വരണ്ട മുടിയ്ക്ക് പരിഹാരമുണ്ട്

വരണ്ട മുടിയുള്ളവര്‍ക്ക് മുടിസംരക്ഷണം ഒരു പ്രശ്‌നം തന്നെയാണ്. ഭംഗിയും മൃദുത്വവും ഇത്തരം മുടിയില്‍ നില നിര്‍ത്താന്‍ പ്രയാസമാണെന്നതു മാത്രമല്ല, പെട്ടെന്ന് പൊട്ടിപ്പോകാനും സാധ്യത കൂടുതലാണ്. ഇത്തരം മുടിയ്ക്ക്് വീട്ടില്‍ തന്നെ ചെയ്യാവുന്ന ചില പരിഹാരമാര്‍ഗങ്ങളുമുണ്ട്.

വരണ്ട മുടിയുള്ളവര്‍ കഴിവതും ഷാംപൂ ചെയ്യുന്നത് കുറയ്ക്കുക. ഷാംപൂ ചെയ്യുകയാണെങ്കില്‍ അധികം വീര്യമില്ലാത്തത് ഉപയോഗിക്കുക. ഷാംപൂ ചെയ്ത ശേഷം കണ്ടീഷണറും ഉപയോഗിക്കണം. ചൂടുള്ള എണ്ണ കൊണ്ട് മസാജ് ചെയ്യുന്നത് ഗുണം ചെയ്യും. ഒലീവ് ഓയില്‍, ബദാം ഓയില്‍, വെളിച്ചെണ്ണ എന്നിവ കൂട്ടിച്ചേര്‍ത്ത് തലയില്‍ മസാജ് ചെയ്യുന്നത് നല്ലതാണ്.

വരണ്ട മുടിയുള്ളവര്‍ ഒരു കാരണവശാലും ചൂടുവെള്ളത്തില്‍ മുടി നനയ്ക്കരുത്. ഇത് മുടി കൂടുതല്‍ വരണ്ടുപോകാന്‍ കാരണമാകും. വരണ്ട മുടിയുള്ളവര്‍ മാത്രമല്ലാ, ചൂടുവെള്ളത്തില്‍ കഴുകുന്നത് ഏതുതരം മുടിയുള്ളവര്‍ക്കും നല്ലതല്ല.

വരണ്ട മുടിയുള്ളവര്‍ മുടിയില്‍ കളര്‍ ചെയ്യുക, സ്‌ട്രെയ്റ്റനിംഗ് ചെയ്യുക, അയേണ്‍ ചെയ്യുക എന്നിങ്ങനെയുള്ള പരീക്ഷണങ്ങള്‍ മുടിയില്‍ നടത്താതിരിക്കുകയാണ് നല്ലത്. ഇവയെല്ലാം മുടി കൂടുതല്‍ വരണ്ടതാകാന്‍ ഇട വരുത്തും.

വരണ്ട മുടിത്തുമ്പ് ഇടയ്ക്ക് മുറിയ്ക്കുന്നത് മുടിയ്ക്ക് നല്ലതാണ്. അതുപോലെ ബിയര്‍, മുട്ടയുടെ വെള്ള തുടങ്ങിയവ വരണ്ട മുടിയ്ക്ക് നല്ലതാണ്.