ചര്‍മം നോക്കി ഫേസ് വാഷ് വാങ്ങൂ

മുഖം എളുപ്പത്തില്‍ കഴുകി വൃത്തിയാക്കാന്‍ ഉപയോഗിക്കുന്ന മാര്‍ഗമാണ് ഫേസ് വാഷ്. വിവിധ തരത്തിലുള്ള ഫേസ് വാഷുകള്‍ ലഭ്യവുമാണ്.

എന്നാല്‍ ഏതു ഫേസ് വാഷെന്നു നോക്കിയല്ല, ചര്‍മം അനുസരിച്ചാണ് ഫേസ് വാഷ് തെരഞ്ഞെടുക്കേണ്ടത്. വിവിധ ചര്‍മങ്ങള്‍ക്ക് ഇണങ്ങുന്ന ഫേസ് വാഷുകളും വിവിധ തരമാണ്.

മുഖക്കുരുവുള്ളവരാണെങ്കില്‍ സിങ്ക്, ഫോസ്ഫറസ് എന്നിവയടങ്ങിയ ഫേസ് വാഷാണ് തെരഞ്ഞെടുക്കേണ്ടത്. മുഖക്കുരു പൊട്ടാതിരിക്കുന്നതിന് ഇത് സഹായിക്കും.

എണ്ണമയമുള്ള ചര്‍മമാണെങ്കില്‍ ഓയില്‍ ഫ്രീ ഫേസ് വാഷ് നോക്കി തെര്‌ഞ്ഞെടുക്കണം. സാധാരണ ഫേസ് വാഷുകളില്‍ മുഖം വരണ്ടുപോകാതിരിക്കാന്‍ എണ്ണമയമുണ്ടാകുന്നത് സ്വാഭാവികമാണ്. എന്നാല്‍ എണ്ണമയമുള്ള ചര്‍മമുള്ളവര്‍ ഇത്തരം ഫേസ് വാഷ് തെരഞ്ഞെടുത്താല്‍ മുഖത്തെ എണ്ണമയം വര്‍ദ്ധിക്കാന്‍ ഇടയാകും. മുഖക്കുരു വരികയും ചെയ്യും.

വരണ്ട ചര്‍മമുള്ളവര്‍ അല്‍പം എണ്ണമയമുള്ള തരം ഫേസ് വാഷ് തെരഞ്ഞെടുക്കുക. പാല്‍,പീച്ച്, ഓയില്‍ എന്നിവയടങ്ങിയ ഫേസ് വാഷുകള്‍ ഇത്തരം ചര്‍മമുള്ളവര്‍ക്ക് യോജിക്കും.

മുഖത്ത് ബ്ലാക് ഹെഡ്‌സ് ഉള്ളവരാണെങ്കില്‍ സ്‌ക്രബര്‍ ഉപയോഗിക്കുന്നതാണ് നല്ലത്. സ്‌ക്രബര്‍ അടങ്ങിയ ഫേസ് വാഷുകളും ലഭ്യമാണ്. ഇത് മുഖത്തെ ബ്ലാക്‌ഹെഡ്‌സ് അകലാന്‍ സഹായിക്കും.

കരുവാളിപ്പുള്ള ചര്‍മമുള്ളവര്‍ ചെറുനാരങ്ങ, മഞ്ഞള്‍ പോലുള്ളവ അടങ്ങിയ ഫേസ് വാഷ് തെരഞ്ഞെടുക്കുന്നതാണ് നല്ലത്. ഇവ സ്വാഭാവിക ബ്ലീച്ചിംഗ് ഏജന്റുകളാണ്. ചര്‍മത്തിന് നിറം നല്‍കുന്നതിന് ഇവ സഹായിക്കും.

അലര്‍ജിയുള്ള ചര്‍മമുള്ളവരാണെങ്കില്‍ പാല്‍, ആര്യവേപ്പ്, മഞ്ഞള്‍ തുടങ്ങിയവയടങ്ങിയ ഫേസ് വാഷ് ഉപയോഗിക്കുന്നതാണ് കൂടുതല്‍ നല്ലത്. ഇവ അലര്‍ജിയ്ക്കു നല്ലൊരു മരുന്നാണ്.