പുരുഷന് ചേരും ഡയറ്റുകള്‍

പുരുഷന്മാരുടെയും സ്ത്രീകളുടേയും ശരീരപ്രകൃതി വ്യത്യസ്തമാണ്. അതുകൊണ്ട് ഇരു കൂട്ടരും എടുക്കേണ്ട ഡയറ്റുകളിലും വ്യത്യാസമുണ്ട്. ഇതനുസരിച്ച് ഇരുകൂട്ടരും ഉള്‍പ്പെടുത്തേണ്ട ഭക്ഷണങ്ങളും വ്യത്യസ്തം തന്നെ. ഡയറ്റെടുത്ത് തടി കുറയ്ക്കാന്‍ നോക്കുന്ന പുരുഷന്മാര്‍ക്ക് സ്വീകരിക്കാനാകുന്ന ഡയറ്റ് മാര്‍ഗങ്ങളിതാ,

സ്ത്രീകളേക്കാളും പുരുഷന്മാര്‍ക്ക് ഹൃദയരോഗങ്ങള്‍ വരാനുള്ള സാധ്യത കൂടുതലാണെന്നു പറയും. ഇതുകൊണ്ടു തന്നെ ഹൃദയാരോഗ്യത്തിനുള്ള ഭക്ഷണങ്ങള്‍ ഇവര്‍ ആഹാരക്രമത്തില്‍ ഉള്‍പ്പെടുത്തുകയും വേണം. കൊളസ്‌ട്രോള്‍ കുറയ്ക്കുന്ന, കൊഴുപ്പു കുറഞ്ഞ, എന്നാല്‍ പ്രോട്ടീന്‍ അംശം ധാരാളമുള്ള ഭക്ഷണമാണ് ഇവര്‍ കഴിയ്‌ക്കേണ്ടതും.

കൊഴുപ്പില്ലാത്ത ഇറച്ചി, മീന്‍, മുട്ടവെള്ള, ഒലീവ് ഓയില്‍ തുടങ്ങിയവ ഇവര്‍ക്ക് ഭക്ഷണത്തില്‍ ഉള്‍പ്പെടുത്താം. പച്ചക്കറികളും ഭക്ഷണത്തില്‍ ഉള്‍പ്പെടുത്തുക.

സ്ത്രീകളേക്കാള്‍ കൂടുതല്‍ പ്രോട്ടീന്‍ കലര്‍ന്ന ഭക്ഷണങ്ങള്‍ പുരുഷന്മാര്‍ക്ക് വേണം. അതേ സമയം കാര്‍ബോഹൈഡ്രേറ്റിന്റെ അളവ് കുറഞ്ഞിരിക്കുകയും വേണം. അരിയാഹാരം കുറയ്ക്കുക. അതേ സമയം പയര്‍ വര്‍ഗങ്ങള്‍ ധാരാളം ഭക്ഷണത്തില്‍ ഉള്‍പ്പെടുത്തണം.

പാലിയോ ഡയറ്റ് എന്നൊരു ഡയറ്റുണ്ട്. ഗുഹാമനുഷ്യര്‍ ഉപയോഗിച്ചിരുന്ന രീതി. ഇതില്‍ പുരുഷന്മാര്‍ക്കാവശ്യമായ എല്ലാതരം ഭക്ഷണങ്ങളും ഉള്‍പ്പെടുത്തിയിട്ടുണ്ടെന്നതാണ് വാസ്തവം. പച്ചക്കറികള്‍, പഴങ്ങള്‍, മീന്‍, മുട്ട, ഇറച്ചി എന്നിവ ഉള്‍പ്പെടുത്തിയിരിക്കുന്ന ഈ ഡയറ്റില്‍ പഞ്ചസാര. ഉപ്പ്, ബട്ടര്‍ തുടങ്ങിയവയെല്ലാം തീരെ കുറച്ചിരിക്കുന്നു. ഇൗ ഡയറ്റ് പുരുഷന്മാര്‍ക്ക് പിന്‍തുടരാവുന്ന ഒരു ഡയറ്റാണ്.

സ്ത്രീകളെപ്പോലെ പുരുഷന്മാരും വയര്‍ കുറയ്ക്കാന്‍ ഇഷ്ടപ്പെടുന്നവരാണ്. വയറ്റിലും മസിലുകളുണ്ടാകാന്‍ ആഗ്രഹിക്കുന്നവരാണ്. ഇത്തരക്കാര്‍ക്ക് പച്ചക്കറികള്‍, പഴവര്‍ഗങ്ങള്‍, സാലഡുകള്‍, ധാധ്യങ്ങള്‍ എന്നിവയ്ക്ക് മുന്‍തൂക്കം നല്‍കിക്കൊണ്ടുള്ള ആബ്‌സ് ഡയറ്റ് സ്വീകരിക്കാം. ഇത്തരം ഡയറ്റ് ഒരു പരിധി കഴിഞ്ഞ് വെള്ളം കുടിയ്ക്കുന്നതു പോലും നിയന്ത്രിക്കുന്നു.

സോണ്‍ ഡയറ്റ് എന്നൊരു ഡയറ്റുണ്ട്. ഇത് ശരീരത്തിന്റെ അപചയപ്രവര്‍ത്തനങ്ങള്‍ നിയന്ത്രിക്കുന്ന ഒരു ഡയറ്റാണെന്നു പറയാം. ഇതില്‍ 30 ശതമാനം പ്രോട്ടീന്‍, 30 ശതമാനം ഫാറ്റ്, 40 ശതമാനം കാര്‍ബോഹൈഡ്രേറ്റ് എന്നിവ ഉള്‍പ്പെടുന്നു. കൊഴുപ്പ് പെട്ടെന്നു കുറയ്ക്കുന്ന ഒരു ഡയറ്റാണിത്.

ഇത്തരം മാര്‍ഗങ്ങള്‍ അവലംബിക്കുന്നത് പുരുഷാരോഗ്യം നിലനിര്‍ത്താന്‍ സഹായിക്കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.