വിവാഹമോചനവും ആത്മവിശ്വാസവും തമ്മില്‍

തകരുന്ന വിവാഹബന്ധങ്ങള്‍ പുതിയ കഥയല്ല. ഇരു വഴിയ്ക്കും ദമ്പതികള്‍ വഴി പിരിഞ്ഞു പോകുമ്പോള്‍ പ്രശ്‌നങ്ങള്‍ തീര്‍ന്നല്ലോ എന്നു സമാധാനിക്കുന്നവരുണ്ടാകും.

എന്നാല്‍ തകരുന്ന വിവാഹബന്ധങ്ങള്‍ ഇതിന് ഇരയായ ദമ്പതിമാരില്‍, ഇത് പുരുഷനായാലും സ്ത്രീയായാലും വരുത്തി വയ്ക്കുന്ന ദോഷങ്ങള്‍ ധാരാളമുണ്ട്.

തകരുന്ന ഒരു ബന്ധം മറുവിഭാഗത്തോടുള്ള വിശ്വാസം നഷ്ടപ്പെടുത്തുമെന്നതാണ് ഒരു കാര്യം. സ്ത്രീയ്ക്ക് പുരുഷനിലും പുരുഷന് സ്ത്രീയിലുമുള്ള വിശ്വാസം നഷ്ടപ്പെടും.

വിവാഹബന്ധം തകരുന്നത് പലരുടേയും ആത്മവിശ്വാസത്തെ തകര്‍ക്കും. പിന്നീടൊരു ബന്ധത്തെക്കുറിച്ച് ഒാര്‍ക്കാന്‍ പോലും മടിയ്ക്കുന്നവരുണ്ടാകും.

വിവാഹബന്ധം തകരുന്നത് കരിയറിനെ തന്നെ ബാധിക്കുന്ന അവസ്ഥയുമുണ്ട്. ചിലര്‍ക്ക് ജോലിയിലുള്ള താല്‍പര്യം നഷ്ടപ്പെടും. മറ്റു ചിലര്‍ വര്‍ക്‌ഹോളിക് ആയിത്തീരും. ഇതു രണ്ടും നല്ലതല്ല. ആദ്യത്തെ കാര്യം ജോലിയെ ബാധിക്കുമെങ്കില്‍ രണ്ടാമത്തേത് ജീവിതത്തെ തന്നെ ബാധിച്ചേക്കും.

വല്ലാതെ ഒറ്റപ്പെട്ടുവെന്നൊരു തോന്നല്‍ ഉണ്ടാകുന്നത് സ്വാഭാവികം. ചിലരാകട്ടെ, സമൂഹത്തില്‍ നിന്നും ഒഴിഞ്ഞു മാറാനും ഒറ്റപ്പെട്ടു നില്‍ക്കാനും ശ്രമിക്കും. വിവാഹബന്ധം തകര്‍ന്നതിനെ തുടര്‍ന്ന് ഡിപ്രഷനിലേക്കും ആത്മഹത്യയിലേക്കും വരെ പോയവരുണ്ട്.

എന്തു കാര്യങ്ങളും നെഗറ്റീവ് രീതിയില്‍ കാണാനുള്ളൊരു മനസായിരിക്കും ഇത്തരക്കാര്‍ക്ക്. അനുഭവങ്ങളായിരിക്കും ഇവരെ ഇത്തരത്തില്‍ ചിന്തിക്കാന്‍ പ്രേരിപ്പിക്കുന്നത്.

സ്വയം വരുമാനമില്ലാതെ മറുപങ്കാളിയെ ആശ്രയിച്ചു ജീവിച്ചവരാണെങ്കില്‍ സാമ്പത്തിക ബുദ്ധിമുട്ടുകളും സ്വാഭാവികം.