വീട്ടിനുള്ളിലെ അപകട മേഖലകള്‍ !

1. കഴുകാത്ത വസ്ത്രങ്ങള്‍

പലപ്പോഴും മുഷിഞ്ഞ വസ്ത്രങ്ങള്‍ പതിവായി അലക്കാറുണ്ടാകില്ല. ഇവ ബാത്ത്റൂമിലും, മുറികളുടെ മൂലകളിലുമൊക്കെ കുന്നുകൂടി കിടക്കുന്നുണ്ടാകും. ഇവയില്‍ അണുക്കളും ബാക്ടീരിയും ഏറെയുണ്ടാകും. വിയര്‍‌പ്പും അഴുക്കും പുരണ്ട ഈ വസ്ത്രങ്ങള്‍ അണുക്കള്‍ വേഗത്തില്‍ പെരുകാന്‍ ഏറെ അനുയോജ്യമായ സ്ഥലമാണ്. അക്കാരണത്താല്‍ തന്നെ അലക്കാതെ കുന്നുകൂടി കിടക്കുന്ന മുഷിഞ്ഞ വസ്ത്രങ്ങള്‍ അണുക്കളുടെ വീടിനുള്ളിലെ ആവാസ കേന്ദ്രമാകും. ഇത് തടയാന്‍ മുഷിഞ്ഞ വസ്ത്രങ്ങള്‍ പതിവായി കഴുകി വൃത്തിയാക്കുക, പ്രത്യേകിച്ച് ഏറെ ചെളിയും, വിയര്‍പ്പും പുരണ്ടവ.

2. ടോയ്‍ലെറ്റ്, ബാത്ത് റൂം

ഏറെ ക്ലീനറുകളും, കെമിക്കലുകളും ഉപയോഗിക്കുന്നുണ്ടെങ്കിലും ബാത്തറൂമും, ടോയ്‍ലെറ്റും അണുവിമുക്തമാകണമെന്നില്ല. ചില മൂലകളില്‍ അണുക്കള്‍ അടിഞ്ഞ് കൂടിയിട്ടുണ്ടാകും. ഇവ വൃത്തിയാക്കപ്പെടുന്നുമുണ്ടാകില്ല. ടൗവ്വലുകള്‍ അത്തരത്തിലുള്ളവയില്‍ പ്രധാനപ്പെട്ടതാണ്. ടോയ്‍ലെറ്റ് സീറ്റുകളും അണുക്കള്‍ പെരുകാന്‍ സാധ്യതയുള്ളതും, കൃത്യമായി വൃത്തിയാക്കേണ്ടതുമായ സ്ഥലമാണ്. അണുക്കളും, ബാക്ടീരിയയുമുണ്ടാക്കുന്ന രോഗങ്ങള്‍ ബാധിക്കപ്പെടാന്‍ സാധ്യതയുള്ള സ്ഥലമാണ് ടോയ്‍ലെറ്റും ബാത്ത് റൂമുകളും. സാധ്യമായിടത്തോളം അവ വൃത്തിയായി സൂക്ഷിക്കുകയും, ഓരോ തവണയും ഉപയോഗിച്ച ശേഷം ഫ്ലഷ് ചെയ്യുകയും വേണം.

3. ടൂത്ത് ബ്രഷ്

അണുക്കള്‍ പെരുകാന്‍ സാധ്യതയുള്ള ഒരിടമാണ് ടൂത്ത് ബ്രഷ്. നമ്മള്‍ നേരിട്ട് ഉപയോഗിക്കുന്നതാണ് ഇവ. അവയിലൂടെ അണുക്കള്‍ ബാധിക്കാനുള്ള സാധ്യതയുണ്ട്. അതിനാല്‍ തന്നെ ഉപയോഗ ശേഷം ബ്രഷ് പൊതിഞ്ഞ് വെയ്ക്കുക. അലക്ഷ്യമായി അവിടെയും ഇവിടെയുമൊക്കെ ടൂത്ത് ബ്രഷ് ഇടരുത്. ഉപയോഗിക്കുന്നതിന് മുമ്പായും, ഉപയോഗിച്ച ശേഷവും ബ്രഷ് കഴുകുകയും ചെയ്യുക.

4. ഉപകരണങ്ങളും സ്ഥലങ്ങളും

മിക്ക വീടുകളിലും ബാല്‍ക്കണിയിലാണ് വസ്ത്രങ്ങള്‍ അലക്കുകയും, പാത്രങ്ങള്‍ കഴുകുകയുമൊക്കെ ചെയ്യുന്നത്. അതിനാല്‍ തന്നെ ഇവിടം അണുക്കളുടെ ഒരു കേന്ദ്രമായിരിക്കും. പാത്രങ്ങളിലെയും, വസ്ത്രങ്ങളിലെയും അഴുക്കുകള്‍ ഈ സ്ഥലത്തെ അണുബാധയുള്ളതാക്കും. പാത്രം വൃത്തിയാക്കാനുപയോഗിക്കുന്ന സ്പോഞ്ച്, വസ്ത്രം വൃത്തിയാക്കാനുപയോഗിക്കുന്ന ബ്രഷ് എന്നിവ അണുക്കളും, ബാക്ടീരിയും പെരുകുന്ന വസ്തുക്കളായിരിക്കും. അതിനാല്‍ കഴുകാനുപയോഗിച്ച് ശേഷം ഇവ വൃത്തിയാക്കണം. കൂടാതെ ഈ സ്ഥലം കെമിക്കല്‍ അടങ്ങിയ ക്ലീനറുകള്‍ ഉപയോഗിച്ച് കഴുകി ബാക്ടീരിയകളെയും അണുക്കളെയും നീക്കം ചെയ്യാം.

5. ഡസ്റ്റ്ബിന്‍

വീട്ടിനുള്ളില്‍ ഏറ്റവും അണുബാധയുള്ള സ്ഥലമായിരിക്കും ഡസ്റ്റ്ബിന്‍ വച്ചിരിക്കുന്നിടം. അതിനുള്ളിലെ മാലിന്യങ്ങള്‍ അണുക്കളും ബാക്ടീരിയകളും വളരാന്‍ സാഹചര്യമൊരുക്കും. അതിനാല്‍ മാലിന്യങ്ങള്‍ നീക്കം ചെയ്യുകയും പരിസരം വൃത്തിയായിക്കിയിടുകയും ചെയ്യണം. ഡസ്റ്റ് ബിന്‍ അടച്ച് സൂക്ഷിക്കുകയും, മാലിന്യം കൃത്യമായ ഇടവേളകളില്‍ നീക്കം ചെയ്യുകയും ചെയ്യുക.