പരീക്ഷാസമയത്തെ ഭക്ഷണക്രമം

Health

oi-Saritha

By Veena

Published: Friday, September 23, 2011, 15:55 [IST]

പരീക്ഷകളുടെ സമയം കുട്ടികള്‍ക്ക് മാത്രമല്ലാ, മാതാപിതാക്കള്‍ക്കും പിരിമുറുക്കത്തിന്റെ സമയമാണ്. ഈ സമയത്ത് കുട്ടികള്‍ക്ക് പോഷകാഹാരം ആവശ്യമാണ്. എന്നാല്‍ പരീക്ഷയെ പേടിച്ച് പല കുട്ടികളും ഭക്ഷണം നേരെ കഴിക്കാത്തതും ഈ സമയത്താണ്. ഇത് കുട്ടികളുടെ പഠനത്തെത്തന്നെ ബാധിക്കുമെന്നതിനാല്‍ ആഹാരമകാര്യത്തില്‍ മാതാപിതാക്കള്‍ വേണം ശ്രദ്ധിക്കാന്‍.

പിരിമുറുക്കത്തിന്റെ സമയമായതു കൊണ്ട് വിററാമിന്‍ സി, ബി, സിങ്ക്, മിനറല്‍ തുടങ്ങിയവ കുട്ടികള്‍ക്ക് ആവശ്യമാണ്. ഇവ അഡ്രിനാലിന്‍ എന്ന ഹോര്‍മോണ്‍ ഉല്‍പാദനം ത്വരിതഗതിയിലാക്കും. ഈ ഹോര്‍മോണ്‍ പിരിമുറുക്കത്തെ മറികടക്കാന്‍ കുട്ടികളെ സഹായിക്കും.

ഏത്തപ്പഴവും ചെറുപഴവും കുട്ടികള്‍ക്ക് ഈ സമയത്ത് കൊടുക്കുവാന്‍ പറ്റിയ ഭക്ഷണമാണ്. കാരറ്റ്, മറ്റ് ഫലവര്‍ഗങ്ങള്‍ എന്നിവയും കുട്ടികള്‍ക്ക് ആവശ്യമായ ഊര്‍ജം നല്‍കും. പരീക്ഷക്കു മുന്‍പ് ഭക്ഷണം കഴിക്കാതിരുന്നാല്‍ ഊര്‍ജക്കുറവു കൊണ്ട് കുട്ടികളുടെ ശരീരപ്രവര്‍ത്തനങ്ങളെല്ലാം മന്ദഗതിയിലാകും.

ഒരുമിച്ചു ഭക്ഷണം കഴിക്കുന്നതിനേക്കാള്‍ കുറച്ചു വീതം ഭക്ഷണം ചെറിയ ഇടവേളകളില്‍ കഴിക്കുന്നതായിരിക്കും നല്ലത്. വറുത്ത ഭക്ഷണങ്ങളും ചായ, കാപ്പി, ശീതളപാനീയങ്ങള്‍ തുടങ്ങിയവയും കഴിവതും ഒഴിവാക്കണം. ഇത് മന്ദതയുണ്ടാക്കും. പഴവര്‍ഗങ്ങളും ജ്യൂസും കഴിക്കുന്നത് നല്ലതാണ്. പാലും പരീക്ഷാസമയത്ത് ഉത്തമാഹാരമാണ്. ശരീരത്തിന് ഉണര്‍വുണ്ടാകാന്‍ ഗ്രീന്‍ ടീ കഴിക്കുന്നത് നല്ലതാണ്.

മൈദ, ചോറ് തുടങ്ങിയവ പരീക്ഷാസമയത്ത് കുറക്കുന്നതാണ് നല്ലത്. ഓട്‌സ്, ഗോതമ്പ്, ധാന്യങ്ങള്‍, പച്ചിലക്കറികള്‍, കൊഴുപ്പില്ലാത്ത പാലുല്‍പന്നങ്ങള്‍ എന്നിവ കഴിക്കാവുന്നതാണ്. വൈറ്റമിന്‍ സി, സിങ്ക് എന്നിവ ഇത്തരം ഭക്ഷണങ്ങളില്‍ നിന്നും ലഭിക്കും.

തലേന്നു രാത്രി വെള്ളത്തിലിട്ടു വച്ച ബദാം കഴിക്കുന്നത് ഓര്‍മശക്തിക്കു നല്ലതാണ്.

ചീര, ബ്രൊക്കോളി തുടങ്ങിയവ പരീക്ഷക്കാലത്ത് കഴിക്കാവുന്ന ഉത്തമാഹാരമാണ്. ഭക്ഷണത്തോടൊപ്പം ആവശ്യത്തിന് വെള്ളം കുടിക്കുക കൂടി ചെയ്യണം.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.