തടി കുറയാന്‍ ജ്യൂസ് ഡയറ്റ് പരീക്ഷിക്കൂ

Health

oi-Saritha

By Veena

Published: Tuesday, January 10, 2012, 11:19 [IST]

ജ്യൂസ് ആരോഗ്യത്തിന് നല്ലതാണ്. തടി കുറയ്ക്കുവാന്‍ ജ്യൂസ് ഡയറ്റുമുണ്ട്. ശരീരത്തിന് ആവശ്യമായ പോഷകങ്ങള്‍ നല്‍കുമെന്നതു കൊണ്ട് ജ്യൂസ് ഡയറ്റ് മറ്റു ചില ഡയറ്റുകളെപ്പോലെ ആരോഗ്യത്തിന് കേടുണ്ടാക്കുന്നുമില്ല. സീറോ സൈസ് സ്വന്തമാക്കിയ പല മോഡലുകളും ജ്യൂസ് ഡയറ്റില്‍ തൃപ്തരായവരാണ്.

നാല്, അഞ്ച് ആഴ്ചകളില്‍ ജ്യൂസ് ഡയറ്റ് എടുത്താല്‍ 20 മുതല്‍ 24 പൗണ്ട് വരെ ഭാരം കുറയുന്നതായി തെളിഞ്ഞിട്ടുണ്ട്. ജ്യൂസ് ഡയറ്റിന് വണ്ണം കുറയ്ക്കുന്നത് മാത്രമല്ലാ ഗുണം. ശരീരത്തിലെ വിഷാംശങ്ങളെ നീക്കം ചെയ്ത് ചര്‍മത്തിന് തിളക്കം നല്‍കുന്നതിനും ഇത് നല്ലതാണ്. കരുത്തുള്ള മുടിക്കും ജ്യൂസ് ഡയറ്റ് ഗുണം ചെയ്യും.

കാഴ്ചശക്തി വര്‍ദ്ധിപ്പിക്കുന്നതിനും ശരീരത്തില്‍ ജലാംശം നിലനിര്‍ത്തുന്നതിനും ശരീരദുര്‍ഗന്ധം അകറ്റുന്നതിനും നഖങ്ങള്‍ ശക്തിപ്പെടുത്തുന്നതിനും ജ്യൂസ് ഡയറ്റ് നല്ലതാണ്. ജ്യൂസ് ഡയറ്റില്‍ ജ്യൂസല്ലാതെ ഫലവര്‍ഗങ്ങളും കഴിയ്ക്കാം.

ജ്യൂസ് ഡയറ്റില്‍ ഫ്രഷ് ജ്യൂസും വെജിറ്റബിള്‍ ജ്യൂസും ഉള്‍പ്പെടുത്താം. പായ്ക്കറ്റിലെ ജ്യൂസുകളില്‍ കൃത്രിമ മധുരവും നിറങ്ങളും അടങ്ങിയിട്ടുള്ളതു കൊണ്ട് ജ്യൂസ് ഡയറ്റില്‍ ഇവയുടെ ഉപയോഗം പ്രോത്സാഹിപ്പിക്കുന്നില്ല. സിട്രസ് അടങ്ങിയിട്ടുള്ള ജ്യൂസുകള്‍ ശരീരത്തിലെ കൊഴുപ്പ് വളരെപ്പെട്ടെന്ന് അകറ്റും. ബെറി ജ്യൂസ്, ലൈംജ്യൂസ്, ഓറഞ്ച് ജ്യൂസ്, ഗ്രേപ് ഫ്രൂട്ട് ജ്യൂസ് എന്നിവ കൊഴുപ്പകറ്റാന്‍ സഹായിക്കുന്ന ചില ജ്യൂസുകളാണ്.

പച്ചക്കറി ജ്യൂസുകള്‍ തടി കുറയ്ക്കാനും ചര്‍മസൗന്ദര്യത്തിനും വളരെ നല്ലതാണ്. സാധാരണ ഡയറ്റെടുക്കുന്നവരില്‍ ചര്‍മത്തിന്റെ തിളക്കം കുറയുന്നതായി കാണാറുണ്ട്. പച്ചക്കറി ജ്യൂസുകള്‍ ഇൗ പ്രശ്‌നം പരിഹരിക്കാനുള്ള നല്ലൊരു വഴിയാണ്. പാവയ്ക്കാ ജ്യൂസ്, ക്യാരറ്റ് ജ്യൂസ്, മത്തങ്ങാ ജ്യൂസ് എന്നിവ ഡയറ്റ് ജ്യൂസുകളില്‍ ഉള്‍പ്പെടുത്താം.

ജ്യൂസ് ഡയറ്റെടുക്കുന്നവര്‍ക്ക് പച്ചക്കറി അരിഞ്ഞതു പഴവര്‍ഗങ്ങളും ഭക്ഷണത്തില്‍ ഉള്‍പ്പെടുത്താം. ജ്യൂസ് മാത്രം കുടിച്ചാല്‍ ക്ഷീണം അനുഭവപ്പെടുന്നവരുണ്ട്. ഇതിനുള്ള നല്ലൊരു പരിഹാരമാര്‍ഗമാണ് പഴങ്ങളും പച്ചക്കറികളും ഭക്ഷണത്തില്‍ ഉള്‍പ്പെടുത്തുന്നത്. പച്ചക്കറികള്‍ വേവിച്ചോ പച്ചയ്‌ക്കോ ഉപയോഗിക്കാം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.