20 കിലോ കുറച്ചത് എങ്ങനെ? ഖുശ്ബു സുന്ദറിന്റെ ഫിറ്റ്‌നസ് രഹസ്യമായ ആ ജാപ്പനീസ് വിദ്യ ഇതാ

സെപ്റ്റംബർ 30-ന് അർദ്ധരാത്രിയിൽ പുറത്തുവന്ന തമിഴ് സിനിമാതാരം ഖുശ്ബു സുന്ദറിന്റെ അഭിമുഖത്തിലെ ഒരു ചെറിയ വീഡിയോ ക്ലിപ്പ് സോഷ്യൽ മീഡിയയിൽ വൻ തരംഗമായി മാറിയിരിക്കുകയാണ്. ജാപ്പനീസ് ഭക്ഷണരീതി (Japanese way of eating) പിന്തുടർന്നാണ് താൻ ഘട്ടം ഘട്ടമായി 20 കിലോ കുറച്ചതെന്നാണ് ഖുശ്ബു ഇതിൽ വ്യക്തമാക്കുന്നത്. വലിയ പ്ലേറ്റുകൾക്ക് പകരം ചെറിയ പാത്രങ്ങളിൽ ഭക്ഷണം കഴിക്കുന്ന ശീലത്തെക്കുറിച്ചും, വല്ലാത്ത വിശപ്പ് തോന്നുമ്പോൾ മാത്രം ഭക്ഷണം കഴിക്കേണ്ടതിന്റെ ആവശ്യകതയെക്കുറിച്ചും താരം സംസാരിക്കുന്നു. "യഥാർത്ഥത്തിൽ വിശപ്പ് തോന്നുമ്പോൾ മാത്രമേ ഭക്ഷണം കഴിക്കാവൂ," എന്നാണ് ഖുശ്ബു പറയുന്നത്.

ജപ്പാനിലെ ചെറിയ ബൗളുകളെയും നമ്മൾ സാധാരണ ഉപയോഗിക്കുന്ന വലിയ പ്ലേറ്റുകളെയും താരതമ്യം ചെയ്തുകൊണ്ടാണ് വൈറൽ ക്ലിപ്പിൽ ഖുശ്ബു സംസാരിക്കുന്നത്. "അവർ വളരെ ചെറിയ ബൗളുകളാണ് ഉപയോഗിക്കുന്നത്, അത് മാത്രമാണ് കാര്യം," കടുത്ത ഡയറ്റുകൾക്ക് പകരം കഴിക്കുന്ന ഭക്ഷണത്തിന്റെ അളവ് നിയന്ത്രിക്കേണ്ടതിന്റെ (Mindful portions) പ്രാധാന്യം ചൂണ്ടിക്കാട്ടി ഖുശ്ബു കൂട്ടിച്ചേർത്തു. ഓഗസ്റ്റ് മാസത്തിൽ തന്നെ ഈ 'ജാപ്പനീസ് സ്മോൾ പ്ലേറ്റ് ടെക്നിക്' വാർത്തകളിൽ ഇടംപിടിച്ചിരുന്നതിനാൽ, ഈ വീഡിയോ ക്ലിപ്പ് ഒറ്റരാത്രികൊണ്ട് സോഷ്യൽ മീഡിയ പ്ലാറ്റ്‌ഫോമുകളിൽ പടർന്നുപിടിക്കുകയായിരുന്നു.

എന്താണ് ഈ ജാപ്പനീസ് ഭക്ഷണരീതി?

ചെറിയ പാത്രങ്ങൾ ഉപയോഗിക്കുന്നതിനപ്പുറം, പരമ്പരാഗത ജാപ്പനീസ് ഭക്ഷണരീതിയിൽ വൈവിധ്യമാർന്ന വിഭവങ്ങൾ ചെറിയ അളവുകളിലാണ് വിളമ്പാറുള്ളത്. 'വാഷോകു' (Washoku) എന്ന ജാപ്പനീസ് ഭക്ഷണ സംസ്കാരത്തെക്കുറിച്ചുള്ള പഠനങ്ങൾ വ്യക്തമാക്കുന്നത് ഇലക്കറികളും പച്ചക്കറികളും, സൂപ്പുകളും, ഉമാമി (Umami) രുചിയുള്ള വിഭവങ്ങളും വയറു പെട്ടെന്ന് നിറഞ്ഞതായി തോന്നിപ്പിക്കുമെന്നാണ്. ഇത് അമിതമായി ഭക്ഷണം കഴിക്കുന്നത് തടയുന്നു. ഇതിലേറ്റവും പ്രധാനം 'ഹാര ഹാച്ചി ബു' (Hara hachi bu) എന്ന ശീലമാണ്. അതായത്, വയറിന്റെ 80 ശതമാനം നിറയുമ്പോൾ തന്നെ ഭക്ഷണം കഴിക്കുന്നത് നിർത്തുക! ജാപ്പനീസ് വിഭവങ്ങൾ അതുപോലെ അനുകരിച്ചില്ലെങ്കിലും, ഈയൊരു തത്വം നമുക്കും ദൈനംദിന ജീവിതത്തിൽ എളുപ്പത്തിൽ പകർർത്താവുന്നതാണ്.

നമ്മുടെ മലയാളി ഭക്ഷണരീതിയിലേക്ക് ഇത് എങ്ങനെ മാറ്റിയെടുക്കാം?

തുടക്കത്തിൽ തന്നെ വയറു നിറയാൻ പച്ചക്കറികളോ രസവും സാമ്പാറുമൊക്കെ കഴിച്ച് തുടങ്ങാം. ചോറ് ചെറിയൊരു കപ്പിലോ കിണ്ണത്തിലോ കുറഞ്ഞ അളവിൽ മാത്രം എടുക്കുക. അതിനൊപ്പം കടലയോ മുട്ടയോ പോലെയുള്ള പ്രോട്ടീൻ അടങ്ങിയ വിഭവങ്ങളും നല്ല തോതിൽ തോരനും ഉൾപ്പെടുത്താം. അത്താഴം കഴിയുന്നത്ര നേരത്തെ കഴിക്കാൻ ശ്രദ്ധിക്കുക. നേരത്തെ കഴിക്കുന്നത് ശരീരഭാരം നിയന്ത്രിക്കാനും രക്തത്തിലെ ഗ്ലൂക്കോസ് അളവ് മെച്ചപ്പെടുത്താനും സഹായിക്കുമെന്ന് പഠനങ്ങൾ വ്യക്തമാക്കുന്നു. ഭക്ഷണശേഷം ചെറുതായി നടക്കുക, രണ്ടാമതും ഭക്ഷണം വിളമ്പുന്നതിന് മുൻപ് 20 മിനിറ്റ് കാത്തിരുന്ന് യഥാർത്ഥത്തിൽ വിശപ്പുണ്ടോ എന്ന് സ്വയം വിലയിരുത്തുക.

വിദഗ്ദ്ധർ നൽകുന്ന മുന്നറിയിപ്പുകൾ

എന്നാൽ ഒരേ രീതി എല്ലാവർക്കും ഒരുപോലെ അനുയോജ്യമാകണമെന്നില്ല. പ്രമേഹം, തൈറോയ്ഡ്, പിസിഒഎസ് (PCOS), ഗർഭാവസ്ഥ എന്നിവയുള്ളവരോ കൃത്യമായി മരുന്നുകൾ കഴിക്കുന്നവരോ ആണെങ്കിൽ ഒരു ഡോക്ടറുടെ നിർദ്ദേശം തേടിയ ശേഷമേ ഇത്തരം മാറ്റങ്ങൾ വരുത്താവൂ. തലകറക്കം, ദഹനപ്രശ്നങ്ങൾ, വിട്ടുമാറാത്ത തളർച്ച, ദീർഘനേരത്തെ പട്ടിണി കിടക്കൽ എന്നിവ പൂർണ്ണമായും ഒഴിവാക്കണം. പെട്ടെന്നുള്ള ക്രാഷ് ഡയറ്റുകളോ സപ്ലിമെന്റുകളോ അല്ല, മറിച്ച് കഴിക്കുന്ന ഭക്ഷണത്തിന്റെ അളവ് ഘട്ടം ഘട്ടമായി കുറയ്ക്കുന്നതും നേരത്തെ കഴിക്കുന്നതുമാണ് പ്രായോഗികമായ വഴി. വേഗത്തിൽ തടി കുറയ്ക്കുന്നതിനേക്കാൾ ആരോഗ്യവും സ്ഥിരതയുമാണ് പ്രധാനം.

കുറുക്കുവഴികൾക്ക് പകരം ലളിതമായ ജീവിതശൈലി മാറ്റങ്ങളാണ് ഖുശ്ബു തന്റെ അനുഭവത്തിലൂടെ പങ്കുവെക്കുന്നത്. ചെറിയ പ്ലേറ്റുകൾ ഉപയോഗിക്കുക, ആദ്യം പച്ചക്കറികൾ കഴിക്കുക, വയറ് നിറയുന്നതിന് തൊട്ടുമുമ്പ് ഭക്ഷണം നിർത്തുക, അത്താഴം നേരത്തെ കഴിക്കുക എന്നിവയൊക്കെ ശീലമാക്കാം. ഭക്ഷണത്തിൽ പ്രോട്ടീൻ ഉറപ്പുവരുത്തുകയും ക്രമമായ വ്യായാമം പിന്തുടരുകയും ചെയ്യുക. ശരീരത്തിലെ ഉന്മേഷവും വസ്ത്രങ്ങളുടെ ഫിറ്റിംഗും നോക്കി പുരോഗതി വിലയിരുത്താം. ഏതെങ്കിലും ആരോഗ്യപ്രശ്നങ്ങളോ മരുന്നുകളോ കഴിക്കുന്നവരാണെങ്കിൽ ഇത്തരം മാറ്റങ്ങൾ വരുത്തുന്നതിന് മുൻപ് വിദഗ്ദ്ധോപദേശം തേടാൻ മറക്കരുത്.