ഹെയര്‍ സ്‌ട്രെയ്റ്റനിംഗ് മെഷീന്‍ ഉപയോഗിക്കുമ്പോള്‍

മുടി നീട്ടാന്‍ ബ്യൂട്ടിപാര്‍ലറില്‍ തന്നെ പോണമെന്നില്ല. ഹെയര്‍ സ്‌ട്രെയിറ്റനിംഗ് മെഷീനുണ്ടെങ്കില്‍ ഇത് വീട്ടില്‍ തന്നെ ചെയ്യാം. പ്രത്യേകിച്ച് എന്തെങ്കിലും ആഘോഷം വരുമ്പോള്‍ മുടി ഭംഗിയാക്കണമെങ്കില്‍. ഹെയര്‍ സ്‌ട്രെയിറ്റനിംഗ് മെഷീന്‍ ഉപയോഗിക്കുമ്പോല്‍ ചില കാര്യങ്ങള്‍ ശ്രദ്ധിക്കണമെന്നു മാത്രം.

ഈ മെഷീന്‍ ഉപയോഗിക്കുന്ന വിധം ആദ്യം മനസിലാക്കണം. ഇവയുടെ പായ്ക്കറ്റിന് പുറത്ത് നിര്‍ദേശങ്ങള്‍ സാധാരണ ഉണ്ടാകാറുണ്ട്. ഇത് വായിച്ചു നോക്കി മാത്രം മുടി നീട്ടാന്‍ ഒരുങ്ങുക.

മെഷീന്‍ ഉപയോഗിക്കുന്നതിന് മുന്‍പ് അത് നല്ലപോലെ തുടച്ചു വൃത്തിയാക്കണം. നനഞ്ഞ തുണി തുടയ്ക്കാന്‍ ഉപയോഗിക്കാം. നനവ് പൂര്‍ണമായി മാറിയതിന് ശേഷം മാത്രം ഇത് ഉപയോഗിക്കുക. കറന്റ് ഉപയോഗിക്കുന്നതു കൊണ്ട് അല്ലെങ്കില്‍ ഷോക്കടിക്കാനും സാധ്യതയുണ്ട്.

മുടി ചേര്‍ന്ന വിധം ആവശ്യത്തിന് മാത്രമുള്ള ചൂട് ക്രമീകരിക്കാന്‍ ശ്രദ്ധിക്കുക. അല്ലെങ്കില്‍ മുടി ചീത്തയാവാന്‍ സാധ്യതയുണ്ട്.

മുടി നീട്ടുന്നതിന് മുന്‍പ് മുടിയുടെ നനവ് പൂര്‍ണമായി മാറ്റിയിരിക്കണം. കുറച്ചു മുടി വീതം എടുത്തു വേണം സ്‌ട്രെയ്റ്റനിംഗ് ചെയ്യാന്‍. മുടിയുടെ കട ഭാഗത്തു നിന്നും തുടങ്ങി താഴേയ്ക്ക് മുടി നീട്ടുക.

പാകത്തിന് ചീപ്പകലം ഉള്ള ചീപ്പും സമീപം സൂക്ഷിക്കുക. മുടി ജട പിടിക്കാതിരിക്കാന്‍ ഇത് സഹായിക്കും.

മെഷീന്‍ മുടിയുടെ ഇടയിലൂടെ കടത്തുമ്പോള്‍ വല്ലാതെ മുറുക്കത്തില്‍ പിടിക്കരുത്. ഇത് മുടി പൊട്ടിപ്പോകാന്‍ ഇട വരുത്തും. മെഷീന്‍ ചൂടായതാണെന്നും ഓര്‍മിക്കുക. കൂടുതല്‍ നീളമുള്ള മുടിയാണെങ്കില്‍ മറ്റാരുടേയെങ്കിലും സഹായം തേടുകയാണ് നല്ലത്.

മുടി നീട്ടിക്കഴിഞ്ഞാല്‍ മുടിയില്‍ സെറം പുരട്ടുന്നത് നല്ലതായിരിക്കും. മുടി പൊട്ടിപ്പോകാതിരിക്കാന്‍ ഇത് സഹായിക്കും.