സൗന്ദര്യത്തിന് ഫലവര്‍ഗങ്ങള്‍

Skin Care

oi-Saritha

By Veena

Published: Tuesday, December 20, 2011, 10:21 [IST]

സൗന്ദര്യസംരക്ഷണത്തിന് ചില പഴവര്‍ഗങ്ങളും സഹായിക്കുന്നുണ്ട്. ഇവ കഴിയ്ക്കുന്നത് ചര്‍മത്തിന് നല്ലതാണ്. ഇവ ഉപയോഗിച്ച് ഫേഷ്യലും ചെയ്യാം. പാര്‍ശ്വഫലങ്ങളൊന്നും തന്നെയുണ്ടാക്കുന്നില്ലെന്നതാണ് ഇവയുടെ പ്രത്യേകത.

നമ്മുടെ നാട്ടില്‍ സുലഭമായി ലഭിക്കുന്ന ഒരു ഫലമാണ് പഴം. ചെറുപഴം, ഏത്തപ്പഴം, റോബസ്റ്റ എന്നിങ്ങനെ വിവിധതരം പഴങ്ങളുണ്ട്. ഇവയിലുള്ള വൈറ്റമിന്‍ എ, ബി, ഇ എന്നിവ ആന്റി ഏജിംഗ് ആയി പ്രവര്‍ത്തിക്കുന്നു. പഴം ഉടച്ച് മുഖത്തു തേക്കുന്നത് ചര്‍മസൗന്ദര്യം വര്‍ദ്ധിപ്പിക്കുകയും ചെയ്യും.

ചെറുനാരങ്ങ ചര്‍മസൗന്ദര്യത്തിന് ഏറ്റവും ചേര്‍ന്ന ഒന്നാണെന്ന് പറയാം. ഇതിലെ വൈറ്റമിന്‍ സി നല്‍കുന്ന ഗുണങ്ങള്‍ നിരവധിയാണ്. ചെറുചൂടുവെള്ളത്തില്‍ അലപം തേനും നാരങ്ങാനീരും ചേര്‍ത്ത് രാവിലെ വെറുവയറില്‍ കുടിച്ചാല്‍ ശരീരത്തിലെ വിഷാംശങ്ങള്‍ പുറന്തള്ളപ്പെടും. അങ്ങനെ ഇത് നല്ലൊരു ക്ലെന്‍സറായി പ്രവര്‍ത്തിക്കുന്നു. നാരങ്ങാനീരും തേനും ചേര്‍ത്ത് മുഖത്തു തേച്ചാല്‍ നിറം വര്‍ദ്ധിക്കും.

ആപ്പിളും ആരോഗ്യത്തോടൊപ്പം സൗന്ദര്യവും സംരക്ഷിക്കുന്നുണ്ട്. ആപ്പിളിലെ ആന്റി ഓക്‌സിഡന്റ് ചര്‍മം അയഞ്ഞുതൂങ്ങാതെ സംരക്ഷിക്കുന്നു. ഉടച്ച ആപ്പിള്‍ തേനും ഓട്‌സും പനിനീരും ചേര്‍ത്ത് നല്ലൊന്നാന്തരം ഫേസ് മാസ്‌കായി ഉപയോഗിക്കാം.

ഓറഞ്ചും നല്ലൊരു സൗന്ദര്യസംരക്ഷണ വസ്തുവാണ്, ഓറഞ്ചിലെ വൈറ്റമിന്‍ സി ചര്‍മത്തിനും ശരീരത്തിനും ആവശ്യമായ പോഷകങ്ങള്‍ നല്‍ുകുന്നുണ്ട്. ഓറഞ്ച് നീരും ഓറഞ്ചിന്റെ തൊലി ഉണക്കിപ്പൊടിച്ചതും ചര്‍മസംരക്ഷണത്തിന് ഉപകരിക്കും.

പപ്പായയിലെ ആന്റി ഓക്‌സിഡന്റുകളും സൗന്ദര്യസംരക്ഷണത്തിന് ഉപകരിക്കുന്നവയാണ്. ഇതിലെ പാപെയ്ന്‍ എന്ന എന്‍സൈം ചര്‍മത്തിലെ മൃതകോശങ്ങളെ നീക്കാന്‍ സഹായിക്കും. പപ്പായ മുഖത്തു പുരട്ടുന്നത് ചര്‍മത്തിന്റെ തിളക്കം വര്‍ദ്ധിപ്പിക്കും.

മാങ്ങയും ചര്‍മസൗന്ദര്യത്തിന് സഹായിക്കുന്നുണ്ട്. ഇതില്‍ വൈറ്റമിന്‍ എയും ധാരാളം ആന്റി ഓക്‌സിഡന്റുകളും ഉണ്ട്. ചര്‍മത്തിന്റെ ദൃഢത കാത്തുസൂക്ഷിക്കാനും ചര്‍മം പ്രായമാകാതെ തടയാനും ഇതിന് കഴിയും.