ജോലി സമ്മര്‍ദത്തില്‍ നിന്ന് മോചനം നേടാം

Health

oi-Saritha

By Veena

Published: Saturday, October 29, 2011, 14:06 [IST]

സമ്മര്‍ദം നിറഞ്ഞ ഒരു ലോകത്താണ് നാം ഇപ്പോള്‍ ജീവിക്കുന്നത്. ജോലി, ജീവിത പ്രശ്‌നങ്ങള്‍ തുടങ്ങിയവ ഇതിനുള്ള പ്രധാനകാരണവും. പ്രത്യേകിച്ചു ഐടി മേഖലയില്‍ ജോലി ചെയ്യുന്നവരാകട്ടെ, പിരിമുറക്കത്തിന് അടിമപ്പെട്ടാണ് പലപ്പോഴും ജോലി ചെയ്യുന്നത്. ജീവിതം വെട്ടിപ്പിടിക്കാനുള്ള ഓട്ടത്തിനിടയില്‍ ജീവിതമേ കൈവിട്ടുപോകുന്നത് ഇവര്‍ പലപ്പോഴും അറിയാറില്ല. മാനസിക പ്രശ്‌നങ്ങള്‍ക്ക് പുറമെ നിരവധി ശാരീരിക പ്രശ്‌നങ്ങള്‍ക്കും ഇത്തരം പിരിമുറക്കം വഴി വയ്ക്കുന്നു. ഒന്നു മനസുവച്ചാല്‍ ഇത്തരം സമ്മര്‍ദം നമുക്ക് ഒരു പരിധി വരെ കുറയ്ക്കാവുന്നതേയുള്ളൂ.

ജോലിസംബന്ധമായ യാത്രകള്‍ കഴിവതും ആസ്വദിച്ചു ചെയ്യുക. പുതിയ സ്ഥലങ്ങളാകുമ്പോള്‍ സമയം കിട്ടുകയാണെങ്കില്‍ ചുറ്റുവട്ടത്തേക്കും ശ്രദ്ധ വയ്ക്കുക. കുടുംബത്തെ കൂടെ കൂട്ടുന്നത് ജോലിയുടെ ടെന്‍ഷന്‍ അകറ്റാന്‍ സഹായിക്കും. എന്നാല്‍ അല്‍പസമയം അവര്‍ക്കു വേണ്ടി നീക്കി വയ്ക്കുവാനും സാധിക്കണം.

അവധി ലഭിക്കുന്ന ജോലിയാണെങ്കില്‍ അവധിയെടുത്ത് കുടുംബാംഗങ്ങള്‍ക്കൊപ്പം പുതിയ സ്ഥലങ്ങളിലേക്ക് പോകുക. വിദേശത്ത് ജോലി ചെയ്യുന്നവര്‍ക്ക് സ്വദേശത്തേക്കുള്ള വരവും ഒരാഘോഷമായിരിക്കും.

ആറുമാസത്തിലൊരിക്കലെങ്കിലും ഒന്നോ രണ്ടോ ദിവസത്തേക്ക് യാത്ര പോവുക. യാത്രയ്ക്കിടയില്‍ ജോലിസംബന്ധമായ തിരക്കുകളോ സമ്മര്‍ദമോ കടന്നു വരാന്‍ അനുവദിക്കരുത്. ഇത്തരം ദിവസങ്ങളില്‍ മറ്റെല്ലാ പ്രശ്‌നങ്ങളും മറന്ന് സന്തോഷിക്കുക. അല്ലെങ്കില്‍ യാത്ര കൊണ്ട് കാര്യമുണ്ടാകില്ല.

ദൂരേയ്ക്കല്ലെങ്കിലും അടുത്ത് പാര്‍ക്കോ ബീച്ചോ ഉണ്ടെങ്കില്‍ ഒഴിവുസമയം ചെലവാക്കാം.

പിരിമുറുക്കം അകറ്റുവാന്‍ മദ്യപിക്കുന്നവരും പുക വലിക്കുന്നവരുമുണ്ട്. ഇത് നിങ്ങള്‍ക്ക് താല്‍ക്കാലിക ആശ്വാസം നല്‍കുമെന്നേയുളളൂ. അതിനപ്പുറം ആരോഗ്യപ്രശ്‌നങ്ങളും ഉണ്ടാക്കും. തിരക്കു പിടിച്ച ഒരു ദിവസത്തിനൊടുവില്‍ ഇഷ്ടമുള്ള ഭക്ഷണം കഴിക്കുകയോ ഒരു കപ്പ് ഗ്രീന്‍ ടീ കുടിയ്ക്കുകയോ ചെയ്യാം. ഇത് പിരമുറുക്കത്തില്‍ നിന്ന് വിടുതല്‍ നല്‍കും.

കൂട്ടുകാരും ബന്ധുക്കളും മനസിന് സന്തോഷം നല്‍കും. ഇവര്‍ക്കൊപ്പം ഇടയ്‌ക്കെങ്കിലും ഒത്തുചേരാനും ഒരുമിച്ചു ഭക്ഷണം കഴിക്കാനും യാത്രകള്‍ ചെയ്യാനും സമയം കണ്ടെത്തുക.

ഇഷ്ടമുള്ള വിനോദങ്ങളില്‍ ഏര്‍പ്പെടുക. പാട്ടു കേള്‍ക്കുക, പുസ്തം വായിക്കുക എന്നിവ പിരമുറുക്കത്തില്‍ നിന്ന് രക്ഷ നേടാനുള്ള വഴികളാണ്.

വ്യായാമങ്ങള്‍ പിരിമുറുക്കത്തില്‍ നിന്ന് മോചനം നല്‍കാനുള്ള ഒരു മാര്‍ഗമാണ്. നീന്തല്‍, ജോഗിംങ്ങ് തുടങ്ങിയവ ചെയ്യുക. മനസിനൊപ്പം ശരീരത്തിനും ഇത് നല്ലതാണ്.

യോഗ, മെഡിറ്റേഷന്‍ എന്നിവ പരിശീലിക്കുന്നത് മനസിന് ഏറെ ആശ്വാസം നല്‍കും. ജോലി ചെയ്യാനുള്ള ഏകാഗ്രതയും ലഭിക്കും.

Disclaimer: ഈ ലേഖനത്തില്‍ പരാമര്‍ശിച്ചിരിക്കുന്ന വിവരങ്ങള്‍ പൊതുവായ വിവരങ്ങള്‍ക്കും വിദ്യാഭ്യാസപരമായ ആവശ്യങ്ങള്‍ക്കും വേണ്ടി മാത്രമുള്ളതാണ്. പ്രൊഫഷണല്‍ അഭിപ്രായങ്ങളോ, രോഗനിര്‍ണയം, ചികിത്സ എന്നിവ ഉദ്ദേശിച്ചുള്ളതോ അല്ല. ആരോഗ്യ സംബന്ധമായ പ്രശ്‌നങ്ങള്‍ക്ക് എപ്പോഴും ഡോക്ടറേയോ ആരോഗ്യവിദഗ്ധരേയോ സമീപിക്കേണ്ടതാണ്.