വ്യായാമം ശീലമാക്കാന്‍ വഴിയുണ്ട്

വ്യായാമം പല്ലുതേപ്പും കുളിയും ഭക്ഷണം കഴിക്കുന്നതുമൊക്കെ പോലെ തന്നെ ഒരു സ്വാഭാവമാക്കി മാറ്റിക്കൂടെ. ഇതിനെന്താകും വഴിയെന്നായിരിക്കും ചിന്തിക്കുന്നത്.

ഒരു ലക്ഷ്യം മുന്നില്‍ വയ്ക്കാതെ വ്യായാമം ചെയ്യുക. ഒരു മാസം വ്യായാമം ചെയ്ത് തടി കുറയ്ക്കണമെന്നൊരു ലക്ഷ്യം മുന്നില്‍ വച്ച് വ്യായാമം ചെയ്‌തെന്നിരിക്കൂ. തടി കുറയാതെ വന്നാല്‍ ഇതിനോടുള്ള താല്‍പര്യമേ ഇല്ലാതാകും. തടി കുറഞ്ഞില്ലല്ലോ എന്നായിരിക്കും തോന്നുക. തടി കുറഞ്ഞാലുമുണ്ട് പ്രശ്‌നം. തടി കുറഞ്ഞല്ലോയെന്നോര്‍ത്ത് വ്യായാമം നിര്‍ത്തും. നല്ലത് പ്രത്യേക ലക്ഷ്യങ്ങളൊന്നും തന്നെ മുന്നില്‍ വയ്ക്കാതെ വ്യായാമം ചെയ്യുന്നതു തന്നെയാണ്.

കഴിവതും രാവിലെ തന്നെ വ്യായാമം ചെയ്യുക. ഇതിനായി ഒരു സമയം നിശ്ചയിക്കുക. ആ സമയത്തു തന്നെ ചെയ്യുകയും വേണം. പണികള്‍ ഒഴിഞ്ഞിട്ടു വ്യായാമം ചെയ്യാമെന്നു കരുതരുത്. പിന്നീടിത് നടക്കാതെ വരും.

ഒറ്റക്കു വ്യായാമം ചെയ്യുന്നതിനേക്കാള്‍ ഏതെങ്കിലും സുഹൃത്തുക്കളുടെ കൂടെ ചെയ്യുന്നതായിരിക്കും. ഇത് നിര്‍ബന്ധമായും വ്യായാമം ചെയ്യാനുള്ള ഒരു കാരണം കൂടിയാകും. മടി തോന്നിയാലും സുഹൃത്തുണ്ടല്ലോ എന്നു കരുതി വ്യായാമത്തിന് പുറപ്പെടും.

വ്യായാമം ചെയ്യാനായി വ്യായാമം ചെയ്യരുത്. ആസ്വദിച്ചു ചെയ്യുക. വേണമെങ്കില്‍ പാട്ടു കേട്ട് വ്യായാമം ചെയ്യാം. വ്യായാമത്തിന്റെ ഒരു ബുദ്ധിമുട്ട് അനുഭവപ്പെടുകയില്ല. അവനവന് ആവുന്ന വിധത്തിലുള്ള വ്യായാമങ്ങള്‍ ചെയ്യാനും ശ്രദ്ധിക്കണം. അല്ലെങ്കില്‍ വ്യായാമത്തോടുള്ള താല്‍പര്യമേ ഇല്ലാതാകും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.