പങ്കാളിയുടെ പ്രശ്‌നം അമിത ലൈംഗിതകയാണോ? ഈ സൂചനകളിലൂടെ തിരിച്ചറിയാം

ലൈംഗികത എന്നത് മനുഷ്യ ശരീരത്തിന്റെ ഒരു പ്രധാന ആവശ്യമാണ്. എന്നാല്‍ അതിന്റെ അമിതമായ ആവശ്യം അപകടകരമായ ഒരു രോഗമാണ്. അതാണ് ലൈംഗിക ആസക്തി. നിങ്ങളോ നിങ്ങളുടെ പങ്കാളിയോ ലൈംഗിക ആസക്തിക്ക് ഇരയായിത്തീര്‍ന്നിട്ടുണ്ടോ എന്നതിനെക്കുറിച്ചുള്ള ചില പ്രധാന കാര്യങ്ങള്‍ അറിഞ്ഞിരിക്കേണ്ടത് പ്രധാനമാണ്. അമേരിക്കന്‍ സൈക്കോളജിസ്റ്റ് പാട്രിക് കാര്‍നെസ് പറയുന്നത്, ഒരാള്‍ ആഴ്ചയില്‍ 14 മണിക്കൂറോ അതില്‍ കൂടുതലോ ലൈംഗികതയിലോ അര്‍ദ്ധലൈംഗിക പ്രവര്‍ത്തനങ്ങളിലോ ചിലവഴിക്കുകയാണെങ്കില്‍, അയാള്‍ അതിന് അടിമയായിത്തീരുമെന്നാണ്.

ഇത്തരക്കാര്‍ അശ്ലീല വെബ്‌സൈറ്റുകളില്‍ കൂടുതല്‍ സമയം ചെലവഴിക്കുകയോ പങ്കാളിയെ തേടി അലയുകയോ ചെയ്യുന്നു. അശ്ലീല സൈറ്റുകളില്‍ കൂടുതല്‍ സമയം ചെലവഴിക്കുന്നത് ഒരാളുടെ വ്യക്തിപരമായ കാര്യമാണെങ്കിലും, ഇത് ലൈംഗിക ആസക്തിയുടെ ഗുരുതരമായ ലക്ഷണമായി കണക്കാക്കപ്പെടുന്നു. ലൈംഗിക ആസക്തിയെ നിയന്ത്രിക്കുന്നത് വളരെ ബുദ്ധിമുട്ടാണ്. ഒരു വ്യക്തിക്ക് അതിന്റെ ദോഷഫലങ്ങളെക്കുറിച്ച് അറിഞ്ഞാലും അതില്‍ നിന്ന് രക്ഷപ്പെടാന്‍ കഴിയില്ല. ഈ ലേഖനത്തില്‍ ഞങ്ങള്‍ നിങ്ങളോട് പറയുന്നത് അത്തരം ചില ലക്ഷണങ്ങളെക്കുറിച്ചാണ്. നിങ്ങള്‍ ലൈംഗിക ആസക്തിയുടെ ഇരയാണോ അല്ലയോ എന്ന് തിരിച്ചറിയാന്‍ ഇത് നിങ്ങളെ സഹായിക്കും.

അമിത ലൈംഗികത

ലൈംഗിക ആസക്തിയെ പീഡോഫീലിയ അല്ലെങ്കില്‍ മൃഗീയത പോലുള്ള വൈകല്യങ്ങളുമായി കൂട്ടിക്കുഴയ്ക്കരുത്. ചില ആളുകള്‍ക്ക്, ലൈംഗിക ആസക്തി വളരെ അപകടകരമാണ്. ഇത് ബന്ധങ്ങളില്‍ കാര്യമായ ബുദ്ധിമുട്ടുകള്‍ ഉണ്ടാക്കുന്നു. മയക്കുമരുന്നും മദ്യവും പോലെ, ലൈംഗിക ആസക്തി ഒരു വ്യക്തിയുടെ ശാരീരികവും മാനസികവുമായ ആരോഗ്യം, വ്യക്തിബന്ധങ്ങള്‍, ജീവിത നിലവാരം, സുരക്ഷ എന്നിവയെ പ്രതികൂലമായി ബാധിക്കാന്‍ സാധ്യതയുണ്ട്. എന്നിരുന്നാലും ഒരു വ്യക്തിക്ക് ലൈംഗിക ആസക്തി ഉണ്ടോ ഇല്ലയോ എന്ന് അറിയാന്‍ പലപ്പോഴും കഴിയില്ലെന്ന് വിദഗ്ധര്‍ പറയുന്നു.

ലൈംഗിക ആസക്തിയുള്ള വ്യക്തികള്‍ ഒന്നിലധികം ലൈംഗിക പങ്കാളികളെ തേടുന്നു. എന്നിരുന്നാലും ഇത് ഏതെങ്കിലും തരത്തിലുള്ള അസ്വസ്ഥതയുടെ ലക്ഷണമല്ല. ചില റിപ്പോര്‍ട്ടുകള്‍ സൂചിപ്പിക്കുന്നത് ഒരു വ്യക്തി ലൈംഗികതയ്ക്ക് അടിമയാകുമ്പോള്‍, അയാള്‍ക്ക് ഒരു പങ്കാളിയെ കണ്ടെത്താന്‍ കഴിയുന്നില്ലെങ്കില്‍, അയാള്‍ സ്വയംഭോഗം ചെയ്യുകയോ അശ്ലീല വീഡിയോകള്‍ കാണുകയോ ലൈംഗിക ഉത്തേജക കാര്യങ്ങള്‍ തേടുകയോ ചെയ്യുന്നു. ലൈംഗിക ആസക്തിയാല്‍ ബുദ്ധിമുട്ടുന്ന ഒരു വ്യക്തി തന്റെ ജീവിതത്തെയും പ്രവര്‍ത്തനങ്ങളെയും ദിവസത്തില്‍ പല തവണ ലൈംഗിക പ്രവര്‍ത്തനങ്ങളില്‍ ഏര്‍പ്പെടാന്‍ സമൂലമായി മാറ്റിയേക്കാം. ഇത്തരക്കാര്‍ക്ക് അവരുടെ പെരുമാറ്റം നിയന്ത്രിക്കാന്‍ കഴിയില്ല.

ലൈംഗിക ആസക്തിയുടെ തരങ്ങള്‍

അശ്ലീലം, വേശ്യാവൃത്തി, സ്വയംഭോഗം, ലൈംഗികാതിക്രമം, പൊതു നഗ്‌നതതാ പ്രദര്‍ശനം, മറ്റുള്ളവരെ ഉപദ്രവിക്കല്‍

ലൈംഗിക ആസക്തിയുടെ ലക്ഷണങ്ങളും അടയാളങ്ങളും

ഒരു വ്യക്തിക്ക് ലൈംഗിക ആസക്തി പ്രശ്‌നമുണ്ടെന്ന് സൂചിപ്പിക്കുന്ന നിരവധി ലക്ഷണങ്ങളുണ്ട്. ഇത് വൈകാരികവും ശാരീരികവുമായ ലക്ഷണങ്ങളാകാം. നിങ്ങള്‍ക്കോ നിങ്ങളുടെ പങ്കാളിക്കോ ലൈംഗിക ആസക്തിയുടെ പ്രശ്നമുണ്ടെങ്കില്‍, നിങ്ങളുടെ പരസ്പര ബന്ധങ്ങള്‍ പലപ്പോഴും വഷളാകാന്‍ തുടങ്ങും. അകല്‍ച്ച, വിഷാദം, പരസ്പരം അകലം തുടങ്ങിയ ലക്ഷണങ്ങള്‍ നിങ്ങള്‍ക്കിടയില്‍ പ്രത്യക്ഷപ്പെടാന്‍ തുടങ്ങുന്നു. നിങ്ങള്‍ ഒരു സെക്സിന് അടിമയാണെങ്കില്‍, നിങ്ങള്‍ പലപ്പോഴും ആളുകളുടെ ലൈംഗിക അതിരുകള്‍ മനസ്സിലാക്കുന്നില്ല. മാത്രമല്ല മറ്റുള്ളവരോട് നിങ്ങള്‍ അക്രമത്തിന് മുതിരുകയും ചെയ്യും. ഏകാന്തതയും മോശം ലൈംഗിക ജീവിതവും കാരണം ഇത്തരക്കാരുടെ മാനസിക ആരോഗ്യവും വഷളാകുന്നു. ലൈംഗിക ആസക്തി അനുഭവിക്കുന്ന മിക്ക ആളുകളും മോശം ശരീര പ്രതിച്ഛായ പ്രശ്നങ്ങളിലൂടെ കടന്നുപോകുന്നു.

സെക്സ് അഡിക്ഷന്‍ ഉള്ള ഒരു വ്യക്തിയുടെ പെരുമാറ്റത്തില്‍ വളരെ രഹസ്യ സ്വഭാവം ഉണ്ടാകാം. അവര്‍ മറ്റുള്ളവരില്‍ നിന്ന് പല കാര്യങ്ങളും മറച്ചുവെക്കാന്‍ തുടങ്ങുന്നു. ഇത്തരക്കാര്‍ തന്റെ ഇണ, സുഹൃത്തുക്കള്‍, കുടുംബാംഗങ്ങള്‍ എന്നിവരില്‍ നിന്ന് പല കാര്യങ്ങളും രഹസ്യമായി സൂക്ഷിക്കുന്നു. അവര്‍ അവരുടെ പ്രവര്‍ത്തനങ്ങളെക്കുറിച്ച് കള്ളം പറഞ്ഞേക്കാം.

ലൈംഗിക ആസക്തിയുടെ ലക്ഷണങ്ങള്‍

* വിട്ടുമാറാത്ത, ഭ്രാന്തമായ ലൈംഗിക ചിന്തകളും ഫാന്റസികളും.
* അപരിചിതര്‍ ഉള്‍പ്പെടെ നിരവധി ആളുകളുമായി ബന്ധം.
* സ്വഭാവം മറയ്ക്കാന്‍ നുണ പറയുന്നു.
* ദൈനംദിന ജീവിതത്തിലെ ബുദ്ധിമുട്ടുകള്‍, ജോലിയില്‍ ഉല്‍പ്പാദനക്ഷമത കുറയുന്നു.
* ലൈംഗിക പെരുമാറ്റം കാരണം നിങ്ങളെയോ മറ്റുള്ളവരെയോ അപകടപ്പെടുത്തുന്നു.
* അമിത ലൈംഗികത നിമിത്തം വ്യക്തിപരമോ തൊഴില്‍പരമോ ആയ കാര്യങ്ങളില്‍ നെഗറ്റീവ് ഫലങ്ങള്‍

ലൈംഗിക ആസക്തിയുടെ ഫലങ്ങള്‍

ലൈംഗിക ആസക്തിയുടെ ഫലങ്ങള്‍ വളരെ ആഴത്തിലുള്ളതായിരിക്കും. ഇത് മൂലം നിരവധി പുരുഷന്മാരും സ്ത്രീകളും വിവിധ തരത്തിലുള്ള സെക്ഷ്യലി ട്രാന്‍സ്മിറ്റഡ് ഡിസീസ്(എസ്.ടി.ഡി)കള്‍ അനുഭവിക്കുന്നതായി ഗവേഷണങ്ങള്‍ കാണിക്കുന്നു. ലൈംഗിക ആസക്തി മൂലം സ്ത്രീകള്‍ അനാവശ്യ ഗര്‍ഭധാരണത്തിനും ചൂഷണത്തിനും ഇരകളാകുന്നു. വ്യക്തിപരവും സാമൂഹികവും കുടുംബ ബന്ധങ്ങളില്‍ പ്രശ്‌നങ്ങളും നേരിടുന്നു. ഇവര്‍ക്ക് ഒന്നിലധികം പങ്കാളിയില്‍ നിന്ന് ശാരീരിക ബന്ധങ്ങള്‍ക്കുവേണ്ടിയുള്ള ആഗ്രഹം ഉണ്ടാകുന്നു.

പ്രതിവിധി

ലൈംഗിക ആസക്തി ചികിത്സിക്കാന്‍ കഴിയില്ല, പക്ഷേ അത് നിയന്ത്രിക്കാനാകും. ഇന്ത്യയിലെ മിക്ക ലൈംഗിക ആസക്തി കേസുകളും കൈകാര്യം ചെയ്യുന്നത് സെക്‌സോളജിസ്റ്റുകളാണ്. നിങ്ങള്‍ക്കോ നിങ്ങളുടെ പങ്കാളിക്കോ ലൈംഗിക ആസക്തിയുടെ പ്രശ്നമുണ്ടെന്ന് തോന്നിയാല്‍, ഒരു മാനസികാരോഗ്യ വിദഗ്ധന്റെ സഹായം തേടാവുന്നതാണ്. അല്ലെങ്കില്‍ ഒരു സെക്‌സോളജിസ്റ്റിനെ സമീപിക്കുക എന്നതാണ് ഏറ്റവും നല്ല പരിഹാരം. ഈ രോഗത്തില്‍ നിന്ന് മുക്തി നേടുന്നതിന്, ഡീ അഡിക്ഷന്‍ സെന്ററുകളുടെ സഹായവും നിങ്ങള്‍ക്ക് സ്വീകരിക്കാം.