ക്ക് ഹൃദയസംബന്ധമായ പ്രശ്‌നങ്ങള്‍ ഉണ്ടാകാം. അതിനാല്‍ നല്ല ആരോഗ്യം നിലനിര്‍ത്താന്‍, മതിയായ ഉറക്കം ലഭിക്കേണ്ടത് വളരെ പ്രധാനമാണ്. ഹൃദയസംബന്ധമായ പ്രശ്‌നങ്ങള്‍ ഒഴിവാക്കാന്‍, ദിവസവും കുറഞ്ഞത് 7 മുതല്‍ 8 മണിക്കൂര്‍ വരെ ഉറക്കം ശീലമാക്കുക.

പ്രായത്തിനനുസരിച്ച് ഉറക്ക സമയം

വൈജ്ഞാനിക പ്രവര്‍ത്തനങ്ങള്‍ വീണ്ടെടുക്കാനും ശരീരം സ്വയം നന്നാക്കാനും ഉറക്കം പ്രധാനമാണ്. സ്ത്രീകള്‍ക്ക് പുരുഷന്മാരേക്കാള്‍ 20 മിനിറ്റ് കൂടുതല്‍ ഉറക്കം ആവശ്യമാണെന്ന് സമീപകാല ഗവേഷണങ്ങള്‍ തെളിയിച്ചിട്ടുണ്ട്. ദൈനംദിന പ്രവര്‍ത്തനങ്ങളില്‍ നിന്ന് കരകയറാന്‍ സ്ത്രീകള്‍ക്ക് പുരുഷന്മാരേക്കാള്‍ കൂടുതല്‍ ഉറക്കം ആവശ്യമായി വരും. ഉറക്കത്തിന്റെ പാറ്റേണുകള്‍ പ്രായത്തിനനുസരിച്ച് മാറുന്നു.

40 വയസ്സിനു മുകളിലുള്ള വ്യക്തികളില്‍, ഉറക്ക രീതികളില്‍ കാര്യമായ മാറ്റങ്ങള്‍ ഉണ്ടായേക്കാം. ആരോഗ്യത്തിനും ശാരീരിക പ്രവര്‍ത്തനത്തിനും വേണ്ടി ശരാശരി മുതിര്‍ന്ന ഒരാള്‍ക്ക് രാത്രിയില്‍ 7-9 മണിക്കൂര്‍ ഉറക്കം ആവശ്യമാണ്. പ്രായത്തിനനുസരിച്ച് ഉറക്കത്തിന്റെ ആവശ്യകതകള്‍ കുറയുമെങ്കിലും, പ്രായമായവര്‍ക്ക് രാത്രിയില്‍ 7-8 മണിക്കൂര്‍ ഉറക്കം ആവശ്യമാണ്. നവജാതശിശുക്കള്‍ക്കും കുട്ടികള്‍ക്കുമാണ് ഏറ്റവും കൂടുതല്‍ ഉറക്കം ആവശ്യമായി വരുന്നത്.

നല്ല ഉറക്കത്തിന്

നല്ല ഉറക്കത്തിനായി ഉറക്ക ശുചിത്വത്തിന് മുന്‍ഗണന നല്‍കുക. സ്ഥിരമായി ഒരു ഉറക്ക ഷെഡ്യൂള്‍ പാലിക്കുക. കൃത്യമായ സമയത്ത് ഉറങ്ങുകയും എണീക്കുകയും ചെയ്യുക. ദിവസവും അല്‍പനേരം വ്യായാമത്തിനായി സമയം മാറ്റിവയ്ക്കുക. വൈകുന്നേരങ്ങളില്‍ കഫീന്‍ പോലുള്ള ഉത്തേജക പാനീയങ്ങള്‍ ഒഴിവാക്കുക. മുറിയില്‍ നല്ല ഉറക്ക അന്തരീക്ഷം സെറ്റ് ചെയ്യുക. രാത്രി അധികനേരം ഫോണില്‍ കളിക്കാതിരിക്കുക. ഇതെല്ലാം ചെയ്യുന്നത് മികച്ച ഉറക്കം നേടാന്‍ നിങ്ങളെ സഹായിക്കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.