മൊരിയുള്ള ചര്‍മത്തിന് പരിഹാരം

Skin Care

oi-Saritha

By Veena

Published: Friday, April 27, 2012, 13:54 [IST]

മൊരിയുള്ള ചര്‍മം പലരേയും അലട്ടുന്ന ചര്‍മപ്രശ്‌നമാണ്. പ്രത്യേകിച്ച് കൈകാലുകള്‍. വരണ്ട ചര്‍മമായിരിക്കും ഇത്തരം മൊരിക്കുള്ള പ്രധാന കാരണം.

ജന്മനാ ഈ പ്രശ്‌നമുള്ളവരുണ്ട്. ഇവരില്‍ ഇത് പൂര്‍ണമായും മാറ്റിയെടുക്കാന്‍ ബുദ്ധിമുട്ടാണ്.

ചില മരുന്നുകളുടെ അലര്‍ജി കൊണ്ടും ഭക്ഷണത്തിലുള്ള പ്രശ്‌നങ്ങള്‍ കൊണ്ടും മൊരിയുണ്ടാകാം. ക്യാന്‍സര്‍, എയ്ഡ്‌സ് തുടങ്ങിയ അസുഖങ്ങള്‍ കാരണവും മൊരി വരാം.

താഴെപ്പറഞ്ഞ പ്രശ്‌നങ്ങള്‍ക്ക് പരിഹാരവുമുണ്ട്. ഭക്ഷണപ്രശ്‌നമാണ് മൊരിയ്ക്ക് കാരണമെങ്കില്‍ പോഷകാഹാരം കഴിച്ച് ഈ പ്രശ്‌നം പരിഹരിക്കാം. പാലുല്‍പ്പന്നങ്ങള്‍, പച്ചക്കറികള്‍, ഇലക്കറികള്‍, പപ്പായ, മാങ്ങ, മുട്ടമഞ്ഞ തുടങ്ങിയവ മൊരി കുറയ്ക്കാന്‍ സഹായിക്കുന്ന ഭക്ഷണസാധനങ്ങളാണ്. ഇവയിലെ വൈറ്റമിന്‍ എ ആണ് ഇതിനു കാരണമാകുന്നത്.

ചര്‍മത്തില്‍ സോപ്പിന്റെ ഉപയോഗം മൊരി വര്‍ദ്ധിപ്പിക്കും. എണ്ണ, മോയ്‌സ്ചറൈസര്‍ എന്നിവ തേയ്ക്കുന്നത് നല്ല പരിഹാരമാണ്. സോപ്പിന് പകരം ചെറുപയര്‍ പൊടി, കടലമാവ് എന്നിവ ഉപയോഗിക്കാം. സോപ്പു തന്നെ വേണമെന്നുള്ളവര്‍ അധികം പതയില്ലാത്ത സോപ്പുകളോ ആയുര്‍വേദ സോപ്പുകളോ ഉപയോഗിക്കുക. കുളി കഴിഞ്ഞ ശേഷം എണ്ണ പുരട്ടുന്നതാണ് കൂടുതല്‍ നല്ലത്.

ധാരാളം വെള്ളം കുടിയ്ക്കാനും ശ്രദ്ധിക്കണം. ഇത് ശരീരത്തിലെ വരള്‍ച്ച മാറ്റും.

മരുന്നുകളാണ് മൊരിക്കു കാരണമെങ്കില്‍ ഡോക്ടറെ കണ്ട് വിവരം പറഞ്ഞ് പരിഹാരമുണ്ടാക്കാം.