മഷ്‌റും മഞ്ചൂരിയന്‍ ഗ്രേവി

കൂണ്‍ ആരോഗ്യവശങ്ങള്‍ ഒത്തിണങ്ങിയ ഒന്നാണ്. ഇറച്ചിയുടെ ഗുണങ്ങള്‍ അടങ്ങിയിരിയ്ക്കുന്നതു കൊണ്ടുതന്നെ വെജിറ്റേറിയന്‍കാര്‍ പ്രത്യേകം കഴിയ്‌ക്കേണ്ട ഒന്ന്.

കൂണ്‍ കൊണ്ട് രുചികരമായ പല വിഭവങ്ങളുമുണ്ടാക്കാം. പ്രത്യേകിച്ച് ചൈനീസ് വിഭവങ്ങള്‍. മഷ്‌റൂം മഞ്ചൂരിയന്‍ ഇതില്‍ ഒന്നാണ്. ഇത് ഡ്രൈ ആയും ഗ്രേവിയോടു കൂടിയും ഉണ്ടാക്കാം.

മഷ്‌റൂം മഞ്ചൂരിയന്‍ ഗ്രേവി എങ്ങനെയുണ്ടാക്കാമെന്നു നോക്കൂ, ചപ്പാത്തിയ്‌ക്കൊപ്പം ഉപയോഗിയ്ക്കുവാന്‍ പറ്റിയ ഒന്നാന്തരം വിഭവമാണിത്.

മഷ്‌റൂം-200 ഗ്രാം
സവാള-3
ക്യാപ്‌സിക്കം-1
പച്ചമുളക്-4
ഇഞ്ചി-ഒരു കഷ്ണം
വെളുത്തുള്ളി-4
തക്കാളി-2
വിനെഗര്‍-അര ടീസ്പൂണ്‍
സോയാസോസ്-2 ടീസ്പൂണ്‍
മുളകുപൊടി-ഒരു ടീസ്പൂണ്‍
മഞ്ഞള്‍പ്പൊടി-ഒരു ടീസ്പൂണ്‍
ഉപ്പ്

കൂണ്‍ നല്ലപോലെ കഴുകി വൃത്തിയാക്കി രണ്ടു കഷ്ണങ്ങളാക്കി മുറിയ്ക്കുക. ഇതില്‍ മഞ്ഞള്‍പ്പൊടി, മുളകുപൊടി എന്നിവ പുരട്ടി വയ്ക്കണം. ഇത് 15 മിനിറ്റു വയ്ക്കുക.

ഒരു പാനില്‍ എണ്ണ ചൂടാക്കുക. ഇതിലേക്ക് സവാള ചേര്‍ത്ത് വഴറ്റണം. പിന്നീട് ഇഞ്ചി, വെളുത്തുള്ളി എന്നിവ ചേര്‍ത്തു വഴറ്റുക.

ഇതിലേക്ക് ക്യാപ്‌സിക്കം കഷ്ണങ്ങള്‍ ചേര്‍ക്കണം. ഇത് നല്ലപോലെ ഇളക്കുക.

ഇതിലേയ്ക്ക് ഉപ്പ്, വിനെഗര്‍, പച്ചമുളക്, തക്കാളി ഉടച്ചത്, സോയായോസ് എന്നിവ ചേര്‍ത്തിളക്കണം. കൂണ്‍ ഇതിലേയ്ക്കു ചേര്‍ത്തിളക്കണം.

കൂണ്‍ വെന്ത് ഗ്രേവി കുറുകുമ്പോള്‍ വാങ്ങി വച്ച് മല്ലിയില ചേര്‍ത്ത് ചൂടോടെ ഉപയോഗിയ്ക്കാം.