ഡയറ്റിനെ കൊല്ലരുത്

പലരും ചില ഇഷ്ടപ്പെട്ട ഭക്ഷണങ്ങള്‍ കണ്ടാല്‍ ഡയറ്റ് മറക്കുകയാണ് പതിവ്. ആര്‍ത്തി അടക്കാനാവാതെ ഇത്തരം ഭക്ഷണങ്ങള്‍ വാരിവലിച്ചു കഴിയ്ക്കും. ഇതോടെ ഡയറ്റിന്റെ താളം തെറ്റുകയും ചെയ്യും. ഭക്ഷണം നിങ്ങളെ നിയന്ത്രിക്കാതെ, ഭക്ഷണത്തെ നിങ്ങള്‍ നിയന്ത്രിക്കാന്‍ ശീലിക്കണം.

നല്ല ഭക്ഷണം, ചീത്ത ഭക്ഷണം എന്ന വേര്‍തിരിവില്‍ നിര്‍ത്താതെ വേണമെങ്കില്‍ എല്ലാ ഭക്ഷണവും കഴിയ്ക്കാം. നിയന്ത്രിതമായ അളവിലാണെന്നു മാത്രം. അല്ലാതെ ചീത്ത ഭക്ഷണമെന്നൊന്നില്ല.

കഠിനമായ ഭക്ഷണക്രമം പാലിച്ച് തടി കുറയ്ക്കും. എന്നാല്‍ തടി കുറഞ്ഞാല്‍ ഡയറ്റും മറക്കും. ഇതുകൊണ്ടു കാര്യമില്ല. പോയ വണ്ണം തിരിച്ചു വരും. ഭക്ഷണക്രമം എല്ലായ്‌പോഴും പാലിക്കുക തന്നെ വേണം.

തടിയുള്ള പലരും ഭക്ഷണം കുറച്ചാണ് തടി കുറയ്ക്കാന്‍ ശ്രമിക്കാറ്. ഇതിന് വേണ്ടി പട്ടിണി കിടക്കാനും തയ്യാറാകും. എന്നാല്‍ ദേഹമനങ്ങി വ്യായാമം ചെയ്യാന്‍ തയ്യാറാകില്ല. ഇതുകൊണ്ടു കാര്യമില്ല. ഡയറ്റിനൊപ്പം വ്യായാമവുമുണ്ടെങ്കിലേ പൂര്‍ണമായ പ്രയോജനം ലഭിക്കൂ.

ഭക്ഷണം കുറച്ച് പകരം ധാരാളം ജ്യൂസു കുടിയ്ക്കുന്നവരുണ്ട്. ഫ്രഷ് ജ്യൂസ് കാര്യമായ ദോഷം ചെയ്യില്ല. എന്നാല്‍ പായ്ക്കറ്റ് ജ്യൂസിന് ഇത്തരം ഗുണങ്ങള്‍ കുറവാണ്. മാത്രമല്ലാ, മധുരം കലര്‍ന്നിരിക്കുന്നതു കൊണ്ട് അത് ദോഷമുണ്ടാക്കുകയും ചെയ്യും. ഫ്രഷ് ജ്യൂസില്‍ തന്നെ മധുരമിട്ട് കുടിയ്ക്കാതിരിക്കുകയാണ് കൂടുതല്‍ നല്ലത്.

എല്ലാ തരം കൊഴുപ്പും ചീത്തയാണെന്ന ധാരണ വേണ്ട. നല്ല കൊഴുപ്പുമുണ്ട്. നട്‌സിലെ കൊഴുപ്പ് നല്ല കൊഴുപ്പാണ്. കൊഴുപ്പ് ഡയറ്റിന്റെ പേരില്‍ പൂര്‍ണമായി അകറ്റി നിര്‍ത്തിയാലും ദോഷമുണ്ടാകും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.