വിദ്യാ ബാലന്റെ 'മേക്കപ്പ്' യാത്രകള്‍

പാലക്കാട് വേരുകളുള്ള അയ്യര്‍ പെണ്‍കുട്ടി 'പരിണീത'യില്‍ തുടങ്ങി ഇപ്പോള്‍ 'ഡേര്‍ട്ടി പിക്ചറും' കഴിഞ്ഞ് 'കഹാനി'യുമായി നില്‍ക്കുകയാണ്.

പരിണീതയില്‍ 1950 കളിലെ ഒരു സാധാരണ പെണ്‍കുട്ടിയുടെ വേഷവിധാനങ്ങളായിരുന്നു വിദ്യയ്ക്ക്. സാല്‍വാര്‍ കമ്മീസ്, പഴയ രീതികളിലെ സാരി എന്നിവ ധരിച്ച ലോലിത എന്ന പെണ്‍കുട്ടി.

ഇത് പിന്നീട് 'ലഗേ രഹേ മുന്നാഭായ്' എന്ന ചിത്രത്തിലെ മോഡേണ്‍ പെണ്‍കുട്ടിയായി. സ്‌കര്‍ട്ടും കുര്‍ത്തിയും മറ്റും ധരിച്ച ആധുനിക യുവതയുടെ മുഖം.

പിന്നീട് ഇന്ത്യന്‍ യുവതികളുടെ പാരമ്പര്യവേഷമായ സാരിയിലായിരുന്നു വിദ്യ കുറേക്കാലം പ്രത്യക്ഷപ്പെട്ടത്. പാ, ഭൂല്‍ ഭുലയ്യാ തുടങ്ങിയ ചിത്രങ്ങളില്‍ സാരി ധരിച്ചെത്തിയ വിദ്യ മിക്കവാറും ചടങ്ങുകളിലെത്തുന്നതും സാരികളിലാണെന്നതാണ് മറ്റൊരു പ്രത്യേകത.

വ്യക്തിപരമായി ഇവര്‍ കൂടുതല്‍ ഇഷ്ടപ്പെടുന്ന വേഷവും ഇതു തന്നെയാണ്. വിദ്യയുടെ അഭിനയ മികവിനോടൊപ്പം അവര്‍ ധരിക്കുന്ന സാരികളും ചര്‍ച്ചാവിഷയമായി. ഇപ്പോഴത്തെ ബോളിവുഡ് സുന്ദരിമാരില്‍ ഏറ്റവും കൂടുതല്‍ സാരി അണിയുന്നതും വിദ്യ തന്നെയായിരിക്കും. പാരമ്പര്യ രീതിയില്‍ പ്രത്യേകം ഡിസൈന്‍ ചെയ്‌തെടുത്ത സാരികളും കൈയിറക്കം കൂടിയ ബ്ലൗസുകളും വിദ്യാ ബാലന്‍ ട്രെന്റായി.

സാരിയിലെ ശാലീനതയെ കണ്ടു പരിചയിച്ച കണ്ണുകള്‍ക്ക് ഡേര്‍ട്ടി പിക്ചറിലെ സില്‍ക് അദ്ഭുതമായി. സില്‍ക് സ്മിതയുടെ ജീവിതം കടമെടുത്ത ഈ സിനിമയില്‍ ഇൗ കഥാപാത്രത്തിന് ചേരുന്ന വിധത്തിലുള്ള കുഞ്ഞുടുപ്പുകള്‍.

ഇതു കഴിഞ്ഞെത്തിയ കഹാനിയില്‍ ഗര്‍ഭിണിയായി തിളങ്ങിയ വിദ്യ ഫാഷന്‍ തരംഗം കൂടി ആവുകയാണ്. ഇവര്‍ സിനിമയില്‍ അണിഞ്ഞ ഗര്‍ഭകാല വസ്ത്രങ്ങളും ഇപ്പോള്‍ ഗര്‍ഭിണികള്‍ക്കിടയില്‍ ഫാഷനാണ്.