മഷ്‌റൂം പുലാവ് ഉണ്ടാക്കാം

മഷ്‌റൂം അഥവാ കൂണ്‍ ആരോഗ്യത്തിന് നല്ലൊരു ഭക്ഷണമാണ്. പ്രത്യേകിച്ച് സസ്യാഹാരം കഴിയ്ക്കുന്നവര്‍ക്ക്. നോണ്‍ വെജിറ്റേറിയന്‍ ഭക്ഷണം കഴിയ്ക്കാത്തതു കൊണ്ടുള്ള കുറവുകള്‍ ഇത് നികത്തുമെന്നാണ് പറയുന്നത്.

കൂണ്‍ കൊണ്ട് സ്വാദിഷ്ടമായ പല കറികളും ഉണ്ടാക്കാം. ഇതുകൊണ്ട് പുലാവും ഉണ്ടാക്കും. മഷ്‌റൂം പുലാവ് എങ്ങനെയാണ് ഉണ്ടാക്കുകയെന്നു നോക്കൂ,

അരി-അരക്കിലോ
സവാള-2
തക്കാളി-1
പച്ചമുളക്-1
കടുക്-1 ടീസ്പൂണ്‍
കൂണ്‍-200 ഗ്രാം
ഗ്രീന്‍പീസ്-അരകപ്പ്
ചോളം-ഒരു കപ്പ്
എണ്ണ
ഉപ്പ്

അരി കഴുകി വെള്ളമൊഴിച്ച് പാകത്തിന് വേവിച്ചെടുക്കുക. ചോളവും ഗ്രീന്‍പീസും വേവിച്ചെടുക്കണം.

ഒരു പാനില്‍ എണ്ണയൊഴിച്ചു ചൂടാക്കുക. ഇതിലേക്ക് കടുകിട്ടു പൊട്ടിയ്ക്കുക. പച്ചമുളക് ഇതിലേയ്ക്കു ചേര്‍ക്കുക. സവാള ചേര്‍ത്ത് വഴറ്റണം.

പാനിലേയ്ക്ക് തക്കാളി, ഉപ്പ് ചേര്‍ത്തിളക്കുക. ഇത് അല്‍പനേരം വേവിയ്ക്കണം.

ഇതിനു ശേഷം അരിഞ്ഞു വച്ചിരിയ്ക്കുന്ന കൂണ്‍ ഇതിലേക്കു ചേര്‍ത്തിളക്കി വേവിയ്ക്കുക. ഇത് ഒരുവിധം പാകമാകുമ്പോള്‍ വേവിച്ചു വച്ചിരിയ്ക്കുന്ന ഗ്രീന്‍പീസ്, ചോളം എന്നിവ ചേര്‍ത്തിളക്കുക. ഇത് നല്ലപോലെ വെള്ളം വറ്റിച്ചെടുക്കണം.

വേവിച്ചു വച്ചിരിയ്ക്കുന്ന ചോറ് ഇതിലേയ്ക്കിട്ട് ഇളക്കിയെടുക്കണം. ഇത് രണ്ടു മിനിറ്റ് വേവിച്ച ശേഷം വാങ്ങി വയ്ക്കാം.

മഷ്‌റൂം പുലാവ് ചൂടോടെ കഴിയ്ക്കാം.